fbpx

सम्पादक पुष्करलाल श्रेष्ठ मन्त

झीगु संवाददाता
येँ , चौलाथ्व त्रयोदसि । कामना न्युज पब्लिकेसन प्रा.लि.या अध्यक्ष अले नेपाल समाचारपत्र न्हिपौया प्रधान सम्पादक पुष्करलाल श्रेष्ठ बुधबार मन्त ।

पब्लिकेसनया विज्ञप्ति कथं श्रेष्ठ २०७६ वैशाख ४ गते न्हिनसिया ११ बजेर ४९ मिनेट वंकाः येँया नर्भिक अस्पतालय् उपचारया क्रमय् मदुगु खः ।

६०दँ दुम्ह वय्कःयात न्याला न्ह्यः न्हासय् समस्या वःगु धकाः येँया बयोधा अस्पतालय् व ब्लुक्रस अस्पतालय् जलस्येँया वासः याकादिइगु खः । वयां लिपा वय्कःया म्हय् मेमेगु समस्यात खनेदयावःगु खः । ’

स्वास्थ्यय् समस्या अप्वया वयेवं वय्कःयात नर्भिक इन्टरनेसनल अस्पतालय् भर्ना याःगु व अन वय्कःयात गुलियन—बारे सिन्ड्रोम धइगु ल्वय्या आशंका यानाः भारतया हरियाणाय् च्वंगु मेदान्त अस्पतालय् छ्वःगु खः । अन निला वासः याकाः लित हयाः हानं नर्भिक अस्पतालय् तयाः वासः याकाच्वंगु व अनं उमिगु छेँय् भैंसेपाटीइ यंकाः वासः याकूगु खः ।

नेपालय् सिने पत्रकारिता धइगु बांलाक खनेमदुनिबलय् कामना धइगु सिने पत्रिका पिकानाः अनं महानगर सनिलया न्हिपौ, नेपाल समाचारपत्र न्हिपौ, साधना डाइजेस्ट लय्पौ पिथनेगुलिइ नं वय्कःया ल्हाः दु ।

अथे हे वय्कः कामना ग्रुप अफ पब्लिकेसन्स, नेपाल मिडिया सोसाइटी, इन्टरनेशनल प्रेस इन्स्टीच्यूटया नं संस्थापक अध्यक्ष खः ।

थौं वय्कःया पार्थिव शरिरयात भुगोल पार्कय् तयातःबलय् अन थी थी राजनीतिक व्यक्तित्वया लिसें, पत्रकार, कलाकार व सामाजया मेमेपिं नं वयाः श्रद्धान्जली बिउवःगु खः ।
थौं हे वय्कःया शरिरयात पशुपति आर्यघाटय् अन्त्येष्टी याइगु ग्वसाः दु ।

Leave a Reply

Your email address will not be published. Required fields are marked *