बामदेव गौतमया लागि रामवीर मानन्धरया राजिनामा : हत्या लाकि आत्महत्या?

राजमाया पुतवार
छकः चुनावय् थुनां चुइक बुइधुंकाः हानं सुयातं त्याःम्ह जुयाः संसदया भत्ता नयेगु अधिकार व सिइ न्ह्यः छकः प्रधानमन्त्री जुइगु म्हगस छाय् वइ ? थज्याःगु वाहियात प्रावधान नेपालया राजनीति शास्त्रं विशेष यानाः खय् बरमूतय्त बियातःगु दु । अले उकिया निंतिं शहिद जुइत, अथवा यसें मयसें आत्महत्या यायेत छम्ह नेवाःयात हे बाध्य याइ । अय्सां धयाच्वना, झीसं पार्टी त्वःते मजिउ ।

वंगु चुनावय् बर्दियाय् वनाः चुनाव ल्वानाः अन बुनाः सुम्क च्वनाच्वंम्ह पूर्व गृहमन्त्री बामदेव गौतमयात आः अचानक सांसद जुइगु लोभ वःगु दु । जनतां पत्याः मयायेवं मेगु छुं यानाः नं संसदया भत्ता नयेमखनीगु अले सत्ताय् दुहाँ वनाः राष्ट्रिय धुकुतिइ लाल कायेमखनीगु जुलकि उमिगु ज्या धइगु हे दयाच्वंम्ह छम्ह सांसदया हत्या यानाः वया लासय् यगाः सत्ताय् वनेग खः । थन नं थ्व हे जुइगु खँ वयेधुंकल ।
चुनावय् बुम्हसित हानं नक्कली चुनाव याकाः वयात त्याकेत आः छम्ह सांसदं छगू बहाना यानाः थःगु पदं राजिनामा बिइमाः । अले व पदय् जायेकेत धकाः न्ह्याम्हसां हयेगु धकाः बामदेवयात चुनाव ल्वाकी । न्हापा थ्व हे ज्या या लागि उमिसं बाँके क्षेत्र नं ३ या विजयाी उम्मेदवार नन्दलाल रोकायायात राजिनामा बिइत दबाव बिउगु खः । तर वं अथे यायेत अस्वीकार यायेवं थुखे छम्ह नेवाःयात शहिद यायेतत्यंगु धइगु न्यनेदु ।

थन समाचाय् ब्वनेदुकथ‌ आः काठमाडौँ क्षेत्र नम्बर ७ या सांसद रामवीर मानन्धरं छगू बहाना तयाः राजिनामा बिल । अले वया थासय् धकाः आः बामदेव गौतम दनी अले वयात त्यात धकाः घोषणा याइ । थ्व धइगु न्हापा चुनावय् बूम्ह माधव कुमार नेपालयात संसदय् हयेत म्हितूगु चाला स्वयाः यक्व मपाः ।
नेपालय् छखलः अज्याःपिं मनूत दु गुपिं राजनीति यायेगु धइगु हे गुगुं कथं नं सत्ताय् वनेग अले अरबौंया भ्रष्टाचार यायेगु खः । न्हापा गृहमन्त्रीया सवाः कायेधुंकूम्ह अले थःगु हे पार्टीं भ्रष्टाचारी धकाः धायेकेधुंम्ह बामदेवया आः न्ह्याथेयानाः सां सत्ताय् वनेत हथाय् चाःगुया लिच्वः हे रामवीरया राजिनामा खः । आः वया याकनं हे सरकारय् उथलपुथल यानाः प्रधान मन्त्री नयेगु हठ पुवनीगु बाहेक जनतां छकः बेइज्जत जुइक बुकाहयेधुंकूम्ह बामदेव मछाः मजुसे ई नि ब्यः चुनाव ल्वानाः संसदय् दुहाँ वनेगु धइगु रामवीरयात भोट बिउपिं दक्व मतदाताया अपमान जक मखु सम्पूर्ण बहुदलीय व्यवस्थाया हे हत्या खः ।

पार्टीया लागि थःगु जाति व भाय् मधाइम्ह रामवीर मानन्धरं अकस्मात सोमबार थःगु राजिनामा पत्र दाखिला यायेवं थ्व खँ देय् न्यंक चर्चा जुल । वंगु चुनावय् १८१०२ भोट कयाःत्याम्ह मानन्धरं थुकथं जनमतया बेवास्ता यानाः छुं भचा पद व ध्यबाया लोभय् छकः त्याःगु पद नं जनताया सेवा हे मयासें पार्टीयात बुझेयाःगु खनाः नेवाःत छक्क जुयाच्वंगु दु । हिसिला यमी थज्याम्ह प्रखर नेतायात तकं बुकेगु क्षमता दुम्ह नेता थुकथं पार्टीया लागि शहिद जुइगु धइगु पक्कां बांलाःगु खँ मखु ।

थुलि जुइवं आः नेवाःत थःथःगु पार्टी दुने च्वनाः ल्वायेमाः अले पार्टीयात प्रयोग यानाः सत्ताय् वनेमाः धइगु विचारधारा पूर्णतया असफल जूगु खनेदूगु दु । रामवीर न थःगु नेवाः समुदायप्रति इमानदार जुइफत, न थः मतदाताया मिहेनतयात कदर याइम्ह जुल । पार्टीं धाःधाःथे याइपिं अले जनताया मतयात यंकाः पार्टीया नेतातय्गु निर्णयय् बुझेयाइपिं नेतात छु यायेत धइगु खँ पिहाँ वयाच्वंगु दु ।

खयेत ला रामवीर धइम्ह नेवाः भावना दुम्ह नेता मखु, विशेष यानाः नेवाःतय्गु छेँ थुनेत भूमिका म्हितूगु धइगु नं खँ वल । व आँट मदुम्ह नेवाः त्यानावनेगु स्वयाः बरु छुं यायेफुम्ह गैर नेवाः हे वःसा थवा धइगु तकं खँ वयाच्वन । तर थथे धायेवं नेवाःतय्गु भिं जुइगु छुं संकेत दइमखु । थन हरेक पार्टीइ छम्ह छम्ह यायां नेवाःतय्गु अस्तीत्व मेटेयायेगु षडयन्त्र जुयाच्वंगु अवस्थाय् छम्ह व्यक्ति विशेषप्रतिया तमं नेवाःतय्त हे राष्ट्रिय पार्टी राजनीतिइ कमजोर यायेगु नीति नं परिपक्व नीति धायेफइमखु । मेखे, रामवीरं थःगु पदं राजिनामा बिइत ३ करोड ध्यबा काःगु धइगु नं खँ वयाच्वंगु दु । खला व अथे ध्यबा माःम्ह मनू मखु तर नं यदि थ्व खः धइगु जूसा ला व मानन्धर समुदाय जक मखु सम्पूर्ण नेवाःतय्गु लागि हे कलंक जुल, लँय् खनकि थुकलं जक बिउसां गाइमखु अज्याःपिन्त ।

व स्वयाः अजू चायापूगु खँ ला छु धायेबलय् नेवाःतय्गुृ आदिभूमिइ छम्ह चुनाव त्यानावंम्ह नेवाः जनप्रतिनिधियात हाकुतिनाः वया थासय् खय् बरमूयात तयेहयेगु पार्टीया के निर्णय जुल नं नेवाःतय्गु संस्था धयातःगु वःगु मछि संस्थां गनं विरोध याःगु खने मदुनि । प्रेस विज्ञप्तिया निगः आखः हे टाइप यानाः पितबिइमफुपिं कथित नेवाः नेतातय्सं जनतायात सतकय् क्वत हयाः सदनय् नेवाः प्रतिनिधित्व अप्वयकेकेगु अथाव म्हो यायेत्यंगुया विरोध याइ धइगु आशा हे मदयेकल । थज्याःथाय् नेवाः नेतृत्वयात आलोचना यायेगु बाहेक सर्वसाधारण नेवाःत मेगु छु यायेफइ ?

फोटो कोलाज अन्नपुर्ण पोस्ट ।

Leave a Reply

Your email address will not be published. Required fields are marked *

This site uses Akismet to reduce spam. Learn how your comment data is processed.