निक्वःगु नेपालभाषा साहित्य नखः क्वचाल

https://www.facebook.com/rajendra.manandhar.7906

 

झीगु संवाददाता

यल, थिंलागा अस्तमि । नेपालभाषा साहित्य ख्यःयात नखः कथं हनेगु ज्याया निरन्तरता बिइत यलया लाय्कू भन्दाः क्यबलय् निक्वःगु नेपालभाषा साहित्य नखः शनिबारकुन्हु न्हिछियंक न्ह्यात ।

येँया मेयर विद्यासुन्दर शाक्य व यलया मेयर चिरिबाबु महर्जनं मंकाः उलेज्या यानाः न्ह्याःगु उगु ज्याझ्वलय् स्वंगू सफू विमोचन, निगू विषयय् मंकाः सहलह, साहित्य बाचन व निगू ख्यालः क्यनेज्या जुल ।

किपाः रेखा शाक्य

 

किपाः रेखा शाक्य

ज्याझ्वलय् शताब्दी पुरुष सत्यमोहन जोशीं इन्द्रमालीं मुनादीगु नेपालभाषा ‘नेपालभाषा यासुधुकू’या उलेज्या यानादिलसा जनकवि दुर्गांलाल श्रेष्ठं भुषण प्रसाद श्रेष्ठयागु गजल मुना ‘छन्द १०१ व नेवाः गजल’ अले राजेन मानन्धरया उपन्यास ‘हल हल बुंगद्यः’या उलेज्या यानादिल । ज्याझ्लय् सत्यमोहन जोशीं यासुधुकूया बारे, दुर्गालाल श्रेष्ठं गजलया बारे अले मल्ल के सुन्दरं उपन्यासया बारे टिप्पणी यानादिल । उलेज्या सिधयेवं च्वमिपिन्सं ब्वमिपिन्सं न्याःगु सफुति थःगु ल्हाःचिं बियादिइगु खः ।

किपाः रेखा शाक्य
किपाः रेखा शाक्य

वयांलिपा नेपालभाषा मञ्चन साहित्ययात कयाः सहलह जुल । पुष्करभक्त माथेमा सहजकर्ता जुयादीगु उगु सहलहय् मदनकृष्ण श्रेष्ठ, घिमिरे युवराज, रामकृष्ण खड्गी व हिसिला महर्जनं आः या अवस्थाय् नेवाःभाय्या दबूप्याखंयात हानं गुकथं म्वाकेफइ धइगु विषयय् चर्चा यानादिल ।

किपाः रेखा शाक्य
किपाः रेखा शाक्य

नेपालभाषाया सफूया बजाः व्यवस्थापन विषयय् जूगु सहलहय् विमल ताम्राकार, माधव महर्जन, भुपेन्द्र खड्का व शभानी सिंहं ब्वति कयादिल । नेपालभाषां सफू पिहाँ वयाच्वंसां ब्वमिपिन्थाय् विक्री तसकं म्हो जुयाच्वंगु विषयय् जूगु सहलहया सहजीकरण सुरेश मानन्धरं यानादिल ।

नेपालभाषा साहित्य रचना पाठ यायेगु ज्याय् करीब २०म्ह कवि व बाखंच्वमिपिन्सं ब्वति कयादिल ।

अन निगू ख्यालःया ब्वज्या जुल । न्हापां ख्यालः सुरेश किरणया ओम नमः शिवायया निर्देशन रामकृष्ण खड्गीं यानादिउगु खः । उकिइ रामकृष्ण खड्गी, रुपेन्द्र श्रेष्ठ थक्वपाःमि व रजनी शाही अभिनय दु ।

किपाः रेखा शाक्य

महन्त मल्लया दनाः कनेगु ख्यालः लिपा क्यंगु मेगु ख्यालः जातः गुरु मदुम्ह ख्यालः च्वमि पद्मरत्न तुलाधरया दकलय् लिपांगु ख्यालः खः । रमेश काजी स्थापितं निर्देशन यानादीगु उगु ख्यालकय् शरद कसाः, कर्ण वज्राचार्य व सलिना वज्राचार्यया अभिनय दु ।

किपाः रेखा शाक्य

ज्याझ्वः सन्ध्या टाइम्स पिथना प्रालिया ग्वसालय् जूगु खः ।

किपाः रेखा शाक्य
किपाः रेखा शाक्य
किपाः रेखा शाक्य

ज्याझ्वलय् झीगु डक कम, तिबः पिथना, नेपालभाषा टाइम्स व मेमेगु पिथनाया थी थी सफूया लिसें नसात्वँसा व मेमेगु हलंज्वलंया स्टलत नं तयातःगु खः । येँ, यल, ख्वप, किपू आदि थासं वःपिं द्वःछि स्वयाः यक्व साहित्यप्रेमि पिनिगु सहभागियात आयोजकतय्सं सफल व उत्साहजनक जूगु धाःगु दु । थज्याःगु ज्याझ्वः यानाः नेपालभाषा साहित्यया ख्यः यात चकंके फइगु अले न्हूगु पुस्तायात साहित्य ख्यलय् आकर्षण यायेफइगु न. वय्कःपिनिगु धारणा दु ।

Leave a Reply

Your email address will not be published. Required fields are marked *

This site uses Akismet to reduce spam. Learn how your comment data is processed.