न्हूदँ ११३९या लसताय् साइकल रयालि

 

 

झीगु संवाददाता
येँ, कछलाथ्व पारु । नेपाल संवत् न्हूदँ कुन्हु साइकल रयालि यानाः भिंतुना इनेगु पुलांगु परम्परायात निरन्तरता बिइगु कथं थौं असं कमलाछिनिसें छगू साइकल रयालि जुल ।
थौं सुथय् कमिलाछि कुनय् जूगु छगू ज्याझ्वलय् उपमेयर हरिप्रभा खड्गीं उगु रयालिया उलेज्या यानादीगु खः । उगु झ्वलय् वय्कलं साइकल गयेगु धइगु नेपाःयात आत्मनिर्भर यायेगु, वातावरणयात स्वच्छ यायेगु व थःगु हे उसाँय् भिंकेगु ज्या खः धयादिल । वय्कलं काठमाडौं महानगरपालिकां येँय् साइकल यातायातयात व्यवस्थित व सुरक्षित यायेगु कुतः यानाच्वंगु नं न्ह्यथनादिल ।
रानीपोखरी कर्नर टिम (आरसीटी) फ्यान क्लबया ग्वसालय् जूगु उगु र्यालि येँया तिंख्यः, यलया कुपण्डोल, मंगलबजाः, बालकुमारी जुयाः ख्वपय् क्वचाल । रयालिया झ्वलय् यल व ख्वपया थी थी थासय् ख्यें सगं नं बिउगु व त्वाः त्वालय् परम्परागत वसतं पुनाः लसकुस यायेत स्थानीय मनूत च्वनाच्वंगु खः ।

ज्याझ्वलय् थ्यंमथ्यं द्वःछि मनूतय्सं ब्वतिकाःगु आयोजकं धाःगु दु । धार्मिक व सांस्कृतिक महत्त्वयात संरक्षण व प्रवद्र्धन यायेत रयालि यानागु नं क्लब धाःगु दु । आरसीटीं दकलय् न्हापा १०९० न्हु दँ कुन्हु साइकल रयालि न्यायेकूगु खः । दथुइ दिनावंगु रयालि हाकनं थुगुसीनिसें नियमित याये त्यंगु जुल ।

https://www.facebook.com/rajendra.manandhar.7906

Leave a Reply

Your email address will not be published. Required fields are marked *

This site uses Akismet to reduce spam. Learn how your comment data is processed.