खुइन्यादँ न्ह्यःया दुर्गालालया चिनाखँ आः सफू जुयाः


झीगु संवाददाता

यल, कछलागा दुतिया । थ्यंमथ्यं खुइन्यादँ हे दत जुइ । जनकवि दुर्गालालं थम्हं ब्वंकाच्वनागु कन्यामन्दिर स्कुलया मस्तलिसे म्हितुं म्हितुं चिनियाम्ह किसिचा च्वयादीगु । नेपालभाषाया साहित्यय् छगू न्हूगु युग हःगु व म्येत आः हानं मेगु जन्मकयाः दंवःगु दु, झीगु भासं आःतक पिदंगु कविता सफूत मध्ये शायद दकलय् बांलाःगु स्तरया सफू जुयाः ।

छपु चिनाखँया नं छगू सफू जुइफु ला? थ्व न्ह्यसःया लिसः हे जुइ थौं यल लाय्कूया केशवनारायण चुकय् जूगु व ज्याझ्वः । निसः धइथें मस्तय् दथुइ उगु चिनियाम्ह किसिचाय् दुथ्यानाच्वंगु छपु छपु म्ये या छगू छगू सफू यानाः मस्तय्त यइपुगु किपां जाःगु सफूतय्गु उलेज्या जुल । व नं मस्तय् पुचलय् मचा जुयादीम्ह जनकवि दुर्गालालया हे ल्हतिं ।

“जिन्दगीइ जि ल्याय्म्ह धइगु हे जुयागु मदुनि । मचा हे जुयाच्वना तिनि । जितः न्ह्याबलें थथे मचा जुयाः च्वनेदयेकेत थ्व मस्तसें ग्वहालि यात धाःसा जिं अझ नं मस्तय्गु न्ह्यइपु न्ह्यइपुगु कविता च्वये फइला थें जितः च्वंनि,” वय्कलं धयादिल ।

उगु चिनाखँ सफूत दुर्गालालया लिसें मदन कृष्ण श्रेष्ठ व मेमेपिं सफू पिथनाज्याय् सनादीपिं सकसिनं मंकाः कथं उलेज्या याःगु खः ।

उकियालिसें अन हे करिब स्वीदँ न्ह्यः रिकर्ड जूगु चुलिंचिया चं चंया म्ये अबलय्या मचा हालामिपिं हे वयाः हालाः नं न्यंकूगु खः ।

थ्व ज्याझ्वः सफू पब्लिकेशन व क्युहोतेज कोवया ग्वसालय् जूगु खः ।

https://www.facebook.com/rajendra.manandhar.7906

Leave a Reply

Your email address will not be published. Required fields are marked *

This site uses Akismet to reduce spam. Learn how your comment data is processed.