पद्म रत्नयात लुमंकाः श्रद्धान्जलि सभा जुल

झीगु संवाददाता
येँ, कछलाथ्व अस्तमि । नेवाः आन्दालेन अले जातीय अधिकारया न्ह्यलुवा व मानव अधिकारवादी नेता पदम रत्न तुलाधर मदुगु झिंस्वन्हुया पुण्यतिथिइ थौं शुक्रबार थन बसन्तपुलिइ श्रद्धान्जलि सभा जुल ।

 

ज्याझ्वयल् नवाउपप्रधानमन्त्री ईश्वर पोखरेलं नेपाः बहुभाषिक, बहुजातीय व बहुधार्मिक देय् जूगुलिं अन हरेजक भाषा जाति व धर्मया समान अधिकार दयेमाःगु खँय् यक्व न्ह्यः हे सः तयाः नेपाःया थी थी जातियापिन्त न्ह्यलंचायकेगु कुतः याःगुलिं वय्कःयात दक्वस्यां लुमंकेमाःगु खँ कनादिल । लिसें वय्कलं नेपाल संवत् नेपाःया हे राष्ट्रिय संवत् जूगुलिं थुकियात राज्यं माःगु कदर यायेत लिमचिलीगु खँ नं लुमंकादिल ।

 

माओवादीतय्त वार्ताया टेबुलय् तक हयेत तुलाधरलिसें ज्या यानादीम्ह दमननाथ ढुंगानां तुलाधरं छगू सशस्त्र युद्धयात शान्ति वार्ता मार्फत देय्या राजनीतिक शक्तिया रुपय् हिलेत यानादीगु योगदानया चर्चा यानादिल ।

 

जनजाति आन्दोलनया नेता डा. ओम गुरुङ्गं तुलाधरं नेवाःत जक मखु, तामांग, गुरुंग, राई लिम्बु लगायत हरेक उत्पीडित शोषित अले थःगु मौलिक अधिकारपाखें बन्चित जनजातितय्थाय् वनाः नेपाः बहुभाषिक देय् जूगुलिं हरे भाषाभाषीया समान अधिकार दइ धकाः दक्व नेपाःपिपिन्त उमिगु अधिकारया बारे चेतना थनेत ऐतिहासिक भूमिका म्हितूगु लुंकादिल ।

https://www.facebook.com/rajendra.manandhar.7906

तुलाधर मदूगुया लुमन्तिइ धारणी ब्वनेगु झ्वलय् परम्परागत बौद्धधर्म संघया अध्यक्ष प्रा. डा. नरेशमान वज्राचार्यं पद्म रत्न तुलाधर स्वर्गय् वनेमा धकाः कामना यायेगु मखु धासें वय्कः हानं हानं थन हे नेपालय् जन्मेजुयाः थन जुयाच्वंगु भाषिक धार्मिक व जातीय असमानताया विरुद्ध सः थ्वयेकेत अले जनतायात सचेत यायेमानिगु खँ धयादिल ।

अथे हे व ज्याझ्वलय् जनकवि दुर्गालाल श्रेष्ठ, गोविन्द छन्त्याल, सुबोध प्याकुरेल, सत्यभामा माथेमा, मल्ल के सुन्दर व श्याम श्रेष्ठ व मेमेपिन्सं नं तुलाधरया योगदानयात लुमंकाः वय्कलं न्ह्याकादीगु भाषिक, जातीय व मेमेगु उत्पीडनया विरुद्धया आन्दोलनयात निरन्तरता बिइगु हे वय्कःयात धाथें श्रद्धान्जलि बिइगु जुइ धयादिल ।

 

ज्याझ्वः पद्मरत्न तुलाधर बिचाः हायेक ग्वसाःखलःया ग्वसालय् जूगु खः ।

Share this...
Share on Facebook
Facebook
Tweet about this on Twitter
Twitter

Leave a Reply

Your email address will not be published. Required fields are marked *

This site uses Akismet to reduce spam. Learn how your comment data is processed.