छु जूगु थ्व ?

दुर्गालाल श्रेष्ठ

मस्यु थौं छाय् छाय् सुथंनिसें हे
वैच्वन झलझल कमलप्रकाश
स्वानय् तक नं कमलप्रकाश 
वैच्वन खुलुखुलु मिंक सुबास .

तःदँमछिं हे दत मखनागु
गन खः नं मस्यु कमलप्रकाश
हसना मदु छुं अय्‌नं झलझल
वैच्वन छाय् छाय् कमलप्रकाश .

स्वःस्वःथाय् जक गन खः बाबा
मिखा तिस्यूसां कमलप्रकाश
कमल जिके वैच्वंगु च्वनं छाय्
सासःया हे पंक निकाश .

जिगु थ्व अबस्थाया स्वापु गन
छुं हे मस्यु जिं कारण खास
चेतन धाय्‌कि थ्व अवचेतन धाय्
छाय् भःभः जिगु धैच्वन श्वास .

थुलि खः, थ्व ख्यलय् दकले न्हाप्पां
दः ब्वय्‌हःम्ह व कमलप्रकाश
खः व वहे खः चाय्‌काब्यूम्ह
जिगु हत्तीगु व आत्मप्रकाश .

यक्व लिपा तर छाय् छाय् मस्यु थौं
लुमनावःलिसे कमलप्रकाश
थ्व नुगः ख्वैच्वन खुलुखुलुमिंक
मस्यु आयास कि थ्व अनायास .

आकाशय् नं आकाश मखं
न्यंकभनं हे कमलप्रकाश
थथे ला जूगु द हे मदु गबलें
अय् ! थ्व छुकीया खः आभास ?

११३९ कछला थ्व पारु

Leave a Reply

Your email address will not be published. Required fields are marked *

This site uses Akismet to reduce spam. Learn how your comment data is processed.