आनन्द कुटी विहारय् कथिन चीवर दान जुल




येँ, कौलागा नवमि । नेपाःया प्रख्यातगु थेरवाद विहारमध्ये छगू विहारया रुपय् स्थापित जुयावयाच्वंगु आनन्द कुटी विहारय् कार्तिक १६ गते शुक्रवाः पवित्र कथिन चीवर दान ज्याझ्वः क्वचागु दु ।

थुगु ऐतिहासिक विहारय् विहारया कार्यबाहक विहार प्रमुख श्रद्धेय भिक्षु धर्ममूर्ति महास्थवीर, भिक्षु प्रज्ञामूर्ति महास्थवीर सहित मेपिं भिक्षुपिं वर्षावास पुवंका बिज्यागु सुखद लसताय् थुगु कथिन चीवर दान ज्याझ्वः जूगु खः । किम्डोलया निर्वाण मूर्ति विहारं आनन्द कुटी विहार तक कथिन चीवर शोभा यात्रा याना आनन्द कुटी विहारया समारोह जूगु खः ।

किम्डोल विहारया डा. धम्म बिजया गुरुमांपाखें लसकुस च्वचु बिया बिज्यागु थुगु ज्याझ्वलय् भिक्षु कोण्डन्य महास्थवीरजुं कथिन सम्वन्धी थीथी महत्वपूर्ण जाःगु बुद्धकालीन खँयात तक. मध्ये नजर तया बिज्याना उग ुईया घटनाक्रमया खँ तकं कःघाना धर्मदेशना याना बिज्यागु खः । बनेपाय् बिराजमान जुया बिज्याम्ह राहुल भन्तेपाखे्र बुद्ध पुजा याका बिज्यागु थुगु ज्याझ्वलय् डा. धम्म बिजया गुरुमांपाखें नं ंदान याना बिज्यागु खः ।

आपालं उपासक उपासिकापिंपाखें अष्ट परिष्कार दान नं यानादीगु थुुगु ज्याझ्वलय् मिनु शोभा तुलाधरं सुभाय् न्वचु बियादीगु खः । विहारया का.वा एवं विहार प्रमुख धर्ममूर्ति महास्थवीरजुं न्ह्याका बिज्यागु थुगु ज्याझ्वलय् आपालं उपासक उपासिकापिनिगु उपस्थिति दुगु खःसा वय्कपिन्सं थःगु धर्म चित्त उत्पति याना भिक्षू गुरुमांजुपिन्त दान प्रदान यानादीगु खः ।

थुगु कथिन चीवर दानय् १७ म्ह दातापिं दुगु खःसा भिक्षु गूमांजुपिन्त सांघीक भोजन दान याय्गु ज्या नं जूगु खः । थुगु समारोहलय् आनन्द भुवन विहारया ज्ञानमाला भजन खलःपिन्सं ज्ञानमाला भजन न्ह्योब्वगु ज्या जूगु खः । थुकथं हे ज्याझ्वःया अन्तय् उपस्थित सकसितं भाजन दान याय्गु ज्या नं जुगु खः । २०७२ सालया तःभुखाचं थुगु आनन्द कुटी विहार बामलाक्क हे स्यंगुलिं श्री लंकाया आर्थिक ग्वहालि व नेपाल सरकारया प्राविधिक ग्वहालिइ थुगु विहार आधुनिक शैलीं दय्केगु ज्या जुया वयाच्वंगु दु ।

समाचार ग्वाहालि ः सुगत रत्न सिन्दुराकार

Leave a Reply

Your email address will not be published. Required fields are marked *

This site uses Akismet to reduce spam. Learn how your comment data is processed.

%d bloggers like this: