मंका: खलकय् नेवा: तयगु आस्था व विश्वास

राजा वज्राचार्य

झी सकसियां आस्था व बिश्वासया छगू खल: – मंका: खल: । गुगु बिश्वासं मंका: खल: प्रति नेवा: तयसं नुग: क्वसायेकूगु ख:, उमित लाकमं च्वाना फाइनान्स कंम्पनित बिस्युं वनेथें खने मदया वन । फाइनान्स कम्पनिइ मनूतय् ध्यबा लगानि जुया च्वंगु दइ उकें उमि नुगलय् स्याइ । मंका: खलकय् नेवा: तयगु आस्था व बिश्वासया लगानि जुयाच्वंगु दु । नुग: ला उलि हे मछिनी ।

जित: लुमंनि नेवातय् हक हितया निंतिं दबू छेँ दनेगु निंतिं दां म्हयेत पतिं थथाय्पु जुइक मना वयेक मादल थाना: म्ये हाला: त्य:छिं त्य: फ्वं वनागु । धाथें व इलय् नेवा: तयगु नुग: गुलि क्वसा: धका: स्वयेफु । लसतां बुँ दान या:पिं नं दु । ग्व:दँ तक ला येँ व पिने पिने नं त्य:छिं त्य: फ्वं जुल । पिने पिनें नं दां द्वाहां वल । लिपा जू लिसे त्य:छिं त्य: फ्वनेगु दिनावन । न्हूदँ हनेगुलिइ जक क्वच्युं वन ।

 

मंका:खलकं गबलय् मनूत तनावन धका:हे वा: मचाल । आ: फेसबूकय् स्वया:तिनि थुगुसिइ न्हूदँ हनेत हे मंका:खल: न्ह्यमच्युंगु खँ सिल । गुलि म्हाइपुगु खँ ! उलिमछि खँ पिहाँ वयाच्वन नं मंका: खल:या दुज: तयसं छस: हे खँ पित मह: । उकिया हर्ता कर्ता, न्ह्यागु ज्या खँय् नं न्ह्यचिला च्वंम्ह, सकतां खँ स्यूम्ह, पर्सनालिति नं दुम्ह सकसियां मानय् यानात:म्ह नरेश बीर शाक्य ( नरेश दाइ नं ) हे चुँइक छस:हे न्वँवाना बिमज्या:गु तसकं हे अजू चायापुगु खँ ख: । छगू खँ ला दये मा:नि …!

फेसबूकय् च्यूता: प्वंका च्वंपिसं नं खालि क्वथाय् दुने च्वना: जक हालाच्वन । मनू हे नापलाना: खँ ल्हा: वनेगु सुनां हे बिचा: मया: । थुपिं फुक्कं हे किसिया क्यनेगु वा थें क्यनेगु च्यूता: जक ब्वयाच्वंपिं थें खनेदत । मखुसा धाथें च्यूता: दुपिं ख:सा द्यनाच्वं पिन्त थं वने माल । छेँय् छेँय् वना : सहलह ब्याक: वने माल । वनेगु ख:ला ? का थ्व न्हूदँय् मंका: खल:या ज्याखँ पित बीकेगु ख:ला । मंका: खल:यात हानं म्वाकेगु ख:ला ? धाथें न्ह्यचिलेगु ख:सा का जाये वा । गन मुनेगु ? थथे धायेमा: नि !
नापलाना: जक थथे अथे धाये फइ ।

नेपालभाषा साहित्य पुचलं ल्ह्ययागु

Leave a Reply

Your email address will not be published. Required fields are marked *

This site uses Akismet to reduce spam. Learn how your comment data is processed.

%d bloggers like this: