विराट नेपालभाषा साहित्य सम्मेलन क्वचाल

झीगु संवाददाता
ख्वप, कौलाथ्व द्वादशी । नेपालभाषा साहित्य मार्फत जनजागरणया ज्याय् बासःदँ स्वयाः न्ह्यःनिसें न्ह्यानाच्वंगु विराट नेपालभाषा साहित्य सम्मेलन थौं थन क्वचाल ।
न्यय्न्हय्क्वःगु विराट नेपालभाषा साहित्य सम्मेलनं थौं ख्वपया पुलांम्ह कवि योगेन्द्र प्रधानयात हंगु खः ।

मूपाहाँ संस्कृतिविद व शताब्दी पुरुष सत्य मोहन जोशीजुं नेपालभाषा साहित्ययात थी थी थासं थःथःगु पहलं ज्या यानाः धिसिलाकायंकेमाःगु खँय् जोड बियादिल ।

किपाः रेखा शाक्य

अन कवि योगेन्द्र प्रधान नांगु सफूया उलेज्या नं जूगु खः ।
ज्याझ्वलय् नवासें साहित्यकार पद्मरत्न तुलाधरं साहित्यं जनजागरण हइगु व देशय् हे ततःधंगु परिवर्तन हयेत ग्वहालि याइगु जूगुलिं आः हानं अज्याःगु साहित्यया श्रृजना यानाः देसय् परिवर्तनया संवाह जुइत नेपालभाषा साहित्यकारपिन्त आह्वान यानादिल ।
“साहित्य धइगु आन्दोलन खः । साहित्य धइगु क्रान्ति खः । अज्याःगु साहित्यया श्रृजना जुइमाल कि अज्याःगु साहित्यं जनता जनताय् वनाः उमित जुरुजारुं थनी । हानं मेगु आन्दोलन याइपिं, क्रान्ति याइपिं अले जनयुद्ध याइपिं जनता हयेगु साहित्य च्वयेमाल,” वय्कलं धयादिल ।

किपाः रेखा शाक्य

सरकारं नकतिनि हे जक नेपालय् शिक्षा अंग्रेजी व नेपालीं जक बिइदइगु न्हूगु विधेयक वःगुलिइ नं वय्कलं असन्तुष्टी प्वंकुसें जनतायात उकिया विरुद्धय् मातृभाषां शिक्षा कायेदयेमाःगु अधिकार प्राप्तिया निंतिं छपँ जुइत नं वय्कलं इनाप यानादिल ।
ज्याझ्वलय् नेपालभाषा विषयय् एसइइ परीक्षाय् दकलय् अप्वः ल्याः हःम्ह विद्यार्थीयात नेपालभाष पदक लःल्हाःत ।

किपाः रेखा शाक्य

डा. पुष्पराज राजकर्णिकार व त्रिरत्न शाक्यं विराट नेपालभाषा साहित्य सम्मेलनया बारे खँ तयादिल ।
ज्याझ्वलय् थी थी साहित्यकारपिन्सं थःगु रचना ब्वनाः नं न्यंकल ।
अथे जुजुकाजी रंजीत, पवित्र कसाः व रीता महर्जनं म्ये नं हालाः न्यंकूगु खः ।

Leave a Reply

Your email address will not be published. Required fields are marked *

This site uses Akismet to reduce spam. Learn how your comment data is processed.