मचाम्ह न्यामिसा (बाखं)

न्ह्यब्वःम्ह : राजेन मानन्धर

डेनमार्कया लाेकंह्वाःगु मचा बाखं मचाम्ह न्यामिसा (Little Mermaid) या  सार थन न्ह्यब्वयागु जुल ।

मचाम्ह न्यामिसा वया अबु समुद्रया जुज, वया अजि व वया न्याम्ह ततापिं नाप समुद्र दुने च्वनाच्वन । वया दक्व ततापिं दछि दछि जक पाः । इमि झिंन्यादँ दुबलय् समुद्रया सतलय् लालकायेगु अनुमति दइ । दक्वं थःथःगु झिंन्यादँया बुदिं सिधलकि समुद्र सतहलय् वनी अले छेँ थः केहेँपिन्त अन अय् दु थय् दु धकाः बाखं खनी । कान्छीम्हसित जूगुलिं मचाबलय् वया ततापिन्सं समुद्र सतहया व मनूतय्गु बाखं कनीगु वया न्यनेयः ।
झिंन्यादँ दयेवं वया नं सतहलय् वनेगु पाः वल । व वंबलय् अन वं छगः जहाजय् छम्ह हिसिदुम्ह राजकुमार खन अले खनेवं हे वया व राजकुमार लिसे मतिना जुल । अनथाय् लाक्क हे तसकं वा फय् वल अले व मचाम्ह न्यामिसां वयात बचेयात । वं बचेयानाः किनारय् च्वंगु द्यगलय् तयेयंकल । अन मेम्ह मिसा छम्ह वयेवं व लिहाँ वल ।
वं थः अजियाके न्यन “मनूत यदि लखय् डुबेमजुल धाःसा न्हयाबलें म्वायेफइलाकि फइमखु?”
अजिं वयात कन, “मनूतय् न्यामनूतय्गु ३००दँया जीवन स्वया तकसं चिहाकःगु जीवन दइ । न्यामनूत सित धायेवं समुद्रया फिंज जुयावनी तर मनूतय् गबलें मफुइगु आत्मा दयाच्वनी अले व स्वर्गय् वनी । ”
मचाम्ह न्यामिसां राजकुमारयात थः दयेकेत व वयागुथेंज्यााःगु गबलें मफुइगु आत्मा कायेत समुद्रया जादुगरनी नापलात । वं धाल, “जितः नं मनूयाथें सितकि आत्मा जुइगु शक्ति बिउ । ”
वं मचाम्ह न्यामिसायात वासः बिल, अले धाल, “थ्व वासः नलकि छंगु तुति ला दइ तर वं थःगु संसारयात मन्त्रमुग्धयाइगु सः दूगु मे ध्यनाः बिइमाली । अले हानं छकः मनू जुइधुन कि व हानं समुद्रय् लिहाँ वयेफइमखु । ”
व वासः नलकि वया म्हयय् तलवारं किउथें जुइ तर लन धायेवं वया निपु बाबांलाःगु तुति दइ । वं अले सुं मनखं मयाथें बालंलक प्याखं नं हुलेसइ । तर अथे यायेबलय् व च्वामुगु तरवारया द्यःने न्यासि वनाच्वनाथें थाकुइ, पीडा जुइ । अथे हे वं व आत्मां वं धाथेंगु मतिनाया चुप्पा नलधाःसा, अले यदि व राजकुमारं वयात मतिना यात सा व इहिपा यातसा जक वया आत्मा वइ, गबलय् व राजकुमारया आत्मा वयागु आत्मालिसे बाःवनी ।
जादुगरनीनं लुमंक ाबिल, “अथे मजूसा व राजकुमारं मेम्ह मिसा बिहा यानाः मेगु सुथय् मचाम्ह न्यामिसा नुगः तज्यानाः सिइ अले व समुद्रया फिंजय् कुचाकुचा दलावनी । ”

मचाम्ह न्यामिसां धाथें व वासः त्वन अले राजकुमारयात नापलात । राजकुमारयात व नवायेमफुसां वया सुन्दरता खनाः आकर्षण यात । वयात व न्यामिसा प्याखं ल्हूगु स्वये यः उकिं वं थःत तसकं पिडा जूसां प्याखं हुल ।
दरवारय् जब व राजकुमारया अबुं वयात थः जःलाखःला जुजुया म्ह्याय्लिसे इहिपा या धाल । वं न्यामिसायात थ्व खँ कन , “जिं अथे यायेमखु छाय्धाःसा वं व राजकुमारी लिसे मतिना मयाना । ” थ्व खँ न्यना न्यामिसा व राजकुमारं थःत मतिना याना धाय धकाः च्वन तर वं ला द्यगलय् च्वंम्ह मिसायात जक मतिना याना धाल । वं थःत व हे मिसां वयागु ज्यान बचेयाःगु धकाः च्वनाच्वंगु खनी । वं वहे मिसा लिसे इहिपाया घोषणा याइ ।
राजकुमारया इहिपा जुल, उखे मचाम्ह न्यामिसाया नुगः तज्यात । वं राजकुमारया निंतिं न्यामिसाया जीवन त्वतागु व थाकुक प्याखं हुलागु पिडा कयागु लुमंकल । व दुखय् दुन अले थःगु मृत्यु पियाच्वन ।
वया ततापिन्सं वयागु नुगःया घाः सिउ । उमिसं थःगु ततःहाकःगु सँ बियाः समुद्री जादुगरनीयाके जादुइ चुपि कयाहल । उमिसं वयात धाल, “यदि छंं थ्व चुपिं राजकुमारयात सुयाः वयागु हिं थःगु तुति प्याकेखन धाःसा छ हानं न्यामिसा हे जुइ, वयागु दक्व दुख फुइ अले ल्यंदूगु जीवन लसतां जाइ । ”
सुथ जुइबलय् मचाम्ह न्यामिसां राजकुमारयाथाय् वन । तर वं थःः न्हूम्ह कलाःलिसे द्यनाच्वंम्ह राजकुमारयात स्यायेत तयार यायेफइमखु अले थःथःम्ह.समुद्रय् क्वब्वांवन ।
वयागु शरीर फिंजय् तना ला वन तर मदयावनी धाःसा मवं, बरु वं सुद्र्यया क्वाःजः काल, अले आत्मा जुल । व आः फय्या म्ह्याय् जुल । मेमेपिं फय्या म्ह्याय्पिन्सं धाल, “ छ अथे जुयावल छाय्धाःसा छं गबलें मसिइगु आत्मा जुइत फक्व मिहेनत या याःगु खः। आः छं ३००दँ तक बाबांलाःगु ज्या यात धाःसा छं थःगु आत्मा वं कायेखनी । छं छम्ह भिंम्ह मचा लुइकल कि छ दछि म्हो जक पिउसा गाइ । अले यदि छ ख्वल धाःसा छंगु छफुति ख्वबि हानं छं लछि यक्व पिइ माली । ”
अले थुकथं थःगु व अन्तय् द्यःया राज्यय् थाहाँ वन ।

च्वमि : हान्स क्रिस्चियन एन्डरसन
साभार : न्यामिसाया देसय्

Leave a Reply

Your email address will not be published. Required fields are marked *

This site uses Akismet to reduce spam. Learn how your comment data is processed.

%d bloggers like this: