बेलायतय् दकले न्हापांगु खुसिइ मोहनि नख: हन

झीगु संवाददाता
येँ कौलाथ्व अस्तमि । १८ दँ न्ह्यँ बेलायतय् दकलें न्हापा म्ह-पुजा हंगु पासा पुच: गुथि युके लण्डन थुगुसि हाकनं छक्व इतिहास च्वयेत: चू ला:गु दु। वंगु शनिबा: आश्विन २७ गते लण्डनय् थिथि थासय् च्वनाच्वंपिं ७०म्ह स्वया अप्व संस्कृतिप्रेमी नेपामिपिंत मुंकाः गुथिं दकलें न्हापा मोहनि नख: हन।
दशैं नापं हे लाइगु मोहनि नख:या नेवा: समुदाय दुने यक्व महत्व दु। यक्व नेपामिपिं च्वनावयाच्वंगु लण्डनया अल्पर्टन शहरय् जूगु उगु ज्याझ्वलय् गुथिया निम्ह न्वकु मयजूपिं मेनका श्रेष्ठ व रुक्मणी मानन्धर नं लसकुस न्वचु बियादिल। निदँ जक: क्यंम्ह मचानिसें ७० दँया वृद्धं तकं ब्वति कइदीगु उगु ज्याझ्वलय् ल्यूँ-छ्यान्जे भाजु अनिल महर्जनं ज्याझ्वया बारे जानकारी बियादीगु ख:सा मू-छ्यान्जे भाजु संदीप श्रेष्ठ व कासा छ्यान्जे भाजु सुमीर बज्राचार्य नं नेवा: व खय् भासं थिथि म्ये हालादिल।

गुथिया नाय: भाजु संयुक्त श्रेष्ठ नं बेलायतय् च्वनाच्वंपिं नेपामितय्‌गु छेँज: पिंसं थ:गु संस्कृतिया बारे सिइकेमागु खँ कनादिल। ज्याझ्वलय् ब्वतिकाइपिंसं लपतय् नेवा: भ्वय् नया न्ह्येपुइकादिलसा थिथि नसाया नितिं ग्वसा खल:यात ‘म:म: एण्ड रोटी’ ब्राण्डया भाजु बिनोद बराल व भाजु नरेश शर्मा न ग्वाहालि यानादिगु जुल। थुगु ज्याझ्व: सुथां लाक क्वचायेधुंका गुथिं थ्व हे वइगु नोवेम्बर ११ तारीख आइतबा: कुन्हु लण्डनया ओकिंगटन म्यानर स्कूल, वेम्बलीई न्हिनसिया ५ता ईलय् थुगुसिया म्ह-पुजा व नेपाल संवत् ११३९ न्हू दँ हनेगु घोषणा यागु दु।

Leave a Reply

Your email address will not be published. Required fields are marked *

This site uses Akismet to reduce spam. Learn how your comment data is processed.