नेपालभाषा सफूया अवस्था बारे सहलह जुल

झीगु संवाददाता ।
येँ, यंलागाः एकादसि । नेपालभाषां पिदनाच्वंगु सफूया आःया अवस्थायात कयाः थुकिया गुकथं विकास यायेफइ धइगु छगू ज्याझ्वः थौं शनिबार थन जुल ।

ज्याझ्वलय् च्वमि बसन्त महर्जनं नेपालभाषाया सफू नेपालय् सरकारी भाय् धुंकाः दकलय् यक्व पिहाँ वयाच्वंगु खःसां उकिया बजारीकरण व व्यवस्थापन बांलाक यायेमफयाः यक्व धयाथें सफूया विक्री बांलाः मजुयाच्वंगु खँय् केन्द्रित जुयाः संस्थायात गथेयानाः बांलाक न्ह्याकेफइ धइगु खँ तयादिल ।
वय्कलं अन हे संस्थां भविष्यय् यानावनेगु थी थी ज्याझ्वःया बारे नं जानकारी बियादिल ।
उकियालिसें नेवाः च्वमिपिं समयसापेक्ष अध्ययन मगाःगु, बजार मदुगु, समालोचना मजूगु अले च्वमिपिं स्वनिगःया परिवेशं व मेमेगु जातजातिलिसे अन्तरक्रिया मयाइपिं जूगुलिं वय्कmया बिचाःया चाकः तचाः जुइमफुगु धइगु नं वय्कःया बिचाः खनेदत ।

उकिया लिसः बिसें अन उपस्थित तुलसी मानन्धर, शम्भुमान श्रेष्ठ, राजभाइ जकःमि, राजेन मानन्धर, महेशमान लँजुवा व मेमेपिन्सं थःगु बिचाः तःगु खः ।

नेपालभाषा ख्यलय् दँय् दसं पिदनाच्वनीगु सफूयात ब्वँमिपिनिगु ल्हातिइ थ्यंकत संस्थां कुतः यानाच्वंगु आयोजकं धाःगु दु ।

ज्याझ्वः नेपालभाषा सफू सहकारीया ग्वसालय् जूगु खः ।

Leave a Reply

Your email address will not be published. Required fields are marked *

This site uses Akismet to reduce spam. Learn how your comment data is processed.