सत्यमोहन जोशीया वृत्तचित्र दयेकेगु ज्या न्ह्यानाच्वन

झीगु संवाददाता
यल, यंलागाः एकादसि । शताब्दी पुरुष डा. सत्य मोहन जोशीया जीवनया थी थी पक्षयात कयाः डिजिटल आरकाइभ दयेकेगु ज्या न्ह्यानाच्वंगु दु ।
वय्कःलिसे खँल्हाबल्हा जूगुया अधारय् वयकलं थी थी ख्यलय् थःगु अनुभव कनादीगुयात डिजिटल भिडिओ रेकर्डिङया यानाः उकिया १० घौ तःहाकःगु डिजिटल आरकाइभ देकयेगु ज्या लगभग दछि न्ह्यः शुरु जूगु खःसा आः उकिया छुं छुं खँ दृष्यांकन यायेमाःगु खँ उगु ज्या यानाच्वंगु पुचलं धाःगु दु ।

 

डिजिटल आरकाइभ दयेकेगु ज्या लगभग क्वचाःगु हे जुल । आः मगाः मचाःगु छतानिता खँ न्यनेकने याये ल्यंदनि, सत्यमोहन जोशी वृत्तचित्र निर्माण पुचःया कजि डा. पुष्पराज राजकर्णिकारं धयादिल ।

 

जोशीया उगु आरकाइभय् वय्कःया जीवनी, प्रशासनिक सेवा, कर्णाली क्षेत्रय् जूगु अध्ययन, साहित्य ख्यलय् योगदान, नेपाःया संस्कृतिया विविध पक्ष, नेपालभाषा ख्यः इत्यादि विषय् दुवालाः कनादिउगु दु धयातःगु दु ।

 

लिसें व हे दृष्य सामाग्रीया आधारय् दयेकेगु करिब ४५ मिनेटया वृत्तचित्र नं याकनं हे पिदनीगु नं वय्कलं कनादिल ।
वृत्तचित्रया ज्या व उकियात माःगु आर्थिक सहयोग मुनेगु ज्या नापनापं न्ह्यानाच्वंगु दु । फुफुपिन्सं फुफुकथं ग्वहालि नं यानाच्वंगु दु । थ्व लसताया खँ खः, वय्कलं धयादिल ।

 

थ्व हे झ्वलय् आः दयेकाच्वंगु वृत्तचित्रया छुं छुं दृष्यतयाः बःचा हाकःगु रुप वा प्रोमो नकतिनि हे पितबिउगु दु ।

वृत्तचित्रया निर्माण सुनिता राजभण्डारीं व स्क्रीप्ट लेखन डा. राजकर्णिकारं यानादिउगु दु ।

वृत्तचित्रया प्रोमो थन स्वयादिसँ

Leave a Reply

Your email address will not be published. Required fields are marked *

This site uses Akismet to reduce spam. Learn how your comment data is processed.