ख्वपय् सिद्धिदास लुमंकल

झीगु संवाददाता

ख्वप, यंलागा चौथि । भाषा म्वाःसा जाति म्वाइ धकाः नेवाःतय्त छगू शताब्दि न्ह्यःहे थनेत स्वयादीम्ह महाकवि सिद्धिदास महाजुया बुन्हि थी थी च्वमिपिन्सं थःगु रचना ब्वनाः हन ।

 

थौ जूगु महाकवि सिद्धिदासया १५१दँ बुन्हिया लसताय् जूगु साहित्य मुँज्याय् थ्यंमथ्यं झिंन्याम्ह साहित्यकारपिन्सं थःगु रचना ब्वनादिल ।

 

ज्याझ्वलय् नवासें वरिष्ठ कवि योगेन्द्र प्रधानं नेपालभाषा साहित्य क्षेत्रय् न्हून्हूगु पलाः खनेदयाच्वंगुलिइ लसता प्वंकादिल ।

 

भाषिक अभियन्ता त्रिरत्न शाक्यं भाषायात समृद्ध याइगु साहित्यं हे खः धकाः जोड बियादिल । लिसें वय्कलं चन्द्र समशेर थज्याःम्ह कट्टर राणा शासकया पालय् सतिप्रथा दनिबलय् हे विधवा विवाहयात च्वछायाः सत्यसती थज्याःगु खण्डकाव्य च्वयाः साहित्य रचना मार्फत सामाजिक क्रान्ति याःगु नं लुमंकादिल ।

 

नरेन्द्रभक्त हाडां नेपालभाषा व उकिया साहित्य थौं थ्व अवस्थाय् तक थ्यनेगुया लिउने महाकवि महाजुया योगदान लुमंकुसें वय्कःयात सम्मान मयात धाःसा झी नेवाः जुयाया सार्थकता दइमखु धयादिल ।

 

समालोचक वंशी श्रेष्ठं ख्वपय् सिद्धिदासया संग्रहालय दयेकेगु पाखे पलाः न्ह्याकेमाःगु सुझाव तयादिल ।

 

ज्याझ्वलय् च्वमिपिं श्याम आशा, पूर्ण वैद्य, राजा शाक्य, सौरभ शाक्य, मोक्ष बहादुर अमात्य, राकेश महर्जन, राजेन मानन्धर आदिपिन्सं थःथःगु रचना ब्वनाः न्यंकूगु खः ।

ज्याझ्वः सिद्धिदास प्रतिष्ठान ख्वपं ग्वसाः ग्वःगु खः ।

Leave a Reply

Your email address will not be published. Required fields are marked *

This site uses Akismet to reduce spam. Learn how your comment data is processed.