नेवाः सूचना केन्द्रया दँ मुँज्या क्वचाल

झीगु संवाददाता

यल, यंलाथ्व त्रियोदशी । नेवाः ख्यःया ज्याझ्वः फयांफतले मल्वाकेगु तातुनाः नीस्वंगु नेवाः सुचना केन्द्रं थौं न्हापांगु दँ मुँज्या यात ।
सक्वया सामाजिक अभियन्ता राजदास श्रेष्ठं नेवाःत राजनीतिक रुपं विभाजित जुयाः अले राजनीति धइगु नेवाःतय्गु हीतया लागि जुइमाल धइगु चेतना मवःगुलिं न्ह्याक्व हिउपाः वःसां नेवाःत नीति निर्माणया ख्यलय् वनेमफयाच्वन धयादिल ।
वय्कलं राजनीतिक पार्टीइ सक्रिय जुयाच्वंपिन्त पार्टीया भिं स्वयेगु त्वःताः थःगु समाजया भिं स्वयेत इनाप यानादिल ।

नेवाः न्ह्यलुवा डा. महेशमान श्रेष्ठं आन्तरिक आप्रवासन अप्वयावयाच्वंगुलिं थनया आदिवासी नेवाःतय्त थी थी समस्या वयाच्वंगु धासें थुकिया प्रतिकार यायेत नेवाःत सचेत जुइमाःगु धयादिल ।

उकियालिसें वय्कलं नेवाः राजनीति रुपं संगठित जुइममफुगुलिं नेवाःतय्सं न्ह्याक्व हे आन्दोलन याःसां थुकिया फाइदा न्ह्याबलें खय् बरमूतय्सं जक काःगु खँ नं लुमंकादिल ।

 

नेवाः देय् दबूया नायः नरेश ताम्राकारं नेवाःत राजनीतिक रुपं सक्रिय जुयाः न्ह्यनेवयेमाःगु खँ कनादिल ।
केन्द्रया संयोजक राजेन्द्र रंजितं केन्द्र नेवाःतय्गु थी थी ज्याझ्व छगु हे इलय् जुयाः ब्वतिकाइपिन्त मछिंगुलिं ज्याझ्वः मल्वायेमा धकाः नीस्वनागु अले नेवाः खलःपुचःपिनिगु सकारात्मक ग्वहालि वयाच्वंगु खँ कनादिल ।

 

ज्याझ्वलय् केन्द्रय् थःगु ज्याझ्वःया जानकारी बिउगु संस्थातय्त सुभाय्पौ नं द्यछाःगु खः ।

Leave a Reply

Your email address will not be published. Required fields are marked *

This site uses Akismet to reduce spam. Learn how your comment data is processed.