येँया महोत्सव येँयाः

श्रीकृष्ण महर्जन 

येँया मौलिक नखः येँयाः खः । येँयाः नाप स्वाःगु थीथी कथंया संस्कृति सुरु जूगु विषययात न्यंकं बाखंत दु । न्यंकं बाखं कथं स्वर्गय् इन्द्रया मांयात अपसं च्वनेगु नितिं पालिजाः स्वां माःगु अले येँया मरु सतः लागाय् वया पालिजाः स्वां इन्द्रं खुया काःगु जुया ज्वना चिनातःगु खः धाइ । थ्व हे बाखंया आधारय् इन्द्रजात्रा सुरु जूगु कथं नालातःगु दु ।

 

अथे हे इन्द्र जात्राया झ्वलय् तत्कालिन अवस्थाय् येँया जुजु जयप्रकाश मल्लयात षडयन्त्र याना अपदस्त याःगु अवस्थाय् वय्कःया प्यदू दुम्ह काय्यात गद्दिइ तयाः कुमारी जात्रा सुरु याःगु कथं नालातःगु दु । लिपा पृथ्वी नारायण शाह नं नेपाः एकिकरणया नमाय् येँयाःया क्वनेयाः खुन्हु दिनय् हे षडयन्त्रमुलक कथं आक्रमण याना त्याकाः थः राजगद्दिइ च्वने धुंकाः हाकनं कुमारी जात्रा न्यायेके बिउगु धकाः धाइ । थुगु कथं ऐतिहासिक घटनानाप नं स्वानाच्वंगु येँयाः थौंया इलय् छगू तःधंगु उत्सवया रुपय् न्ह्यानाच्वंगु दु । येँय् दसं वइगु येँयाः मू आकर्षण धइगु कुमारी, भैरव व गणेशया रथ जात्रा खःसां नं मेमेगु कथंया यक्व हे गतिविधि नं जुयाच्वंगु दु । इलय् ब्वलय् थीथी कथंया सांस्कृतिक गतिविधि थप यायेगु ज्या जुयाच्वंगु दुसा अथे हे गुलिं गुलिं सांस्कृतिक व धार्मिक ज्याझ्वः दिना तकं वने धुंकूगु अवस्था दु । येँयाःया इलय् मूल रुपं केन्द्रविन्दु जुइगु लागा धइगु हनुमानध्वाखानिसें बसन्तपू तक खः । येूयाः सुरुंनिसें अन्तिम दिं तकं बसन्तपूनिसें हनुमानध्वाखा लागा तक केन्द्रविन्दु जुइ । अले क्वनेयाः कुन्हु न्हूघः लागा खःसा थःनेयाः कुन्हु वंघः लागा अले नानिचायाः कुन्हु धाःसा किलाघः लागा खः ।

 

दीप्याखं
येँयाः सुरु जुइगु संकेत धइगु दीप्याखं खः । किलाघःया ज्यापुतय्सं क्यना वयाच्वंगु थुगु प्याखंयात देवी प्याखं नं धायगु याना वयाच्वंगु दु । ञलाथ्व सप्तमीया चान्हय् अर्थात अष्टमीया सुथय् दक्ले न्हापां किलाघःया ज्यापुतय्सं किलघः कुमारीयात न्ह्यःने तया किलाघः लागाय् दीप्याखं क्यनेमाःगु चलन दु । खिं बाजंया तालय् भैरव, कुमारी, चन्दी, दैत्य, कवं, बेत्ता, ख्याःया दुगु थुगु प्याखनय् मूल रुपं कुमारीं दजैत्ययात बध यायेत स्वइगु इलय् दबुलिं दैत्य विस्युं वनीगु खः । अथे हे कवं व ख्याकं धाःसा स्वकुमिपिन्त न्ह्याइपुकेगु ज्या याइ । अथे हे येूया हनुमानध्वाखा लागाय् यःसिं थनीगु ई अर्थात ञंलाथ्व द्वादशी खुन्हु नं दीप्याखं अन हुइकेमाःगु चलन दु । उगु हे कथं क्वःने याः अर्थात ञंलागा चर्तुदशी खुन्ह कुमारी, भैरव व गणेशया रथ सालाः हइगु इलय् क्वने लागाया न्हूघः लागाया दबुलिइ प्याखं क्यनेमाःगु चलन दु । येँयाःया झ्वलय् थनेयाः खुन्हु अर्थात ञंलागा पुन्हि खुन्हु वंघः आजुद्यया न्ह्यःने दीप्याखं क्यनेमाःगु चलन दु । अथे हे नानिचायाः खुन्हु किलाघः लागाय् दीप्याखं क्यनेमाःगु चलन दु । क्वनेयाः, थनेयाः व नानिचायाःया झ्वलय् गुगु थाय्यात केन्द्रविन्दु नालातःगु खः उगु थासय् कुमारी, भैरव व गणेशया रथ थ्यनीगु इलय् उगु कथंया प्याखं क्यना च्वनेमाःगु चलन दु ।

 

यःसिं
येँयाःया छगू महत्वपूर्णगु पक्ष धइगु यःसिं खः । ञंलाथ्व दुतिया खुन्हु साइट स्वया येूया साय्मित हनुमानध्वाखाया नासः द्यः दुगु चुकय् वनेमाःगु चलन दु । अन यःसिं काःवनीपिन्त बेतलिं चिका सिन्हः तिका बिधाई यायेगु याइ । गुरुजुया पल्टन सहित नालाया यःसिं गुूइ वनेगु याइ । यःसिं गुूइ वना कन्हय् खुन्हु निपाः ल्हाःतं ज्वने मफुगु अले तप्यंगु थ्यंमथ्यं स्वीनिकू हाकःगु सिमा ल्येगुयाइ । उगु सिमायात पूजा याना दुगु छम्ह बलि बिइगु तकं याइ । अले लुूपा वहःपापाखें उगु सिमा पालेगु भाय् याइ । अनं लिपा जक पां पालेगु याइ । अनं लिपा उगु यःसिंम्ह हस्ते हाइस्ते याना सलाः हइ । अथे यःसिं सालाः हया ख्वप, थिमि जुया येँयाः भोटाहिति लागय् यंकेमाःगु चलन दु । यःसिं गुं हःगु यःसिंयात चिकं पाना द्यःया रुपय् भोटाहितिइ थ्यंका पूजा यायेगु नं ज्या जुइ । अले ञंलाथ्व अष्टमी खुन्हु साइत स्वया यःसिंयात गुरुजुया पल्टन सहित नगरय् प्रवेश याकी । अले हनुमानध्वाखय् थ्यंकी । अथे नगरय् यःसिं दुत यंकेगु ज्या मजूतले हनुमानध्वाखाय् यःसिं काःवंपिं साय्मित हनुमानध्वाखाय् दुहां वने मजिउ धाइगु मान्यता दु । येूयाःया झ्वलय् ञंलाथ्व द्वादशी खुन्हु साय्मितय्सं हनुमानध्वाखाय् यःसिं थनेगु याइ । गबले यःसिं थन अबलेनिसें येूयाः सुरु जुल धायेगु याना वयाच्वंगु दु । येूयाःया हे झ्वलय् ञंलागा तृतिया खुन्हु अर्थात येूयाःया अन्तिम दिनय् यःसिं क्वःथलेगु याइ । कुमारी, भैरव व गणेशया रथ क्वनेयाः चाःहिइका हया हनुमानध्वाख लागाय् जात्रा क्वचाये धुंकाः जक अथे यःसिं क्वःथलेगु याइ । अले यःसिंयात साला यंकाः खुसिइ विषर्जन याइगु चलन दु ।
थीथी भैलः द्यःया प्रदर्शन

 

स्वच्छन्द भैरव ब्वज्या
यःसिं हनुमानध्वाखाय् थनेगु ज्या जूगु हे दिं अर्थात ञंलाथ्व द्वादशीया दिनय् हनुमानध्वाखाया गद्दि बैठक न्ह्यःने स्वच्छन्द भैरवया मूर्ति पूजा आजा याना प्रदर्शन याइगु चलन दु । उखुन्हुनिसें लगातार रुपं येूयाःया अन्तिम दिं तक नं स्वच्छन्द भैरवया मूर्ति प्रदर्शन यानातइ ।

 

स्वेत भैरव
यःसिं थंगु दिनय् हे हनुमानध्वाखया स्वेत भैरवया आकर्षक मूर्ति नं ब्वज्या सुरु जुइ । थीथी कथंया तिसां तिइकाः अथे मूर्ति ब्वज्या याइगु खः । यःसिं थनीगु कुन्हु हे बहनी स्वेत भैरवयात विशेष कथंया पूजा आजा याना बहनी हाथु हायेकीगु चलन दु । हाःगु थ्वँ अर्थात थ्वँ हायेकीगु जुया हे उकियात हाथु हायेकेगु धाइगु खः । उखुन्हु स्वेत भैरवया पुजारीतय्सं समेबजि तकं बिइगु चलन दु । अबले ल्यासे ल्यायेम्हतय्सं लाछकू वयेक समेबजि धकाः समेबजि कायेगु तकं याइ । अले गुलिं गुलिसिनं हाथु त्वनेगु तकं याइ । च्यान्हु तक लागातार रुपं अथे प्रदर्शन याइगु खः ।

 

इन्द्र ब्वज्या
यःसिं थंगु दिनय् हे मरु सतः न्ह्यःने इन्द्रया मूर्ति ब्वज्या नं याइ । बाखं कथं पालिजाः स्वां खुयाः काःम्ह धकाः इन्द्रयात चिना सकलसिनं खने दयेक खः हे ग्वयाः अथे प्रदर्शन याना तइगु खः । अथे हे वंघः नापं थीथी थासय् तकं उखुन्हुनिसें हे इन्द्रयात ब्वज्या यायेगु सुरु याइ ।

 

थीथी आजुद्यः ब्वज्या
यःसिं थने धुंकाः उखुन्हु हे येँया थीथी थासय् थीथी आकृतिया आजु द्यःयात नं ब्वज्या सुरु याइ । अले न्हिया न्हिथं पूजा यायेगु तकं याइ । गनं गनं सिूयागु अले गनं गनं धाःसा चायागु आजु द्यः ब्वइगु नाप नापं हाथु हायेकेगु तकं याइ ।

 

पुलुकिसि प्याखं
येँयाःया छगू आकर्षक जुयाच्वंगु प्याखं धइगु पुलुकिसि प्याखं खः । किलाघःया स्थानीयवासीतय्सं प्याखं ल्हुइका वयाच्वंगु पुलुकिसि नं यःसिं थंगु दिनंनिसें हे न्हिया न्हिथं पिकाइगु खः । इन्द्रं तुयुम्ह किसि गयाः येूय् पालिजाः स्वां खूवःगु खः धकाः बाखंया आधारय् हे अथे तुयुम्ह किसियात चाःहिइकेगु याना वयाच्वंगु खः । पंयागु चिचीबाला जुइक दयेकातःगु पंबालायात पुलु धाइगु खःसा व हे पुलुं दयेकातःगु किसि जुया हे पुलु किसि धाःगु खः धाइ । अले पुलु किसिया दुने मनूत च्वना धाः बाजंया तालय् मूस्याः च्याका न्ह्याइपुक प्याखं ल्हुइका हया बहनी जुइवं हनुमानध्वाखा लागा नापं बसन्तपू लागाय् तकं यंकेमाःगु चलन दु । पुलुकिसि येँयाःया झ्वलय् कुमारी, गणेश व भैरवया रथ जात्रा न्ह्यः न्ह्यः यंकेमाःगु चलन दु । पुलुकिसि प्याखं नं येूयाः क्वचाइगु दिन तक हे न्हिया न्हिथं हे पिकया हनुमानध्वाखय् यंकेमाःगु चलन दु ।

इलय् ब्वलय् थीथी कथंया सांस्कृतिक गतिविधि थप यायेगु ज्या जुयाच्वंगु दुसा अथे हे गुलिं गुलिं सांस्कृतिक व धार्मिक ज्याझ्वः दिना तकं वने धुंकूगु अवस्था दु ।

 

सवःभकु प्याखं
यःसिं थंगु दिनंनिसें हे हल्चोया पुतवार समुदायपाखें येूयाःया झ्वलय् सवःभकु प्याखं पिकायेगु याइ । थुगु प्याखंयात भैरवया प्याखं नं धायेगु याना वयाच्वंगु दु । बाजंया ताल हे घिन्दलि सिन्ताङ धकाः थाइगु जुया पुलां पुलांपिंम मनूतय्सं थुगु प्याखंयात घिनदलि सिन्ताङ प्याखं नं धायगु याना वयाच्वंगु दु । थुगु प्याखनय् मूल रुपं सवः, भकु व भैरव याना स्वम्ह प्याखंम्वःत दइ । थ्व ख्वाःपाः प्याखं खः । थुगु प्याखं नं येँयाःया अन्तिम दिं तक नं न्हिया न्हिथं पिकायेमाःगु नापं हनुमानध्वाखा लागाय् यंकेमाःगु चलन दु । अले येँयाःया झ्वलय् क्वनेयाः, थनेयाः नापं नानिचायाः कुन्हु रथ जात्रा न्ह्यः न्ह्यः क्यना वनीगु चलन दु ।

 

लाखे प्याखं
येँया न्हूघः लागाया लाखे छेँय् नं पिकाइम्ह लाखे धइगु मजिपाः लाखे खः । मजिपाःया लाखे जूगुलिं थुम्ह लाखेयात मजिपाः लाखे नं धायेगु याना वयाच्वंगु दु । यःसिं थनीगु दिनय् लाखे छेँय् पूजा याना उखुन्हुनिसें हे लाखे प्याखं नं पिथनेगु याइ । तसकं ग्यानपुसे च्वंगु नापं आकर्षक जूगु लाखेया ख्वाःपाः पुया हुइकीगु उगु प्याखनय् छम्ह झ्यालिंचा नं दइ । लाखे व झ्यालिंचाया दथुइ म्हता म्हिताः प्याखं क्यनेगु याइ । मजिपाः लाखे नं येूयाःया झ्वलय् जक पिकाइगु खः । अले क्वनेयाः, थःनेयाः नापं नानिचा याःया इलय् कुमारी, भैरव, गणेशया रथ न्ह्यः न्ह्यः लाखे प्याखं ल्हुइका यंकीगु चलन दु ।

 

महांकाल प्याखं
येँयाःया झ्वलय् हे यःसिं थंगु दिनंनिसें ख्वपपाखें हनुमानध्वाखाय् महांकाल प्याखं क्यंवयेमाःगु चलन दु । थीथी द्यःया ख्वाःपाः पुया हुइगु थुगु प्याखं द्यः प्याखं खः । सांस्कृतिक बाजंयात तालय् महालक्ष्मी, महाकाली व कुमारीया प्याखं क्यनेगु याइ । थुगु प्याखं नं येूयाः क्वमचातले हे बहनी बहनी हनुमानध्वाखा लागाय् क्यनेमाःगु चलन दु ।

 

दश अवतार
यःसिं थंगु दिनय्े हे बसन्तपुरया कुमारी छेँ लिक्क च्वंगु देगय् दस अवतार क्यनेगु याइ । विष्णुया थीथी कथंया झिगू अवतारयात न्हिया न्हिथं क्यनीगुयात हे दश अवतार क्यनेगु धाइ । मत्स्य अवतार, बराहा अवतार, वामन अवतार लागायत विष्णुया झिगू अवतार धकाः मनू हे द्यः जुया क्यनेगु चलन दु ।

 

ग्वरः च्याकीगु
यंलागाः द्वादशीया दिनंनिसें न्हिया न्हिथं हनुमानध्वाखा लागाय् मत च्याकीगु चलन दु । ग्वरः मत च्याकीगु जुया उगु मतयात ग्वरः मत धइगु खः । जात्राया इलय् छगू कथं जः बिइत नापं बांलाकेगु नितिं अथे ग्वरः मत च्याकेगु याना वयाच्वंगु खः धाइ । सिूयागु देगः थें दयेका प्वाः प्वाचाय् पाल्चाय् इताः तया च्याकीगु मतयात हे ग्वरः मत धइगु खः । थुगु कथंया मत नं येँया ज्वःछि हे च्याकीगु खः ।

 

बाखादे आजु
येँया वंघः लागां पूर्वपाखेयाम्ह आजु द्यः धाइगु बाखादे आजु खः । विशेष याना साय्मितय्सं थःपिनिगु पूर्खा कथं नालातःम्ह बाखादे आजुयात ञंलागा द्वादशीया दिनय् बहनी वंघः आजुद्यःया न्ह्यःने पूर्वपाखे स्वका थापन याइगु खः । विधिपूर्वक पूजा याना तुयुगु कापतं त्वःपुया आजुद्यःया ख्वाःपाः पित यंकीगु अले खतय् तया ब्वज्या याइगु खः । अबले हाथु हायेकेगु नाप नापं समेबजि तकं बिइगु याइ ।

 

कुमारी तलेजुइ प्रवेश
यंलाथ्व द्वादशीया दिनय् हे कुमारीयात कुमारी छेँय् नं तलेजुइ यंकेमाःगु चलन दु । तलेजुइ यंकाः विशेष कथं पूजा आज याइगु चलन दु । येूयाःया झ्वलय् कुमारयात जात्राय् आमन्त्रण यायेगु कथं अथे पूजा याना वयाच्वंगु खः धाइ ।

 

वंघः आजु
यंलाथ्व द्वादशीया चान्हय् वंघलय् वंघः आजु ब्वज्या यायेमाःगु चलन दु । आकश भैरव नं धायेगु याना वयाच्वंगु वंघः आजु धाइगु अनया ज्यापुतय्गु पुर्खा धकाः धाइ । वंघः आजुया द्यःछेँय् नं मूर्ति लिकया खतय् द्यःने तया पूर्वपाखे स्वका थापना यायेगु याइ । अथे वंघः आजु खतय् द्यःने थापना याये धुंकाः हाथु हायेकेगु नं याइ । वंघः आजु व बाखादे आजुया मिखा चूलाके मजिउ धाइगु मान्यता दु ।

 

उपाकु वनीगु
यंलाथ्व द्वादशी कुन्हु हे दच्छिया दुने मदुपिं मनूतय् छेँजःपिं उपाकु वनीगु चलन दु । येूया थीथी चैत्य नापं पीगं द्यःयाथाय् पजुया याना वनेगुयात हे उपाकु वनेगु धाइगु खः । मरु ख्यः क्यब, चसांद्वू, कंगः, न्यत, थूहिति, कमलादी, भोताहिति, महाबौद्ध, धरहरा, गणबहाल, न्हूघः, भिंन्द्यः लगायतया थासय् चाःहिला हाकनं मरुख्यः क्यबय् हे क्वचायेकीगु चलन दु ।

 

बलं भ्वय्
कुमारी जात्राया झ्वलय् कुमारी, भैरव व गणेद्यःया रथ सालीपिं नापं रथ नाप स्वापू दुपिं गुथि नापं गुथियारपिन्त जक कुमारी छेूय् नकीगु भ्वय् हे बलं भ्वय् खः । बल पिकायेगु अर्थात बलया नितिं नकीगु कथंया भ्वय् जुया हे सायद् बलं भ्वय् धाःगु खइ । उगु भ्वय् कुमारी जात्रा अर्थात क्वनेयाःया छन्हु न्ह्यः बहनी नकीगु भ्वय् खः ।

 

क्वने याः
येूयाःया झ्वलय् ञंलाथ्व चर्तुदशी खुन्हु क्वनेयाः खः । राष्ट्र प्रमुखया उपस्थितिइ बसन्तपू लागांनिसें हे क्वनेयाः सुरु जुइगु खः । गणेश, भैरव व कुमरीया रथ साला क्वनेपाखे यंकीगुजात्रायात हे क्वनेयाः धाइगु खः । रथ जात्रायात न्हूघः, ब्रम्हत्वाः, हिउमत जुया चाःहिइका हाकनं बसन्तपुलिइ हे थ्यंकीगु चलन दु । अबले गुरुजुया पल्टन थाना यंकीगु खःसा वसिबें न्ह्यःन्ह्यः सवः भकु प्याखं ल्हुइका, पुलुकिसि प्याखं ल्हुइका नाप नापं लाखे प्याखं ल्हुइका यंकीगु खः । द्वलंद्वःम्ह मनूतय्गु उपस्थिति दइगु थुगु इलय् थीथी कथंया सांस्कृतिक बाजं तकं थाना यंकीगु चलन दु । उकुन्हु ह्यूमत लागाय् कलात्मक ह्यूमत छेँय् मत हिइका तइगु खः । अथे मत हे हिइका तइगु जुया हे उगु लागायात हिउमत धाःगु खः ।

 

दागिं
येँयाःया झ्वलय् जब क्वःनेयाः क्वचायेका बसन्तपुलिइ रथ जात्रा थ्यनी अबले मरु सतः लागां पिकाइगु छगू महत्वपूर्णगु संस्कृति खः दागिं पिकाइगु । दागिं धइगु इन्दया मां खः । बाखं कथं इन्द्र पालिजाः स्वां काःवःम्ह स्वर्गय् मवयाः इन्द्रया मां हे वया इन्द्रयात माःवःगु खः धाइ । तुगुगु ख्वाःपाः पुयातःम्ह दागि नाप नापं अबले दच्छिया दुने मदुपिं मनूतय् छेूजःपिं तकं गुता बीबः ह्वला नाप नापं वनीगु चलन दु । अथे दागिं दक्ले न्हापां थःने लागाय् चाःहिलीगु चलन दु । अनं लिपा हाकनं क्वने लागा चाःहिला मरु सतः लागाय् हे वया क्वचायेकी ।

 

बौमत
बौमत भइगु विशेष प्रकारया मत खः । मरु सतलं पिकइगु उगु मत धइगु पं बालय् पाल्चा च्याका वनीग मत खः । तसकं ताःहाकः जुइक पंया बालाय् तया मत च्याका वनीगु हे बौमत खः । इन्द्रयात मांमं जक मखु बाम्हं नं माःगु अले अबले मत च्याका माःवंगु जुया हे बौमत धाःगु धाइ । जब दागिं थःने लागा चाःहिलाः क्वने लागाय् वनी अले बौमत धाःसा थने लागाय् वनी । साय्मितय्सं पिकाइगु थुगु बौमत व दागि नापलाके मजिउ धइगु मान्यता दु । बौमत थःने लागाय् चाःहिलाः क्वने लागा नं चाःहिली । अले मरु सतः लागाय् हे वया बौमत नं क्वचायेकीगु चलन दु ।

 

थःने याः
येँयाःया झ्वलय् थःनेयाःया कन्हय् खुन्हु क्वःने याः खः । ञंलाथ्व पुन्ह खुन्हु थःने याः खः । क्वनेयाः कुन्हु थें हे थःने याः कुन्हु नं सवभकु, लाखे, पुलुकिसि प्याखंया ल्यूल्यू गणेश, भैरव व कुमारीया रथ साला यंकीगु खः । सांस्कृतिक बाजं थाना न्ह्याइपुक जात्रा याइगु झ्वलय् थनेयाःया झ्वलय् जब रथ जात्रा वंघलय् थ्यनी अबले वंघः आजु द्यःयाथाय् हाथु हायेकीगु चलन दु । येँयाःया झ्वलय् थनेयाः नं बसन्तपुलिं सुरु याना थाय् थासय् चाःहिइका बसन्तपुलिइ हे थ्यंकाः क्वचायेकीगु खः ।

 

नानिचायाः
येँयाःया झ्वलय् ञंलागा तृतिया कुन्हु नानिचा याः । थुगुन्हु नं बसन्तपुलिंनिसें हे सांस्कृतिक बाजं थाना न्ह्याइपुक रथ जात्रा याइगु खः । लाखे, सवःभकु, पुलुकिसि प्याखं ल्यूल्यू सालाः यंकीगु नानिचा याः खः । विशेष याना किलाघः लागवायत केन्द्रविन्दुया रुपय् नालातःगु दु । उखुन्हु किलाघः लागाय् चाःहिइका बसन्तपुलिइ हे हया क्वचायेकीगु चलन दु । नानिचा याः हे येँयाःया दक्ले लिपांगु दिं खः । नानिचा याः क्वचाःगु दिनय् हे येँयाः क्वचाइगु खः । लिपांगु इलय् वया नेपाल संवत ११३४ सं निसें नानिचा याः कुन्हु मिसापिन्सं कुमारी, भैरव व गणेद्यःया रथ सालेगु यानाहःगु दु ।

 

लोप जुइधुंकूगु स्वंगू प्याखं
येँयाःया झ्वलय् न्हापा न्हापा क्यना वयाच्वंगु स्वंगू प्याखं धाःसा लोप जुइ धुंकूगु दु । ज्याथाया प्रजापतितय्सं क्यना वयाच्वंगु दी प्याखं थनि निगू दशक न्ह्यःनिसें दिनाच्वंगु दु । किलाघःया ज्यापुतय्सं क्यना वयाच्वंगु थेंजाःगु हे द्यःया प्याखं न्हापा न्हापा ज्याथाया प्रजापतितय्सं क्यना वयाच्वंगु खः । उगु प्याखंयात त्रिपुरासुन्दरी प्याखं नं धायेगु याः । अथे हे असंया उरायत नापं ओमबहाःया बज्राचार्य शाक्यतय्सं क्यना वयाच्वंगु कुम्वः प्याखं नं लोप जुइ धुंकूगु अवसथा दु । कुमारया उगु प्याखं धइगु थनि निगू दशक न्ह्यःनिसें क्यनेगु दिना वयाच्वंगु प्याखं खः ।

 

न्ह्यागु हे जूसां आखिर येँयाः येँया छगू म्हसीका जुयाबिउगु दु । जीवन्त नापं अमूर्त संस्कृतिया रुपय् धस्वानाच्वंगु येँयाःया झ्वलय् थीथी कथंया सांस्कृतिक ब्वज्या जुइगु, नापं थीथी कथंया प्याखं क्यनेगु ज्या तकं जुइगु जुया येूयाः धइगु येूया छगू तःधंगु महोत्सव जुयाबिउगु दु धाःसां छुं पाइमखु । उकिं येँयाः धइगु येँया महोत्सव धायेछिं ।

 

Leave a Reply

Your email address will not be published. Required fields are marked *

This site uses Akismet to reduce spam. Learn how your comment data is processed.