जिगु हाइकु सम्वन्धि धापू

डा. आनन्द जोशी
प्राकृतिक दृश्य, वातावरणीय स्थिति (ह्रास व संरक्षण), जीवनया प्रसंग, जीवनय् घटे जुइगु घटना, मानवीय क्रियाकलाप आदि पाखें बुइगु अन्तर अनुभूतियात गथे कविं अनुभव याःगु खः, अथे हे खँग्वःलं अभिब्यक्त यायेगु हे हाइकु खः । मेखतं धायेगु खःसा अनुभूतिया चरमक्षणया कविता खः — हाइकु ।
…………. …… ……. …….
हाइकुलय् थम्हं खंगु, थंम्हं भोगेयानागु, थम्हं अनुभव यानागु खँ अभिव्यक्त जुइमाः, थ्व ब्वनिबलय् ब्वमिं नं व हे खँ, व हे दृष्य, व हे घटना वा अन्तर सम्वन्ध वा अन्तर प्रतिक्रिया न्ह्यःने दं वः थें, थम्हं हे खनाथें, थम्हं हे भोगेयानाथें आभाष जुइमाः, चेतना थनाः विइमाः । थ्व जुइत हाइकुलय् दकसिबे दयेमाःगु ला कविता खः, कविताहीन हाइकुु छपाः भ्वं जक सावित जुइ ।
……. ……. …… …… …… …….
जिं स्वये – कविं च्वइगु हाइकु मि खः, थ्वं भौतिक रुपं ला पुइ मखु । तर व हे मिं झी दुने चेतना थनाः न्ह्यपुइ तरंग हयाबिइ । थ्व हे हाइकुया सफलता खः ।
… …… ……. ……. …… …… …….
“थौंया हाइकु” थौंया किपाः खः । थौंया मनुखं खंगु, अनुभव यानाच्वंगु अवस्था, जिन्दगीया संघर्ष, प्रगतिया कुतः, कन्हय्या प्रति आस्था, कन्हय्या सम्पन्न लँया खोजयात प्रतिनिधित्व यायेत दनावःगु अभियान खः – “थौंया हाइकु” । जीवन, लकस व विकासया दथुइया स्वापू सशक्त रुपं कायम यानाः न्ह्याःवनेत बूगु, ब्वलंगु पलाः खः – “थौंया हाइकु” ।
… ……. ……. …… …… ……. …….
म्हिगःया वातावरण, अवस्था व म्वायेगु लँपुया घेरां पिहाँ वयाः परम्परागत हाइकुया विभिन्न विशेषतायात अस्वीकार यानाः वा ई अनुरुप हिइकाः “थौंया हाइकुं” चकनेत सर्गः माःगु दु ।
………. …….. …….
ने. स ११३०य् “खँग्वः सीमाहीन ः सीमाहीन जि” हाइकु सफू प्रकाशनँ निस्ये नेपालभाषाया हाइकु धाः न्हुगू दिशा पाखे न्हयावंगु दु । थ्व धाःया थौंतकया प्रगतियात मूल्याकन यानास्वयेबलय् हाइकु झीगु जीवनया छगू अभिन्न अंग सावित जुजु वनाच्वंगु खनेदु । थ्व धाःयात विकास याना वनेगु लँय् थौंकन्हे न्हू न्हूगु जीवन्त विम्व व न्हूगु दृष्टिकोणं जीवन, लकस व विकासया विभिन्न पक्षयात न्हूपिं हाइजिनतय्सं अभिव्यक्त याना वनाच्वगु क्रम गर्वया खँ खः ।

Leave a Reply

Your email address will not be published. Required fields are marked *

This site uses Akismet to reduce spam. Learn how your comment data is processed.