गुलि न्ह्यइपु नेपालभासाया साहित्यकार जुइगु !

 

दर्शन शाक्य

गुलि न्ह्यइपु नेपालभासाया साहित्यकार जुइगु,
न्ह्यागु च्वःसां वाहा वाहा धाइ,
छ झ्वः हे जक छाय् मजुइमा,
स्व झ्वः हे जक छाय् मजुइमा,
लाइकया बाहार वइ ।

बांमला धाःल धासा,
च्वःपिंत हःपा मब्यु धाइ,
भचा भिंकेत स्वःसा,
छं हे जक स्युला धाइ,
गुलि न्ह्यइपु नेपालभासाया साहित्यकार जुइगु् ।

न्हूगु बिचार गुब्लें बिइमाःगु हे मखुत,
व हे छम्ह मिसाया रंग, रुप व मतिनाया चर्चा,
चान्हे न्ह्यः मवः छंगु रुप स्वयाः….
अझं च्वइपिं दु निम्ह मस्तय्या अबुपिं नं
गुलि न्ह्यइपु नेपालभासाया साहित्यकार जुइगु् ।

बिमोचन ज्याझ्वलय् वनिं,
तुच्चा नइ मियातःगु सफूयात मखंपह याइ,
व हे सफू सितिं ब्युसा निपाः यंकी,
निपाः यंकुगु नं बापा ब्वनि मखु,
सखा व किताब स्वःसां
छ्वयला बजि हे मखा लुमनीगु जुइ,
गुलि न्ह्यइपु नेपालभासाया साहित्यकार जुइगु् ।

क्रान्तिया खँ ल्हात कि
तुलुतुलु जक हे स्वइ,
आलु समोसाया खँ वलकी
१००गु हे कमेन्ट दइ,
केवल थःगु साहित्य बांला धालकी
नुगः चकंके न्ह्यापिं,
गुलि न्ह्यइपु नेपालभासाया साहित्यकार जुइगु् ।

भाषाया शुद्धता झीत माः,
थःम्हं च्वःगु हे जक शुद्ध,
साहित्यया भाय् धैगु सः खः,
भाषा विद् जुयाः क्यने सकसियाः मास्ति व
गुलि न्ह्यइपु नेपालभासाया साहित्यकार जुइगु् ।

कविता धकाः ब्वनाच्वन जुइ छिसं नं
कविता मखु थ्व अथें झ्वः जक हे खः,
न्ह्यागु च्वसां थन ला साहित्य जुइगु
गुलि न्ह्यइपु नेपालभासाया साहित्यकार जुइगु् ।

Leave a Reply

Your email address will not be published. Required fields are marked *

This site uses Akismet to reduce spam. Learn how your comment data is processed.