नेवाः न्ह्यलुवा पद्मरत्नयात नागरिक अभिनन्दन

झीगु संवाददाता
येँ, यँलाथ्व खस्ति । नेवाः अधिकारया लागि थःगु जीवन पानादीम्ह मानवअधिकारवादी नेता पद्मरत्न तुलाधरया भिं ज्याथः जंक्वया लसताय् थौ शनिबार जूगु नागरिक अभिनन्दन जुल ।

थौं यंलाथ्व खस्थि (भाद्र ३० गते) शनिवार कुन्हु पद्मरत्न नागरिक अभिनन्दन समारोह समितिया ग्वसालय् जूगु ज्याझ्वलय् तुलाधरयात सकल नेवाःतय्पाखें शताब्दी पुरुष सत्यमोहन जोशीं हनापौ व लुमन्ति चिं लःल्हानादिल ।

नेवाः आन्दोलनया न्ह्यलुवा, नेपालसंवत् अभियन्ता, राजनीतिक न्ह्यलुवाः, साहित्यकार, आदिवासी जनजाति आन्दोलनया न्ह्यलुवाः, राजनीतिज्ञ, शान्तिवार्ता समन्यकर्तानिसें मानवअधिकारवादी धकाः म्हसीका दयेकादीम्ह पद्मरत्न तुलाधरया न्हापांगु ज्याथः जंक्वया लसताय् दकले लिपांगु मू ज्याझ्वः कथं थौं ने.सं. ११३८ यंलाथ्व खस्थि (भाद्र ३० गते) शनिवाः तःजिक नागरिक अभिनन्दन ज्याझ्वः न्ह्याःगु दु । उगु अभिनन्दन ज्याझ्वः येँया राष्ट्रिय सभागृहय् न्ह्याःगु खः ।

उगु ज्याझ्वलय् नवासें मूपाहाँ सत्य मोहन जोशीं नेपालय् नेवाः जुयाः जन्म जुइगु तःधंगु सौभाग्यया खँ खः धयादिल । नेवाः संस्कृतिइ जंकोया महत्वया चर्चा यानादिसें जंको यायेखनेगु धइगु तःधंगु खँ धकाः नं लुमंकाबियादिल । वय्कलं तुलाधरयात वय्कलं नेपालसंवत्यात राष्ट्रिय संवत् दयेकेत यानादीगु भूमिकाया नं कदर यानादिल ।

अभिनन्दन धुंकाः सभायात सम्बोधन यायेगु झ्वलय् नेवाःलगायत आदिबासी जनजातितय्सं न्हयाक्व हे आन्दोलन याःगु खःसां उमिसं धाःथेंज्याःगु संघीयता मवःनिगु व जनतायात जनताया अधिकार बिइकेत आः हानं तःधंगु आन्दोलन जुइगु खँ कनादिल ।
जनतायात माःगु अधिकार मवःनि । आः हानं युद्ध हे यायेमालीगु अवस्था वयेफु, वय्कलं धयादिल ।

नेपालभाषा एकेदमिया सदस्यसचिव मल्लकेसुन्दरं नेपालया प्रधानमन्त्री व राष्ट्रपति लगायतया मनूतय्सं हनेबहम्ह छम्ह हे जक व्यक्तित्व पद्मरत्न हे जक खः धयादिल । लिसें वय्कः नेपाःया जनजाति आन्दोलनया सर्वमान्य नेता जुयादीगु खँ नं लुमंकादिल ।

ज्याझ्वलय् तुलाधरयात लुमंकाः च्वयातःगु अभिनन्दन ग्रन्थया उलेज्या नं जुल ।
लिसें वय्कःया छेँजःपिन्सं अन हे वय्कःया नामय् पद्मरत्न तुलाधर प्रतिष्ठान नीस्वनागु नं घोषणा यानादिल ।

अभिनन्दन समारोह न्ह्यः भाजु तुलाधरयात वय्कः आः च्वनादीगु छेँ लाजिम्पातंनिसें छगू र्याली यानाः देय् चाःहिइकाः सभागृहय् हःगु खः ।

तुलाधरया जंको जूगु इलय् लाकाः लछि न्ह्यःनिसें वय्कःया व्यक्तित्व व योगदानयात कयाः थी थी ज्याझ्वः जुयावयाच्वंगु खः । थ्व झ्वलय् दकलय् लिपा शुक्रवाः नेपाः ब्यांक्वेटय् थीथी संघसंस्थातय्सं ं वय्कःयात हनापौ देछाःगु खः ।

Leave a Reply

Your email address will not be published. Required fields are marked *

This site uses Akismet to reduce spam. Learn how your comment data is processed.