धरहराया पसः थुनेवं पूर्वमेयरयात मुक्ति दइ ला?

राजमाया पुतवार

लछि दत अकस्मात हे धरहराया क्वसं दयेकातः रेस्टुरां अले अन टक्सारया लिक्क व हुलाकया लिक्क झ्वःलकि दयेकातःगु वसः पसःत थुनाछ्वःगु । थःगु त्वालय् छु छु जुयाच्वन धइगु ला सिइमखु झीसं, दुर्गम हुम्ला जुम्लाय् छु जुयाच्वन धइगु गथे सिइ ? उकिंला झी नेवाःत जुयाच्वंगु ।

 

 

थौं स्वयाः नीदँ न्ह्यः अबलय् या काठमाडौं महानगरपालिकां लुँहिति धरहरा व उकिया चकंगु थाय् लीजय् बिउगु खःसाइड वाकर्स ट्रेडर्सयात । उकिया विरोध जुल, सर्वोच्चं बिइमदइमखु धाल, हानं अबलय्या मेयरं मेगु हे लँ ज्वनाः दक्वस्या न्ह्यःने बिइजिउ, बिलकि अथे दइ थथे दइधकाः चाकुगु खँ ल्हानाः हे बिउगु खः । जिउ धाःपिं सुम्क च्वन, मजिउ धाःपिं नं लिपा सुम्कच्वनाछ्वत । पुरातत्व विभाग नं सुम्क च्वन । अले स्वदँ न्हयाः तःभुखाय् वयाः धरहरा हे दुनावँसेलि थ्व बारे चर्चा मजुल, पसः धाःसा चले हे जुयाच्वन, महानगरपालिकां बाः नं दुकया हे च्वन ।

 


आः वयाः नीदँ लिपा न्हूगु स्थानीय सरकार वयेधुंकाः न्हापा लीजं बिउम्ह मेयरयागु हे पार्टी त्यानावयेवं आः अचानक अनया दक्वदिक्व पसः थुनाछ्वयेवं त्वालय् निन्हुस्वन्हुतक च्या त्वनेथाय् गफ जुल, व स्वयाः अप्वः मेगु छुं मजुल । दयेकातःगु थुनकि बांलाःगु याःगु खनेदइगु तर आः तकं अन व थुनाः ल्यंगु चा द्वँ तकं चिइके फूगु मखुनि । आः हानं अन खिचापुखू व तेबाहाःया मस्त म्हितःवनेदइगु गबलय्?

सत्ताय् वनेगु धइगु हे उगुं थुगुं यानाः थःत बछि थःगु पार्टीयात बछि कमिसन म्हयेगु खः धकाः धाइपिं चुनावय् त्यानावनाच्वँतले थन माःगु मजुइगु व म्वाःगु जुइगु जुयांच्वनी । धरहरा बालं बिइगु नं छगू अज्याःगु हे ज्या खः । थ्व सुनां नं मखंक, सुचुकाः याःगु नं मखु । अबलय् हालेमाःपिं दक्वं पाकां सुयाः तैं चुप मैं चुप यानाः च्वन । दुधको साक्षी बिरालो जुयाच्वन । मखुगु याःगु खंकाः नं हालेमाःपिं सरकारी निकाय अले स्थानीय नागरिक समाज धाःपिं म्हुतुइ धौफिनाः छाय् च्वनाच्वनी धइगु दक्वस्यां सिउ ।

 

आः वयाः नीदँ नीदँ लिपा व पसः थुनेवं नकतिनि न्ह्यलं चाःगुथें थज्याःगु बांलाःगु ज्या यात का धकाः सामाजिक संजालय् सकारात्मक सोचया भुतं लिनातःपिन्सं थुकियात तारिफ याइगु ला द हे दत, तर आः थुकिया स्थायी समाधान धइगु छु धाः अनं अज्याःगु छुं वइगु खनेमदु । भचा लिबाक्क हेसां आः धरहराया भविष्य गथे जुइ धकाः बिचाः यायेमाःगु दु ।

 

 

थुकिइ शंका हे मन्त कि वडा नं २२या वडा अध्यक्ष चिनीकाजी महर्जन छम्ह ल्याय्म्ह जुयाः नं न्हूगु छुं यायेमाः धइगु जोश दुम्ह व्यतिm खः । धरहराय् यदि बांलाःगु ज्या जूगु खःसा उकिया जस वयात हे वनेमाः । तर थुलि जक धयां नं खँ क्वचाइगु अवस्था मदु । खिउँथाय् लाकालुकु याःथें काक्वपाक्व यायेगु खँ कानूनी राज्यय् सम्भावना मदु । आः उकिया सत्य तथ्य पिहाँ वयेमाल, गलत याःगु खःसा नीदँ पुलांगु जातः प्वलाः सां गलत याःम्हसित सजाय जुइमाल, कन्हय् हानं थज्याःगु मजुइकेत नजीर जुयाबिइमाल धरहरा लिज काण्ड ।

यदि धराहरा लीजय् बिइगु गलत खःसा सम्झौता याःपिं निगुलिं पक्ष दोषी खः । सन् १९९६लय् याःगु थ्व सम्झौता सर्वोच्च अदालतं छकः गलत, गैरकानूनी ज्या धकाः धायेधुंकूगु हानं व हे संस्थायात सन् २००३य् छाय् बिल ? व बिइगु हैसियत अबलय्या मेयर केशव स्थापितयात गनं वल ? धरहरा व लुँहितिया संरक्षण यायेगु जिम्मा पुरातत्वयागु खःलाकि मखु, अले पुरातत्व विभागं छकः अन पसः दयेकेबइिमखु धकाः धायेधुंकाः लिपा छाय् सुम्क च्वन? स्थानीय टेबहालया युवातय्स छगू हद तक विरोध यानाः हानं छाय् सुम्क च्वन? अबलय् उगु संस्थां व याये थ्व याये धाःगु मयातं अन छाय् थ्व गैरकानूनी जुल धकाः छाय् सः पिहाँमवल ? थ्व दक्व खँया लिसः मालेमाःगु अवस्था वःगु दु ।

 

यदि धराहरा लीजय् बिइगु गलत खःसा सम्झौता याःपिं निगुलिं पक्ष दोषी खः ।

 

यदि धरहरा लीजय् बिइगु ज्या गलत खःसा न्हापा नं गलत आः नं गलत । थौं व टहरा थुनेमाःगु खःसा न्हापा नं थुनेमाःगु खः । न्हापा थ्व सम्झौता यायेत सु सु न्ह्यचिउगु खः व व मनूयात कठघराय् मथँसे नगरपालिकाया मेयर उपमयेर, बोर्डसदस्य, मेमेपिं स्थानीय जनप्रतिनिधित, अबलय्या कर्मचारी, कानूनी सल्लाहकार, अले थी थी पार्टीया प्रनितिधि च्वनाः दयेकातःगु वडास्तरया सर्बदलीय समितियात थुकियाबारे जिम्मेवार मदयेकुसें सुम्क च्वनेगु खःसा आः थ्व धरहरा लिज काण्डया अनुसन्धान झन् तापाक्क वनीगु खनेदु । लहरा तान्दा पहजा गर्जिन्छ धाथें जुइन्हयः हे स्थानीय जनतायात न्हापा थ्व कारणं लिजय् बिइ जिउगु खनाः बियागु, आः थ्व कारणय् गलत खनेदूगुलिं थुनागु धकाः आःया वडा कार्यायल अथवा महानगरपालिका स्वयम्, अथे धइगु आःया मेयर व उपमेयरं तत्काल लिसः बिइमाःगु खनेदु ।

Leave a Reply

Your email address will not be published. Required fields are marked *

This site uses Akismet to reduce spam. Learn how your comment data is processed.