येँया ब्यारेकय् नं मजिउ जूपिं मिस्त वने मजिउ ला?

राजमाया पुतवार
झीसं धयाच्वना थ्व देय् झी सकसियागु खः । तर राज्यं धयाच्वन थ्व थौं नं हिन्दु अतिवादीतय्गु जक तिनि । नकतिनि खदेदयेकःवःगु हनुमानध्वाखा दुने तयातःगु नेपाली सेनाया छगू सुचनं थथे हे धाल ।

नेपाःया धर्म न्ह्यागु थजु अन अतिवादयात थाय् बिइमजिउ । तर आः व सुचनं थौं नं नेपाःया राजधानी धयाच्वनागु येँ थज्याःगु हे हिन्दु अतिवादयात थाय् बियातःगु खनेदत, उकिसं नेपाःया जनतां पुलातःगु कर नयाः म्वानाच्वंपिं सेना हे थुकिया संरक्षणय् न्ह्यःने खनेदत ।

सामाजिक संजालय् लुयावःगु छपा किपा कथं अन यतखाया लिक्क कम्पुकोट या न्ह्यःनेया लँय् अनया श्री रणभैवरव गणं छगू सुचं तिकातःगु दु, उकिया कथं अन निशान भगवती दु धकाः कुसा कुयाः वनेमजिउ, आसोच बारेयानातःपिं वने मजिउ अले मजिउ जूपिं मिस्त नं न्हय्न्हु तक वनेमजउिगु खँ धयातःगु दु ।

मिस्तय् मजिउ जुइगु धइगु छगू सामान्य शारीरिक प्रक्रिया जक खः, उकिया छुं नं कथंया धर्मलिसे स्वापू दयेमजिउ धकाः महिला अधिकारवादीत येँय् च्वनाः हालाच्वंगु दु । सुदुर पश्चिम, अथे धइगु नां जाःम्ह महिला अधिारवादी डा. आरजु देउवायाया कार्यक्षेत्रय् आः नं छाउपडी धकाः मजिउ जूपिं मिस्तय्त छेँ दुतमकासे पिने हे गोठ दयेकाः तयातयेगु चलन दनि । तर कमसेकम येँय् ला अज्याःगु मदु, उलिमछि विभेद मदु धकाः च्वनाच्वंपिन्त थ्व सुचनं मिखा कंकेगु ज्या यात ।

नेपाःया मिसा अधिकारवादीतय्सं मिस्तय्गु असमानताया बारे तःगु खँ ल्हाइ, गुगु तसकं बांलाःगु खँ खः । तर उमिसं मजिउ जुइबलय् मिस्तय्त याइगु विभेदया बारे धाःसा खँ ल्हाइमखु । थथे छाय् जुयाच्वन धायेबलय् थन या अधिकांश मिसा अधिकारया बारे खँ ल्हाइपिनिगु संस्थाया नेतृत्व हिन्दु मिस्तय्सं कयातःगु दु, अले उमित थथे मजिउ जुइबलय् याइगु विभेद स्वीकार्य दु, उमिसं ला थ्व विभेद हे मखु धयाच्वनी । आः स्वनिगलय् व नं, जनतां पुलतातःगु करया तलब नयाच्वनीपिं सेनातय्सं हे थ्व कुप्रथायात संरक्षण यानाच्वंगु खनाः नं नमवासे च्वंगुया कारण माले हथाय् जुइधुंकल ।

One thought on “येँया ब्यारेकय् नं मजिउ जूपिं मिस्त वने मजिउ ला?

  • August 5, 2018 at 9:05 am
    Permalink

    बॉंलाक च्वया दिल सुभाय !

    Reply

Leave a Reply

Your email address will not be published. Required fields are marked *

This site uses Akismet to reduce spam. Learn how your comment data is processed.