‘मचाया मां’ उपन्यास ब्वनाः थःत ताःगु खँ

हनेबहःम्ह आख्यानकार भाजु मथुरा साय्मिजुया छुं दिं न्ह्यः निक्वःगु खुसी अंग्रेजी भासं भाय् हिलाः, नेवाः भाय्या नं नापं तयाः पिदंगु ‘मचाया मां’ उपन्यास छक्वलं ब्वने क्वचायेका । वय्कःया तःगू मछि बाखंमुना सपूm, उपन्यास व जीवन सम्बन्धी रचनात मध्ये जिं कस्ति, ब्लू डल, हिरामोती, सिन्ह, मिजला, माकुगु विष, ह्याउँमिला, राप, खालु, लुमन्ति व मचाया मां जक ब्वनेधुंगु जुल । ब्व.लिसे सात्तुसाला यंकीगु वय्कःया रचनाया विशेषता हे खत ।

 

जिं ब्वनागु अप्वः धयाथें रचनाय् मूपात्र मिसाम्ह जुयाच्वनी । अले उम्ह मिसाम्ह पात्रया जीवन्त चित्रण, जीवन्त मनोभावना, जीवन्त सम्बाद, जीवन संघर्ष, खुसिथें न्ह्याःगु भाषा शैली वय्कःया रचनाया मेगु विशेषता खत । वय्कःया रचनाया मेगु विशेषता धयागु यौन मनोविज्ञानयात दुथ्याकाः ब्वमिया नुगः सालेगु । जिं ब्वनागु वय्कःयागु रचनात मध्ये छपु निपु बाखं त्वःताः अधिकांशय् थुपिं विशेषतात दुथ्याः । ‘मचाया मां’ उपन्यास जक विस्कं जुइमाःगु खँ हे मन्त । 

 


छम्ह मिसा न्ह्याक्व हे शिक्षितम्ह जुइमा वा सम्पन्नम्ह जुइमा वा सम्मानितम्ह जुइमा वा बांलाम्ह जुइमा, वं थःत अबले तक पूवंम्ह तायेकी मखु गबले तक व मचाया मां जुइमखु । खः, ‘मचाया मां’ उपन्यासं नं थ्व हे खँ धयाच्वंगु दु । मचाया मां जुइगु निंतिं छम्ह मिसां थःगु जिन्दगी हे बरः तयेफु, न्ह्यागु दुःख सीमाःसां न्ह्यचिले फु, न्ह्यागु त्याग यायेमाःसां न्ह्यब्वाये फु धैगु खँ थुकी क्यनातःगु दु ।

 

वय्कःया मेमेगु रचनाय् थें तुं थुकी नं मू–पात्रया तफाःगु नुगः ब्वयाक्यंगु दु , वर्ग विहीन समाजया सृजनाय् बः ब्यूगु खनेदु । 

 

मू नकिं सुति छम्ह विवाहित मिसा । मचाया मां जुइगु धुनय् छम्ह यौन पिपासु मिजंया फन्दाय् लानाः सुति बलात्कृत जुइ, गर्भवती जुइ । छखे इहिपा जुयाः तःदँ तक मचाया मां जुइ मफयाच्वंम्ह सुतिं थ्व खँ थः मिजंयात मकंसे द्वंकल सा मेखे वया मिजनं नं थःगु नपुंसकता त्वपुनाः द्वंकल ।

वय्कःया मेमेगु रचनाय् थें तुं थुकी नं मू–पात्रया तफाःगु नुगः ब्वयाक्यंगु दु , वर्ग विहीन समाजया सृजनाय् बः ब्यूगु खनेदु । 


थजाःथजाःगु चिन्तन मननं बिलिबिलि जायाच्वंगु ‘मचाया मां’ उपन्यास नेपालभाषा साहित्य धुकूया धन–द्रव्य जुयाब्यूगु दु । थथे हे बांबांलाःगु उपन्यास, बाखं वय्कःया च्वसां सदां पिज्वया च्वनेमा धकाः भिंतुसे वय्कःया ता–आयु व भिंउसाँय्या कामना याना ।

किपाः युनिसेफ

Leave a Reply

Your email address will not be published. Required fields are marked *

This site uses Akismet to reduce spam. Learn how your comment data is processed.