सडक बिस्तार पीडिततय्सं हानं आन्दोलन याइगु

झीगु संवाददाता
येँ ।

लँ तब्या यायेगु नामय् स्वनिगःया आदिवासीतय्गु च्वनेगु द्यनेगु थाय् हे मदयेकाः उमिगु च्वनेत माःगु छेँ हे थुनेगु ज्या सरकारं यानाच्वंगुलिं स्वनिगःया लँ तब्या यायेगु ज्यां पीडिततय्सं आः न्हूकथं आन्दोलन याइगु जूगु दु ।

उपत्यकाब्यापी सडक विस्तार पीडित संघर्ष समितिं थौं छगू पत्रकार सम्मेलन यासें न्हूगु ज्याझ्वः पितबिउगु दु ।

विक्रम संवत् २०६८ सालनिसें स्वनिगः दुने सडक लँ तब्या यातकि ट्राफिक जाम म्हो जुइ धकाः गैर न्यायीक सडक विस्तार शुरु याःगु खः । स्वनिगः दुने गुलि सवारी साधन संचालन याके जिउ धइगु विषयस छुं अध्ययन व योजना विना अनियन्त्रित रुपय् सवारी साधान दुतकाःगु कारणं जाम जूगु खःसां लँ तब्या यानाः थनया धार्मिक, ऐतिहासिक, सांस्कृतिक, पुरातात्वीक महत्वया सम्पदा तकं स्यंकेगु ज्या राज्यं यानावयाच्वंगु खः धकाः थौं पीडित तय्सं धाःगु दु ।
संविधान, अन्तर्रा्ष्टिय कानुन व ऐनं या धाःथे स्थानीय सरकारं लँया मापदण्ड दयेकेबलय् प्रभावित आदिवासी जनजाति व स्थानीय जनताया सहभागीता व मन्जुरी कयाः जक न्हूगु मापदण्ड दयेकेमाः धकाः नं समितिं माग याःगु दु ।

पीडित जनतां यानाच्वंगु आन्दोलन खःगु जुयाः सर्वोच्च अदालतं जनताया पक्षय् निर्णय यानाः सरकारयात जनताया इच्छा बेगर लँ तब्या यायेमते धकाः आदेश बिइधुंकाः नं सरकारं सर्वोच्चया फैसला कार्यान्वयन मयासे मनूतय्गु छेँ स्यंकःवइगु सम्भावना खनाः हे आन्दोलन यायेमाःगु खँ उमिसं थौं धाःगु दु ।

आः समितिं सरोकारवालातय्त व फैसला कार्यान्वयन यायेत जानकारी तथा ज्ञापन पत्र बिइगु अले आम नागरिकयात व फैसलाया बारे जानकारी बिइमाःगु उमिसं तायेकूगु दु ।

सर्वोच्च अदालतं याःगु फैसलाय् सरकारयात जनताया आवासया हकं बंचित यायेगु ज्यायात तसकं संवेदनशिल ढंगं ग्रहण यानाः विकल्पहीन अवस्थाय् बाहेक आवासया सुरक्षायात प्रतिकुल असर ज्या यायेमेत याकेमते धकाः धाःगु खः ।

थ्व हे आधारय् आः समितिं थनिंनिसें मेगु सोमवार तक सहरी विकास मन्त्रालय, ३ नम्बर प्रदेश सरकार, उपत्यका विकास प्राधिकरण, काठमाण्डौं उपत्यकाया १८ गुलिं नगरपालिका, पुरातत्व विभाग, गुठी संस्थानय् सर्वोच्च अदालतया फैसला कार्यान्वयनया लागि फैसलाया पूर्ण पाठ सहित ज्ञापन पत्र बिइगु धाःगु दु ।

अथे हे राज्यं धार्मिक, सांस्कृतिक, ऐतिहासिक, पुरातात्विक महत्वया सम्पदाय् क्षति व नष्ट याःगु बारे जानकारी बिसें अखिल नेपाल भिक्षु महासंघ व विश्व हिन्दू महासंघयात सर्वोच्च अदालतया फैसला कार्यान्वयन यायेत दबाव बिइत अनुरोध याइगु दु ।
अथे हे साउन २९ गते मंगलवार यलया वटुक भैरव मन्दिरय् पुजापाठ, प्रसाद ग्रहण यानाः खबरदारी सभा नं याइगु जूगु दु ।

Leave a Reply

Your email address will not be published. Required fields are marked *

This site uses Akismet to reduce spam. Learn how your comment data is processed.