स्वम्ह मिसा च्वमिनिगु सफू पिदन

 

झीगु समाचारदाता
यल, दिल्ला पुन्हि । स्वम्ह मिसाच्वमिनिगु थः गुरु पूर्ण वैद्ययात द्यछानातःगु स्वंगू सफू थौं शताब्दी पुरुष सत्यमोहन जोशीया ल्हातिं जुल ।

गुरु पुन्हिया लसताय् पिदंगु सफूत मोतिलक्ष्मी शाक्यया तिमिलाया जलय्, मनदेवी ताम्राकारया लँय् खनागु पलाः व प्रतिसरा सायमिया प्रेशरकुकरया चिल्लाय् खः ।

नेपालभाषा आधुनिक गद्य कविता ख्यःया न्ह्यलुवा कवि व निबन्धकार पूर्ण वैद्यया जंकोया लसताय् व सफूत थौं कवि वैद्यया लिसें वय्कःया तिरिमय्जु मीरा वैद्य, सत्यमोहन जोशी, नेपालभाषा परिषद्या नायः प्रा. सुवर्ण शाक्य, च्वमिपिं नारायणदेवी श्रेष्ठ, मथुरा सायमि व सुवर्णकेशरी चित्रकारया लिसें समालोचक प्रा. प्रेमशान्ति तुलाधरया ल्हातिं उलेज्या जूगु खः ।
लिसें उगु ज्याझ्वलय् स्वम्ह च्वमिपिन्सं वैद्ययात हंगु खःसा कुतःपिथना पाखें विमल कुमार ताम्राकार्र नं मथुरा सायमयिात हंगु खः ।
उगु ज्याझ्वलय् सत्यमोहन जोशी नेपालभाषाया न्हून्हूगु सफूत मदिक्क पिदनाच्वंगु खँ लसताया खँ खः धासें आः नेपालभाषा साहित्ययात क्रमिक रुपं अंग्रेजी भासं हिलाः विश्वया न्ह्यःने ब्वये हथाय् जूगु खँ कनादिल ।
मथुरा साय्मिं मिसाच्वमिपिनि च्वये थाकुइगु समाजय् थथे सफू पिदेनगु धइगु बांलाःगु खँ धासें वैद्यया मेमेगु जंको नं थथे हे यायेखनेमा धकाः मन्तुना प्वंकादिल ।
सम्मानित जुयादीम्ह वैद्यं न्हापा नेपालभाषा विषय तयेकेत अबलय्या स्ूकल प्रशासकत पूर्वाग्रही जुइगु खँ लुमंकुसें अज्याःबलय् प्रतिसरा सायमिपिनिगु पुचलं जुझारु कथं हे न्ह्यःने वयाः नेपालभाषा अध्ययन यायेगु वातावरण दयेकूगु लुमंकादिल ।

च्वमि मोतिलक्ष्मी शाक्यं मिस्तय्त थथे च्वयेगु ज्याये तक्यनाच्वने झीगु समाजय् थाकुगु खँ कनादिल अले नेपालभाषा साहित्य ख्यलय् थ्व इलय् तक नं पानावनेफूगु धइगु थ्व ख्यःया नांजाःपिं च्वमिपिन्सं प्रोत्साहन बिउगुलिं हे जक खः धकाः धयादिल ।

पिदंगु सफूया बारे नवासें समालोचक प्रा. तुलाधरं स्वंगू सफुतिं समाजय् मिस्त न्ह्यने वये थाकूगु ईया प्रतिनिधित्व यासें अबलय् मिस्तय्त साहित्य वयेगु धइगु गुलि थाकु धकाः उगु ईया मिस्तय्के दुने सुलाच्वंगु असन्तुष्टि व विद्रोहयात उजागरयाये कथंया जूगु बिचाः तयादिल ।

किपा : राजेन

Leave a Reply

Your email address will not be published. Required fields are marked *

This site uses Akismet to reduce spam. Learn how your comment data is processed.