‘पामिला’ उपन्यास ब्वनाः थःत ताःगु खँ

दिव्या ताम्राकार

उपन्यासकार भाजु राज साय्मिया न्हूगु उपन्यास ‘पामिला’ छन्हुं हे ब्वने क्वचायेका । वय्कःया मेमेगु उपन्यास नं मब्वनागु मखु अय्नं थुगु उपन्यासं बिस्कं हे सवाः बिल । उपन्यास ब्वने क्वचायेवं छगू बांलागु उपन्यास ब्वनागुया तृप्ति प्राप्त जूगु थें, साहित्यया रसं प्याचाः लंकागु थें अनुभुति जुल । थुगु उपन्यासं जिगु नुगः सालाकाःगु मू मू कारण निता दु थें ताः —

 

१. भाष शैली —
राज साय्मिजुया धुच्चा पतिकं खँत्वाः–खँभाय्, प्रतिक, बिम्ब, उपमा छ्यलाः न्ह्याःवनाच्वंगु भाषा शैली ब्वनामियात क्वमचाःतक सालायंकेत ताःलाःगु दु । न्हापा गबलें न्यने–ब्वने मखंनिगु प्रतिक, बिम्ब, उपमा आपालं न्ह्यब्वयादीगु दु । गथे कि — ‘म्ह हे जिररर जिररर मिंक कविता वाचन याइबलय्’, ‘हिनू हिनुली थ्वयाच्वंगु बिद्रोहया सः अन हे तिकितिकि हायेका क्यनी’, ‘पतासिम्वःया गुजि थें कय्कय् कुनावःग लक्ष्मी काकीया न्यतालय्’, ‘भुखाचं यक्व छेँ बाइरोडया कान्छीचित ड्राइभरं थियाथकू थें भ्वरि खाका थकल’ आदि आदि ।

 

२. विषयवस्तु —
छगू नितान्त सामाजिक उपन्यास खयाः नं थुकी भाषिक, राजनैतिक चेतनाया आपालं खँ दुथ्याकातःगु दु । थुकी नेपालभाषा आन्दोलनया किपा दु । जातीय दमन बिरुद्धया सः थ्वयाच्वंगु दु थुकी । मांभाय्या महत्व ध्वाथुइक कनातःगु दु । अथे हे थ्व उपन्यासय् छगू परिवारया मार्मिक बाखं दु । छज्वः मतिनामिया मतिनां प्याःगु किपा दु । निसन्तान जुइमाःगुया ब्यथा दु । उँसाय् मदइबलय् फये मालीगु दुःखया नालीबेली दु । छु जक मदु थुकी, सकतां दु । अझ मू विषयवस्तु ला छम्ह मिसाया संघर्षपूर्ण जीवनया खः । भाःत मदयेकाः च्वनेमाःम्ह छम्ह मिसायात थःगु हे परिवारपाखें याइगु दुर्ब्यवहार, स्वार्थीपनां म्वाये हे थाकुका बिइगु खँ सशक्त रुपं चित्रण जूगु दु । मस्त ब्वलंकेत लक्ष्मी काकीं स्यूगु दुःख व पारुं थःगु कर्तब्य पूवंकाच्वंच्वं नं अनेक कथंया लांछना फयेमाःगु दुःख तसकं मार्मिककथं न्ह्यब्वयातःगु दु । मां छम्हसित हे पालंपाः लही यंकीपिं अले पुर्ख्यौली सम्पतिइ गिद्ध मिखा तइपिंत थ्व उपन्यासं न्वखंक न्वानातःगु दु ।

 

ब्वब्वं वनेबलय् नुगः थुंदिना वः, मिखाकुं प्याना वः । छम्ह मिजंम्ह च्वमिं मिसापिनिगु मनोभाव, वेदना सशक्त रुपं न्ह्यब्वये फुगु हे च्वमिया विशेषता तायेका ।
अन्तय् नेपालभाषा साहित्य धुकुतिइ थ्व छगू नं धिसिलाःगु उपन्यास दुतिनेत च्वमि ताःलागु भापिया ।

Leave a Reply

Your email address will not be published. Required fields are marked *

This site uses Akismet to reduce spam. Learn how your comment data is processed.