ग्रीसय् मि च्यानाः ८०म्ह सित

झीगु समाचारदाता
येँ, दिल्लाथ्व १४ । ग्रीसया राजधानी एथेन्सया नापनापं लाःगु जंगलय् अचानक मि च्यायेवं अनया बस्ती तःधंगु संकट वःगु दु ।

आःतक म्होतिं ८० मनूत सिइगु खँ दु धाःसा मेपिं गुलि मनूत सिइधुंकल अथवा तनाच्वंगु दु धकाः ल्याःचाः याये तकं मफयाच्वंगु अवस्था धकाः बिबिसीं धाःगु दु ।

सोमबार न्हिनय् दक्षिण ग्रीसया व थासय् १५थाय् स्वयाः यक्व थासय् मिच्यानावःगु खः । सरकारया प्रवक्ता दिमित्रिस जानाकोपोलुसं धाःकथं फायर विग्रेडया लागि थ्व न्हापा गबलें फयेम्वाःगु चुनौति खः ।

 

उकिइ मध्ये २० म्ह विदेशी पर्यटक धकाः धाःगु दु । समाचारया कथं ग्रीसया इतिहासय् दकलय् तःधंगु गुँमि धयातःगु खःसा आः अनया संचार माध्यमं थ्व मि च्यायेवं अनया सुरक्षाकर्र्मीत थुकियात पनेत असफल जुल धयातःगु दु । आः अनया सरकारं मिया क्षति म्हो यायेत अन्तर्राष्ट्रिय ग्वहालि फ्वनाच्वंगु दु ।

छम्ह बौम्ह थःम्ह्याय्यात न्या लायेगु नांचाय् च्वनावःपिन्सं बचेयाःगु टिभीइ खनागु धकाः धयाच्वन तर अथे तंपिं मनूत अले लुइकूपिं मनूत हे नं माले फयाच्वंगु मदु ।

तनाच्वंपिं मनूतय्गु औपचारिक गणना जुइफयाच्वंगु मदु । फायर ब्रिगेड यात फोनकल वयाच्वनी तर खःगु ल्याःचाः तयेत उपिं नं असमर्थ हे जुयाच्वंगु दु ।


सिएनएनं धाःकथं अन मिच्यानाः बस्ती थपाय्च्वः मिया राप वल कि तयातःगु कार नायावनी अले टायर नं लःथें जुयाच्वनी । गथे गथेयानाः बिसिउँ वनेत सफल जूपिन्सं लँय् मनूत सिनाच्वंगु खनागु धाःगु दु ।
क्वाःगु पाखें बचेजुइत मनूत समुद्रय् क्वब्वाःवनाच्वन धइगु नं स्थानीय समाचार माध्यमं धयातःगु दु ।

Leave a Reply

Your email address will not be published. Required fields are marked *

This site uses Akismet to reduce spam. Learn how your comment data is processed.