नेपालभाषा विभागया नां हिल कि नेवाःभासं ब्वनेदइमखु

प्रा. डा. त्रिरत्न मानन्धर
त्रिभुवन विश्वविद्यालय अन्तर्गत गुगु नेपालभाषा केन्द्रीय विभाग दु, व विभाग अन्तर्गत नेपालभाषायागु साहित्य भाषा व नेवाःतय्गु संस्कृति इतिहास बारे उच्चस्तरयागु अध्ययन अध्यापन व अनुसन्धान जुयाच्वंगु दु । व हे सिलसिलाय् छुं दिं न्ह्यः छगू समाचार ब्वनाकथं उगु नेपालभाषा केन्द्रीय विभागयागु नां हिलाः नेवार अध्ययन केन्द्रीय विभाग तयेगु ला धइगु छगू समाचार वःगुलिं उकिइ थःगु छुं धापू तयेत्यनागु खः ।

 

खयेत ला नेपालभाषा नवाइपिं नेवाःत खः उकिं व नेवाःतय्गु संस्कृति उगु विभागय् अध्ययन अनुसन्धान जुया नं वयाच्वंगु खः । तर नेवार अध्ययन केन्द्रीय विभाग धकाः तयेसातकिं छगू तःधंगु प्राविधिक कठिनाइ छु वइ धकाः धाल धाःसा त्रिभुवन विश्वविद्यालय अन्तर्गत छुं नं विषयलय् परीक्षा बिइबलय् या त वं नेपालीं बिइमाः या त अंग्रेजी भासं बिइमाः । अंग्रेजी व नेपाली बाहेक मेगु भासं परीक्षा बिइगु व्यवस्था त्रिभुवन विश्वविद्यालयय् मदु । अले थ्व व्यवस्था भाषा सम्बन्धी विभागयात लागु जुइमखु । जस्तै मैथली केन्द्रीय विभाग दु उकिइ मैथलीं च्वयेदु, मैथलीं अनुसन्धान यायेदु । अथे धइथें हिन्दी केन्द्रीय विभाग दु, अन हिन्दी भासं च्वयेगु व अनसुन्धान यायेगु अथे हे संस्कृत केन्द्रीय विभाग दु उकिइ नं परीक्षाय् च्वयेगु व अनुसन्धान यायेगु दु । व हे ल्याखं नेपालभाषा केन्द्रीय विभागय् नं नेवाः भासं हे पढाइ जुयाच्वंगु दु अले परीक्षाय् नं नेवाः भासं हे च्वयेगु व्यवस्था आःतक जुयाच्वंगु दु । आः उकिइ नेवार अध्ययन केन्द्रीय विभाग जुइसाथकि थ्व भाषा सम्बन्धी विभाग जुइमखुत । अथे मजुइसाथकि अनयागु शिक्षण विधि, परीक्षाय् च्वयेगु, व फुक्कं कि अंग्रेजीं यायेमाल कि नेपाली यायेमाल ।

 

अथे जुल धाःसा ला नेपालभाषा केन्द्रीय विभागयागु उद्देश्य अनुरुप हे मजुल । थ्व विभागयागु उद्देश्य छु धाःसा नेपालभाषा, नेपालभाषायागु साहित्यया गय् यानाः विकास यायेगु, गय्यानाः अनया विद्यार्थीतय्सं व भाषायात छ्यलेगु धइगु उद्देश्य तयाः थ्व विभाग गठन जूगु खः । आः थ्व नेवार अध्ययन विभाग धइगु न्हूगु नां तयेसाथं अन नेवाः भासं पठनपाठन भतीचा जक थाकुइगु मखुत कि विद्यार्थीतय्सं अन परीक्षाय् नेवाः भासं च्वयेदइमखुत ।

उकिं जिगु बिचालं थ्व नेपालभाषा केन्द्रीय विभागयागु नां आः गुगु जुयाच्वंगु खः व हे तयेगु बेश जुइ । उकिइ छुं फेरेयाये म्वाः । गन तक नेपालभाषा, नेवाःतय्गु संस्कृति इतिहास ब्वंकेगु धइगु खँ नेपालभाषा केन्द्री विभाग धइगु नां जूबलय् नं ब्वंकाच्वंगु हे खः, ब्वंक दूगु हे खः, लिपा नं ब्वंके हे दइ । उकिया निंतिं नां फेरेयायेमाःगु जरुरत मदु । नां फेरेयायेसाथकि छगू किसिमयागु प्राविधिक कठिनाइ वइगु खनेदूगुलिं जिगु थःगु बिचाः छु धकाः धाःसा नेपालभाषा केन्द्रीय विभागयागु नामं हे थ्व विभाग संचालन जुयाच्वन धाःसा दकलय् बांलाइ ।

(त्रिभुवन विश्वविद्यालयया पुलांम्ह इतिहास विभाग प्रमुख अले लुम्बिनी बौद्ध विश्वविद्यालयया पुलांम्ह उपकूलपतिलिसे देवदास मानन्धरजुं कयादीगु अन्तरवार्ताया लिधंसाय् लेख तयार याःम्ह राजेन )

Leave a Reply

Your email address will not be published. Required fields are marked *

This site uses Akismet to reduce spam. Learn how your comment data is processed.

%d bloggers like this: