मतिना (चिबाखं)

चित्त नेवाः

आखिरय् मतिनां थः मांअबुया कन्भिन्स याना त्वतल । धर्म संस्कृति संस्कार मिलेमजुम्ह मिजंनापं ब्याहायाना बिइगुलि मांबौपिनि तसकं मयःगु खसाँ मतिनाया घुर्कीया न्ह्यने छुँ चलय्‌मजुल ।
मांअबु खँ न्यनेवं मतिनां थः मतिनामियात खबर छ्वल ।खबर वंगु निन्हु लिपा मिजंया मांबौपिं मतिनायात भम्चा ल्हायत छें वल ।

मतिनाया मांबौ  –  ” झासँ दिसँ ।”

मिजंया मांबौ  – ” हस्‌ ! छिनं दिसँ । मस्तय् यःत्यः जुयाच्वंगु जुयाच्वन उकिं छिक्पिनि म्ह्याय्‌ मतिनायात जिमि काययात बियादिइत फ्वँवयाच्वना ”
मतिनाया मांबौ “यःत्यः जुपिं मस्तयत फाय्‌मज्यु मस्तय्‌त बाँमलागु असर लाइ उकिं जिं छिक्पिनि काय्‌यात जिमि म्ह्याय् बिइगु क्वछिना ।तर झी धर्म संस्कृति संस्कार छुँनं ज्वमलापिं जुगुलिं ब्याहाया ज्या जिमिगु चलन कथं जुसा ज्यु धैगु जुगु बिन्ति ”
मिजंया मांबौ ” खः ! दक्वसिया थःथःगु चलन दइ थःगु चलन कथं यायमस्तिवइ उकिं छिथाय् छिसँ छिगु चलनकथं याना दिसं।जिमिथाय् जिमिगु चलनकथं याय्‌का मज्युला ?”
मतिनाया मांबौ ” ज्यु अथेहे खः । ”
मिजंया मांबौ” जिमिगु चलन कथं सगुन (सगं) छपा ब्युवय्‌मा अथेसा आःवइगु बिहिबाःखुन्हु जिमि जहान सगं बिइत वइ ।”
मतिनाया मांबौ ” ज्यु हस् ! थन मेगु छुं याय्‌मालाथें ।”
मिजंया मांबौ ” म्वाः । सगं व लँजक लल्हाय्गु खः छु ।” ” कासा जिपिं बिदाहे ज्वीका ”
मतिनाया मांबौ” हस् ! बरोबर दिसँ ।”

बिहिबाः न्हिनय् —
माजु ज्वीम्ह मिजंया मां अले मेमेपिं किस्तित ज्वना: सगं बिइत छें थ्यंक वइ।
दक्वसित भलाकुसारी याना बैठक कोथाय् तइ ।
मतिना नं झःझः धायेक लँ पुना: न्ह्यने फेतुइ ।
माजुम्हं सिन्ह तिकी, लँ लल्हाइ, लुँयागु चुरा, पाउजु, सिखः, तिलहरी, छड्के तिलहरी, अंगु न्ह्याकिइ ।

 

तिसा वसः खँबलय् मतिनाया मां, थःथिति दक्व मख्ख दंगदास ।
उबलेहे माजुम्हं चिकिचागःगु बट्टाँ चिकिचाफ्वगु हिरा थुनातगु न्हास्‌तयगु फुली पिकाइ । छें जःत पाखे स्वयाः धाल ” थ्व न्हासय् मतेकं जिमिथाय् लः चलय् मजू । आः तयावनेत न्हासय् प्वाः मदुगुलिं अथेंनि त्वतावने । स्वयम्बर याःवइबलय् तयेकातया दिसँ ।”

 

थुलि खँ न्यनेवं छेंजःपिं माक सिमां कुतँवपिंथें छ्यों क्वछुल । मतिनां फुली दुगु बट्टा खुसी जुया लल्हानाकाल ।

Leave a Reply

Your email address will not be published. Required fields are marked *

This site uses Akismet to reduce spam. Learn how your comment data is processed.