थःत बुद्ध धाइम्ह शोकोयात फाँसी

झीगु संवाददाता
येँ ।
थःत मेम्ह बुद्ध धकाः धाइम्ह हिन्दु व बुद्ध धर्मयात ल्वाक छ्यानाः ओम शिनरिक्यो नांगु धार्मिक सम्प्रदाय दयेका च्वंम्ह शोको आसहारा व वया खुम्ह सहयोगीपिन्त शुक्रबार फाँसी बिउगु दु ।

सिएनएनं थःगु वेभसाइटय् बियातःगु जानकारी कथं ६३दँ दुम्ह उम्ह धार्मिक नेतायात २२ दँ तक जेलय् कुनाः अन्तय् वयात अनया सरकारं फाँसी बिउगु खः ।

वयागु धार्मिक समुदायं सन् १९९५य् टोकियोया भूमिगत ट्रेनय् विषाक्त फय् छ्वयाः १३ म्ह स्याःगु अले द्वलंद्वः मनूतय्त घाःपाः यात । वथें उमिसं मेमेगु स्टेशनय् नं थज्याःगु हे अाक्रमण याःगु आरोप नं दु । थ्व पुष्टी जुइकाः सन् २००४ हे उमित फाँसीया सजाय क्वःछिउगु खः । अय्सां उमिगु अन्तिम याचिकाया औपचारिकता पुवंकेत झिंप्यदँ धयाथें पियाच्वंगु खः । उगु काण्डय् संलग्न १२म्हयात फाँसीया सजायया घोषणा याःगु खःसा मेपिन्त नं आः फाँसी जुइगु धयातःगु दु ।

 

द्वलंद्वः हे अनुयायी दूगु उगु धार्मिक सम्प्रदायया उगु रहस्यमय ज्यायात जापान सरकारं आतंकबाद धकाः हे नां बियाः मुद्दा न्ह्याकूगु खः ।

 

सन् १९५५ य् क्युशु टापुइ जन्मेजूम्ह उम्ह शोकोया थःगु नां चिजुओ माचुमोतो खः । मचांनिसें मिखां मखंम्ह वं न्हापां अन योग स्यनेगु यात अले सन् १९८० लय् हिन्दू र बौद्ध धर्मया सिद्धान्त ल्वाकछ्यानाः थःगु हे ओम शिनरिक्यो (सर्वोच्च सत्य ) नांगु धार्मिक सम्प्रदाय न्ह्याकल । लिपा थुकिइ ईसाई धर्मया सिद्धान्त नं दुथ्याकल ।

 

थुकथं थःत स्थापित यानाः वं थःत निम्हम्ह बुद्ध धकाः घोषणा तकं यात । अले संसारयात मुक्त बिइत धाधां मनूततय्गु हे अन्त्य यायेगु थज्याःगु ज्या यानायंकल । उमिगु खँ कथं लिपा थ्व संसारय् उमिगु सम्प्रदायया मनूत जक ल्यनाच्वनी ।

 

Leave a Reply

Your email address will not be published. Required fields are marked *

This site uses Akismet to reduce spam. Learn how your comment data is processed.