हाय हाय नेवा कविपिं ‍(चिनाखँ)

बालगाेपाल श्रेष्ठ

हाय हाय नेवा कविपिं
गपायसकं संवेदनहीन जुयावंगु
थौं थो झी नेवा कविपिं

लं तब्याकेगु नामय
छें छें दोजर वायेका
नेवातयत छेंखां छेंखां पितिनाचोन
मतलब मदु
भुखाचं अत्थें हे भताभुंग द्य व देगत
लोहंहिति गाहिति फल्चा सत
लं तब्याकेगु नामय दोजरं क्वानाचोन
मतलब मदु

विकासया नामय
बुंइ बुंइ रिंगरोड पिचरोड न्ह्याका
बुंइ बुंइ कंक्रिट बिल्डिंग पिना
नेवातयत नांगा भुंगा यानाचोन
मतलब मदु

पुनर्संरचनाया नामय
थपिनिगु हे थासय नेवातयत अल्पमतय लाका
नेवातयत वस्तिं वस्तिं
पितिनेगु संरचना वयाचोन
मतलब मदु

राज्यं नेवातय ला हि त्यात्या याना नयाचोन
नेवातय घालय चिमल्ता फोयाचोन
विरोधय गनं नेवा कविपिं छस हागु नं नेने मदु
न नेवा कविपिनि कविता पिदंगु हे सोये दु
न विरोधय गनं नेवा कविपिसं मि च्याकुगु हे खने दु

नेवातय दुखय खोबि मव नेवा कविपिनि
खोया गनं नेवा कविपिं
कविता बों जूगु नं नेने मदु
गनं खोबि काव्य दिवस जूगु नं मनेना
गनं घा स्याया काव्य दिवस जूगु नं मसिया
गनं बिरोध व विद्रोहया काव्य दिवस जूगु नं मखना
तर
मुनाचोन नेवा कविपिं मतिना काव्य दिवसय
हुरुहुरुं न्हिला बोनाचोन यो त्योया कविता
अंति हायेका नेवा कविपिं
खोल्चा भोपुया नेवा कविपिं
बुरा कवि, ल्यायम्ह कवि, मिसा कवि, मचा कवि
वैशया हु वयेका लय लयताया चोन नेवा कविपिं

संवेदनशुन्य जुजुं वनाचोन नेवा कविपिं
चेतनशुन्य जुजुं वनाचोन नेवा कविपिं
हाय नेवा कवितय संवेदनहिनता
हाय संवेदनहिन नेवा कविपिं
हाय हाय नेवा कविपिं ।

कवियागु व्याकरणयात गथे खः अथे हे तयागु – सं

Leave a Reply

Your email address will not be published. Required fields are marked *

This site uses Akismet to reduce spam. Learn how your comment data is processed.