सिक्किमय् भाषिक पुनर्जागरण यायेगु योजना सहित नेवाः गुथिया दँमुँज्या क्वचाल

झीगु संवाददाता
येँ, ११३८ तछलाथ्व पंचमि ।
सिक्किमय् च्वंपिं नेवाःतय्गु मंकाः संस्था सिक्किम नेवाः गुथिया दँमुज्या अन नेवाः भाय् व सांस्कृतिक सम्पदा केन्द्र चायेकेगु योजना सहित क्वचाःगु दु ।

 

वंगु शनिबार (जुन १६) कुन्हु ग्यान्तोकया तादोङय् जूगु उगु दँ मुज्याय् गुथिया नायः दिलु कुमार प्रधानं दक्व तहया दुजःपिन्सं अझ यक्व जिम्मेदारी क्वबिइमाःगु खँ ल्हासें गुथिं यायेमाःगु सामाजिक जिम्मेवारीया खँ नं न्ह्यथनादिल । वय्कलं अनया ल्याय्म्हपिन्त भविष्यय् ज्या ताःलाकेत अनया अवस्था थुइकेत इनाप यानादिल ।

 

ग्यान्तोकया सिचेय् दयेकाच्वंगु नेवाः भवन पुवंकेगु, सिक्किमय् च्वंपिं नेवाःतय्गु सामाजिक आर्थिक अध्ययन यायेगु, भाषिक पुर्नजागरणया लागि अन दूगु नेवाः भाय् व संस्कृति स्यनेकूयात हानं म्वाकेगु, आवधिक पत्रिका पिकायेगु, अले नामथाङय् नेवाः भाय् व सांस्कृतिक सम्पदा केन्द्र चायेकेगु गुथिया योजना दु ।

 

मुछ्यान्ज्ये अनिता प्रधानं गुथिं २०१७–१८ दुने न्ह्याकूगु थी थी ज्याया प्रतिवेदन न्ह्यब्वयादिल । दांभरिं महेन्द्र प्रधानं २०१७–१८या आर्थिक प्रतिवेदन न्ह्यब्वयादिल । अथे हे नेवाः भवन निर्माण समितिया नायः आरके प्रधानं छेँ दनाच्वनागुया प्रतिवेदन न्ह्यब्वयादिल । गुथिया ल्याय्म्ह कवःया छ्यान्ज्ये सुशेन प्रधानं २०१७–१८य् जूगु ल्याय्म्ह तय्गु ज्याझ्वःया प्रतिवेदन न्ह्यब्वयादिल ।

 

सिक्किमया थी थी अंचल वा शाखाया प्रतिनिधित नं वयाः थःगु बिचाः व छ्याता तःगु खँ नं अनं थौं वितरित प्रेस विज्ञप्तिइ धयातःगु दु ।

Leave a Reply

Your email address will not be published. Required fields are marked *

This site uses Akismet to reduce spam. Learn how your comment data is processed.

%d bloggers like this: