न्या लालाला ब्यां ! नेपालमण्डल

शरब वज्राचार्य

न्या लालाला ब्यां ! नेपालमण्डल नेपालमण्डल… बागमती !!
थौँकन्हे ३ नम्बर प्रदेशया नां नेपालमण्डल जुइगु जुल हँ धकाः सामाजिक संजालय् छम्ह निम्ह प्रदेश सभासदतयगु धापू न्यनाः झी नेवाःत दंग का !

 

न्हापा गुगु पार्टीं नेवाः प्रदेश सहितया राज्य पुनर्संरचना याये धकाः संविधानसभाय् तकं प्रस्ताव छ्वःगु खः, लिपा बहुमत गाये साथं “व जिमिगु विचाः मखु” धाल । अज्याःपिसं याइला नेपालमण्डल ? खय्तला थ्व जातीय मखुसे ऐतिहासिक पहिचान जक खः । थुलि न यात धाःसा इमित सुभाय् बिइ हे माः । तर पिने बय्बय् यानाः हालाच्वंपिं मध्ये अजयक्रान्ति शाक्य छम्हेस्यां बाहेक पार्टी दुने थ्व खँ सुनानं न्ह्यथनाच्वंगु मदु धइगु खँ पिने हुइनाभुइना जुयाच्वंगु दु । प्रदेश सभाय् नेपाल कम्युनिष्ट पार्टीया जक मुक्कं ७३.६ प्रतिशत अर्थात प्रदेशया नां छुइत माःगु स्वब्वय् निब्वः स्वया अप्व दुगुलिं वय्कपिसं छु नां तये धाइ व पारित जुइगु निश्चित दु । तर झी नेवातय् दथुइ नेपालमण्डल धकाः धाइपिं छथ्वः सभासदतसें पार्टीदुने धाःसा मौनधारण यानाच्वंगु खँ न्यने दु । अजयक्रान्ति बाहेक मेपिसं ला नेवाःतय् न्ह्यःने नेपालमण्डल बर्मुतय् न्ह्यःने बाममती धयाच्वन धइगु बुखँ दु । उकें झीत गनं न्या ला..ला..ला.. ब्यां जकं याइगु ला मखुला ???

 


छाय् धाःसा के.पि.ओली, माधव नेपाल, झलनाथ खनाल, बामदेव गौतम, इश्वर पोखरेल सुनांन थ्व खँ स्विकार याःगु खनेमदु । इमिसं बागमती वा नारायणी नां तयेत दबाब बियाच्वंगु खँ वयाच्वंगु दु । उकें आःया सम्भावना धइगु झीसं तच्वयेक नेवाः व तामाङया आदिभूमि जूगुलिं ३ नम्बर प्रदेशया नां नेवाः-ताम्सालिड जुइमाः धकाः आन्दोलन यायेफत धाःसा बिचय्या लँ कथं नेपालमण्डल वयेफु । ऐतिहासिक पहिचानया लिधँसाय् नेपालमण्डलया माग यात धाःसा थुमिसं बागमती/नारायणी नां तइगु सम्भावना दु ।

झीसं थुइकेमाःगु खँ थ्व खः कि ३ नम्बर प्रदेशया नां न्ह्याग्गुतःसां आःया जनगणना कथं थ्व प्रदेशय् दक्कले अप्वः तामाड, अले बर्मु, अनं ल्यू क्षत्री अले प्यंगुगू थासय् जक नेवाः जुइक प्रदेश दयेकूगु दु । उकें नां नेवाः-ताम्सालिड, नेपालमण्डल, नेवाल प्रदेश न्ह्याग्गु तःसां ३ नम्बर प्रदेशयात कुचा यानाः नेवाःतय्गु अलग प्रदेश मदय्कल धाःसा मेपिं तःम्ह हे अष्टलक्ष्मी जन्मे जुइतिनि । थुकि झीसं ध्यान बिइमाः, छिकपिनिगु बिचाः छु दु ?

Leave a Reply

Your email address will not be published. Required fields are marked *

This site uses Akismet to reduce spam. Learn how your comment data is processed.