खायूगु यथार्थ

सुनिल बज्राचार्य

सुथ न्हापां दना । सुर्द्यः लुल । तर लूगु सुर्द्यः बुलु । पलाः न्ह्याकाः देगलय् । देगः दुनेया कृष्ष्णया ख्वाः बुलु । बिहार , गुम्बाय् पलाः तया । बुद्ध बुलु ।
– ताल बुद्ध पराजित जूगु दु शान्ति लिसेया युद्धय् – ताल कृष्ण बांमलाक्क बूगु दु असत्यलिसेया युद्धय्
जिकय् दुूगु बुद्ध प्रतिया आस्था जिं तापाका । कृष्णप्रति दूगु आस्था नं तापाकाबिया । जिं बुद्धया ख्वाः स्वयेगु त्वताः बिया । कृष्णया ख्वाः स्वयेगु त्वताबिया । धात्थें धायेगु खःसा जितः त्रिपिटक , मात्र काल्पनिक बाखंया सफू जूगु दु । महाभारत काल्पनिक बाख‌ं जक जूगु दु ।
– जब तापाकंनिसें द्रौपदीया चित्कार थ्व न्हाय्पनय् दित
– जब द्रौपदीया लाज हरण जुल
– जब तापाक्क बम बारुद मुल
– जब हिया खुसि वाः वन
– जब मानव सहांर जुल
बस , कृष्ण व बुद्धया अस्तित्वय् न्ह्यसः चिं दन मात्र थौंया मनूतय्गु ब्यबहारं । जितः बुद्ध व कृष्णया गुणगान थौं औचित्यहिन ताल । भगवान धाइपिनिगु भूमिका गौण ताल ।
– संसारय् थौंया युगय् जिं कौरव त नापलानागु दु
– संसारय् थौंया युगय् जिं द्रौपदी नापलानागु दु
– संसारय् थौंया युगय् जिं पाण्डवत नापलानागु दु
जि कौरव बिरुद्ध दनेगु जिगु भूल खनि । द्रौपदीया चिरहरण पनेगु जिगु भूल खनि ।
सत्यया नितिं जिं पाण्डवयात साथ बिइगु जिगु भूल खनि । थ्वः अर्थय् जि कृष्ण जुइफइमखु ।
ग्व गनं नं शान्ति मदु । सत्य बचन थौंया युगय् अबिश्वसनीय जुया ब्यूगु दु । पञ्चशील सिद्धान्त मात्र ब्वसा ज्वलं जुयाब्यूगु दु । व चिवर दुने मात्र बिचाः दु व्यवहारिकता मदु । उकें जि बुद्ध जुइफइमखु । बुद्ध जुइगु जिगु कुत: ब्यर्थ । अरहत जुइगु कुतः ब्यर्थ । बोधिसत्वः जुइगु कुतः नं ब्यर्थ ।
शायद बुद्ध , कृष्ण लिसे लिसे जि नं बांमलाक्क पराजित जुयाच्वंगु दु थौं , थ्व नाटकीय संसारय् । गुकिया प्रमाण कथं नियमित रुपं न्हियां न्हिथं बुखँ पिदनाच्वगुं दु ततःग्वःगु आखलं –
“बलात्कार , महिला हिंंसा दिके मफु / खुकुरी प्रहारं मनु सित”

Leave a Reply

Your email address will not be published. Required fields are marked *

This site uses Akismet to reduce spam. Learn how your comment data is processed.