एकान्त (चिनाखँ).

श्यामसुन्दर सँय्जु

एकान्त
गत मृत्यु जक दइ
नितान्त ।

गन जीवन प्रखर बोध जुइ
मृत्यु अन एकान्त जुइ
संभावनाया फुक्क ई
गन छगू हे दिशाय् न्ह्याःवनी
प्राप्तीया फुक्क कृतज्ञता
गन छगू भावनी तनावनी
मृत्यु अन हे दइ ।
व ला अन छ्रं खंसां दइ
व ला अन छं मखंसां दइ ।

अन फय् दइ, व छंगु हे क्रियाय्
आशंका तज्याःगु नःलि भौमचाया
चुरीथें तज्याइ, अन जः दइ
अन खिउँ दइ, व छगू आवेग्
छ्रगु छ्यनय् हे ल्हाः वइ ।
मृत्यु अन छ्रंगु कामना जुइ
मृत्यु अन छ्रंगु संवल जुइ ।

विना मृत्युया छंगु एकान्त
दासिवया वाःगु दुरु थें
छताछुल्ल जुइ, अन छंगु
भय विष्फोट जुइ ।

एकान्त लयया इ खः
एकान्त निर्लिप्त ई खः
अन मृत्यु सहज जुइ ।

छंगु एकान्तया मृत्यु, हःतय्त
कुतुं वयेत समेत फय्यात बः बिइ
स सहज, मौन छंके हे प्यानाबिइ
व हार्दिक शान्त छंके हे दुबिनाबिइ ।
मृत्यु ला पुखः खः तज्जाःगु, गुगु सन्याइलय्
फय्या स्पर्शय् न्ह्यानावया सी प्याकाबिइ ।

सुथ शीपं छन्त ग्याचोया सुबोल सुबोल
जब छंगु कःसिया पःखालं ब्वया वनी
मृत्यु अन छंगु सःया
एकान्त स्वया वनी ।

ग्यायेमते, छं मृत्युयात थिइफु
व ला छंगु एकान्त खः
नितान्त ।

नेपालभाषा कविता संग्रहपाखें ल्ह्यागु

Leave a Reply

Your email address will not be published. Required fields are marked *

This site uses Akismet to reduce spam. Learn how your comment data is processed.