नेवाः भासं एफएम : उमित तयेकेगु लाकि झीसं न्ह्ययाकेगु ?

रमा

“सन्ध्या टाइम्स” न्हिपति बुखँ ब्वनेखन येँया कान्तिपूुर एफएमय् न्हयाका वया च्वंगु नेपालभाषाया ज्याझ्वः दीगु जुल । अले थ्व हे खंयात कयाः एफएम न्यनामिपिनिगु पुचः भिन्तुना खलः व नेवाः पत्रकार राष्टिय दबूपाखें कान्तिपुरय् वनाः नेपालभाषाया ज्याझ्वः बन्द जुगु कारण अले नेपालभाषाया ज्याझ्वः तया तयेमाःगु माग नं याना वःगु जुल ।

 

कान्तिपुर एफएमय् नेपालभाषाया ज्याझ्वः लिकाःगु खँय् भिन्तुना खलः व नेवाः पत्रकार राष्टिय दबू पाखें चिउता तःगुलिं सुभाय् नं । तर जिं न्यने, छाय् ? कान्तिपुर एफएमय् जुइमा वा टाइम्स एफएमय् वा अन्य मेगु छुं नं एफएमय् नेपालभाषाया ज्याझ्वः जक मखु न्ह्यागु नं ज्याझवः लिकायेमा वा तयेमा, व उमिगु प्रशासनिक खँ खः । जिं स्वयेबले उकिइ झीसं चिउता तयाच्वनेगु जरुरत मदु । छु इमिसं उमिगु एफएम न्यनेहे माः धका झीत न्याना तःगु दुला ? उमिगु एफएम मन्यं धकाः झीत ककु ज्वं वःगु दुला ? मदु । थथेहे ज्वःलागु मेगु खँ सगरमाथा टेलिभिजनय् न नेपालभाषाया ज्याझ्वः लिकागुलिं हाकनं निरन्तर प्रसारण याकेगु लागिं धका नेवाः पत्रकार राष्टिय दबू पाखें ज्ञापन पत्र नं लःल्हाःगु खः । तर छु जुल ?

 


झी नेवाःत न्हयावलें न्ह्यागु ज्या न कर्पिन्सं याना बिउसा जिउ धकाः छाय् स्वयाच्वनेगु ? छु झीसं हे छुं याये मफुला ?
अवसर मदुगु नं मखु । नेवाःतय्त लागि धकाः नेपालभाषा अकादमिं नेवाः एफएम चायेका तःगु दु । थ्व एफएम बन्द जइगु अवस्थाय् थ्यनाच्वंगु दु । थ्व एफएमयात झीसं झीगु एफएम याये मफइला ?

 


थीथी एफएमय् नेपालभाषाया ज्याझ्वः न्हयाका वयाच्वंपिं यक्व पासापिं (जि लगाएत) कम ध्यबा कयाः वा का हे मकासें लयताः ज्यामि जुयाः नेपालभाषाया ज्याझ्वः न्हयाका वयाच्वंगु दु । थ्व ज्या थ्व हि चःति नेवाःतय्गु लागि धका नेवाः एफएमयात बिइ मफइ ला ?

 


जिं थ्वहे पौ पाखें सकलपासापिन्त आह्वान याये, नु पासापिं झी सकल मिलय् जुयाः नेवाः एफएम यात जिवन्त यायेनु । सुथय् दँसां निसे बहनिइ द्यने मत्यः तक अझ फुसा २४ घण्टा संचालन यायेनु । सुथय् चायकेगु नेवाः एफएम स्टेशन छकलं बहनि तिनि बन्दयायेगु अवस्थाय् थ्यंकेफत धाःसा एफएम न्यनामिपिनिगु पुचः भिन्तुना खलः लगायत सकल नेवातय्सं मेगु एफएम स्टेशन ट्यून याये हे छाय् माल ?

 


झी झीगु तुतिइ दने । झी धिसिमिसिलाक्क धस्वाये । झी धस्वाये फतधाःसा मेपिं झीगु तुतिइ भ्वसू वइ । सकल नेवाःतय्सं मेगु एफएम मन्यन धाःसा कन्हे उपिं हे वया “न्यँ बा बा न्यँ, नेपालभाषाया ज्याझ्वःन तयाबिइ छकः जिमिगु एफएम नं न्यना बिइमाल” धाः वयेकेगु अबस्था सिर्जना यायेमाल ।

 


थ्वहे अवसर नेपालमण्डल टेलिभिजनयात नं बिइफइ । सारा नेवाःतय्सं नेवाः एफएम व नेपालमण्डल टेलिभिजन जक स्वयेगु खःसा ब्यापारीबर्ग नं विज्ञापन बिइगु लागि आकर्षित जुइ ।

 


बरु झीसं चिउता तयेगु हे खःसा सरकारी स्तरं न्हयाकाच्वंगु सञ्चार माध्यमय् मिखा तयेमाः । झीसं नं पुलातइगु करपाखें संचालित नेपाल टिभि, एनटिभि प्लस, गोरखापत्र, राइजिंग नेपाल आदिस झीगु सः थ्वयेका च्वंगु दु कि मदु ले ? उकि ध्यान तये ।

 

कालिमाटी — सन्ध्या टाइम्स, ११३३ बछलागा ४ मंगलवार

One thought on “नेवाः भासं एफएम : उमित तयेकेगु लाकि झीसं न्ह्ययाकेगु ?

  • May 28, 2018 at 7:25 pm
    Permalink

    पोष्टयाना दिगुलिं सुभाय् । फोटो मिले मजुल ! नेपाल भाषा या ज्याझ्वः न्हयाकिपिं मध्य दकले अपो धेबा दुपिनिगु फोटो जुल ।

    Reply

Leave a Reply

Your email address will not be published. Required fields are marked *

This site uses Akismet to reduce spam. Learn how your comment data is processed.