बुद्धधर्मया स्वंगू ग्रन्थ नेपालभाषां पिदन

झीगु संवाददाता
यल । बुद्धबचन मुनाः दयेकातःगु त्रिपिटकया निगू महत्वपूर्ण ग्रन्थया लिसें पालि नेपालभाषा शब्दकोश शनिबार छगू धार्मिक ज्याझ्वलय् विमोचन जुल ।

 

शताब्दी पुरुष सत्यमोहन जोशीं पालि–नेपालभाषा शब्दकोशया विमोचन यानादिल । अथे हे उपसंघनायक अग्गमहापण्डित डा. ज्ञानपूर्णिक महास्थविरं विनयपिटकया महावग्ग व अभिधम्मपिटकया यमक ग्रन्थया नेपालभाषाय् अनुवाद यानातःगु सफूया विमोचन यााबिज्यात ।

 

थ्व ग्रन्थत मध्ये शब्दकोशय् मू सम्पादक जुयाः दुण्डबहादुर वज्राचार्यं ज्या यानादीगु खःसा महावग्गया अनुवाद उत्पलवर्णा गुरुमां व यमकया अनुवाद विमलञाणी गुरुमांनं यानाबिज्याःगु खः ।

 

ज्याझ्वलय् नवासें ज्ञानपूर्णिक महास्थविरं म्हिगः नां तकं न्यनेमदूगु सफूत आः नेपालय् नं त्रिपिटकया ग्रन्थत अनुवाद यानाहःगुया प्रशंसा यानाबिज्यात । वसपोलं बुद्धधर्मया अध्ययन यायेत त्रिपिटकया हे आधार कायेमाःगु खँय् बः बियाबिज्यात अले भिक्ष्ु शासनया निंतिं आधार जुयाच्वंगु विनय महावग्गपालि अले अभिधर्मया हे छगू ब्व जुयाच्वंगु यमकया नेवाः भासं अनुवाद जूगुलिं आः थ्व कथं हे बुद्धधर्मया अध्ययनय् सकस्यां रुचि क्यनेमाःगु खँ धयाबिज्यात ।

 


अनुवादकत मध्ये विमलञाण गुरुमांनं अनुवाद यायेगु ज्या धइगु अःपु मजू धासें यक्व ई काइगु अले इलय् ब्यलय् मेमेगु समस्या नं वइगु खँ कनाबिज्यात ।

ललितपुर महानगरपालिकया मेयर चिरिबाबुमहर्जनं यलय् च्वंगु प्राचिन बौद्ध सम्पदाया संरक्षण यायेत नगरपालिका न्ह्याबलें न्ह्यचिली धयादिल ।

शताब्दीपुरुष जोशीं थीथी नेपालभाषाया शब्दकोश दयेकेगु ज्यायो इतिहास उलाः कोशदयेकेगु ज्याः धइगु अःपु मजू धासें थुकिं आः नेपालय् बुद्धधर्मया अध्ययन अनुसन्धान याइपिन्त लुखा चायेकूगु खँ कनादिल ।

 

 

उगु ज्याझ्वलय् विमोचन जूगु ग्रन्थत प्रकाशन यायेत थी थी कथं ग्वहालि यानादीपिन्त सम्मान नं याःगु खः । ज्याझ्वः वीर–पूर्ण पुस्तक संग्रहालयया ग्वसालय् जूगु खः ।

Leave a Reply

Your email address will not be published. Required fields are marked *

This site uses Akismet to reduce spam. Learn how your comment data is processed.