बुंगद्यवं छ्वयाहःगु पौ

रा. मानन्धर

साप हे यःपिं स्वनिगःमि किजाकेहेँपिं,
सकल प्राणीया उद्धार जुइमा । स्वस्वं स्वनिगः नं थौं गनं गन थ्यंने धुंकल – साप हे बांलाः । थ्व काय् मियाः च्यः न्यायेगु नीतिं हे स्वनिगः थपाय्कसं मसां थें झ झः धाःगु थें जिं तायेकाच्वना । तःदँ दयेधुंकल छिकपिनिगु नामय् पौ च्वयेगु इच्छा यानाच्वनागु तर छु याये किलं नःगु जाकि, नवःगु नीलः व बासि प्यारा ननं न्ह्याब्लें प्वाः स्याः । बिचाः याइपिनि द्यः तंगु रिपोर्ट जक बिउवँवं लिमलाः, अले झारेयाइम्ह गुरुजुया नं न्हिं न्हिं बाः काःवनेमाः, उकिं म्ह सुख मदयाः पौ तकं च्वये मलानाच्वन ।

छिकपिन्सं सि हे सिउ, थुगुसीया जिगु जात्रा गज्याःगु जात्रा जुल धकाः । जिगु नुगलय् स्यात जुइ, जि तम्वल जुइ धकाः भ्याः भचा हे चिउताः तयादीम्वाः । छिकपिन्सं जितः व लुँ चुइकाहइगु खुसिइ वायेयंकामदिउ – थ्व हे लाख का ।

जिं सिउ, थौंकन्हय् न्हापा थें मखयेधुंकल । न्हापा द्यःतय् निंतिं मनूत म्वाइ, आः मनूतय् निंतिं द्यःत धस्वानाच्वनेमाः । थौंकन्हय्या मनूत साप लिमलाः । गुलिस्यां छेँ बुँ मियाः जापानय् जा थूवनेमाः, गुलिस्यां कलाः काय् ख्वयेकाः भारतय् भारा सिउवनेमाः । थ्व सुकूगंगु स्वनिगलं सुयातं छुं नकेमफुत उकिं थः जिउ थम्हं स्वयेहे माल ।

थथे हे जुयाः थुगुसिइ जिं यक्व न्हून्हूगु खँत नं स्वये खन – जिगु न्ह्यःने गथांमुगःचित छ्वालि क्यंगु नं खन, गुलां भोटो क्यंगु नं खन । म्वाना जक च्वंसा छु छु स्वये दइतिनि धाइगु धाथें खः खनी । आः ख्वपय्तय्सं व यमितय्सं जितः सालायंकूगु स्वयेत नं तःदँ पिइमालीमखुत जुइ ।

भुलचुक धइगु न्ह्याम्हेस्यां जुइ । जिगु नं जुल जुइ । सिइकं चायेकं ला अथे हेपाः मजुया थें च्वं । शिवपुरीयात सेनापुरी दयेकूगुलिं सिमा मन्त, वा वयेके मफुत । छेँय् छेँय् डीपबोरिङ्ग यायेवं बागमति नं बागःचा जुल । यानां जिक्व ला वा वयेकागु हे खः । वा हे वयेकूसां तुकुचा खुसिया सिथय् नगरपालिकां दयेकेबियातःगु ग्वाः पसः दुन धकाः छिकपिं हे रिपोर्ट याः झाइ । आः जिं छु यायेगु?

छु धाये, द्यःया सर्बय् नइम्ह गुथि संस्थानं नं याःगु हे खः । न्हिं न्हिं सुथय् ९ बजे जुलकि तःबहालय् हाजिर याः वनेमाः उमि । धर्म धलय् कर्म कपालय् जूगुलिं ज्या याइपिं बाराहीत व यँवाःतय् नं थौंकन्हय् खः दयेके धालकि छाः किलं ल्हातिइ छाइगु । दोष ठेक्कापट्टायागु नं मखु – सारा देश हे ठेक्कां चलेजू, जिगु खः दयेकेगु चलेमजुइ धइगु खँ मखु । आः ला जिगु जात्रा वलकि जि म्हय् जिउ मदु – ग्वःकः ग्वःकः द्यवं हे फयाकाःथें च्वंक बचय् जुइधुन – न्ह्याबलें जुइ ला?

 

छिकपिन्त जि म्वाल सा म्वाल धयादिसँ, अन जितः वा धयाच्वंपिं दनि । लँ खर्च जक बियादिसँ, जि थः हे वने ।

 

नुगलय् च्वंम्ह द्यः लुमंकाः धयादिसँ – जि थम्हं वये धकाः वयागु मखु, छिकपिन्सं हे वा वयेकेमाल धकाः आसामंनिसें छक्का पंजा यानाः हयादिल । आः ट्यांकरं लः हयाबिल धायेवं जितः लिथु हःम्ह भाःतं थें हेबाय्चबाय् यानादी मजिउगु खः । जितः थौं तक नं जिमि मां, आसामया जनता व अनया उग्रवादीत म्हगसय् वयाः सःताच्वनी । छिकपिन्त जि म्वाल सा म्वाल धयादिसँ, अन जितः वा धयाच्वंपिं दनि । लँ खर्च जक बियादिसँ, जि थः हे वने । तर छिकपिन्सं जितः छ्वयादीमखु धइगु जिं बांलाक सिउ । जिगु थ्व ख्वाःपाःचा ब्वयाः छिकपिन्सं दच्छिया गुलि कमाइ यानादी धइगु लेखा समितिं मस्वःसां जिं स्वयाच्वनागु दु । धन्दा कयादीमते, छिकपिनिगु फ्वनाः नयेगु धौभ्यगःचा जुयाः जि थन हे च्वनाच्वने ।

अथेसां जिकय् छगू उपाय दु । नगरपालिकायात धयाः दँय्दसं जिगु जात्रा न्यायेकेत छगू टेण्डर पिकयादिसँ । द्यः हयेगु, खः दयेकेगु, देय् चाःहीकेगु , जावलाभ्वय् न्यायेकेगु, प्वाकलं क्यनेगु व लित यंकेगु ब्याक्कं ज्या व कम्पनीयात बियादिसँ । अले जात्रा ज्वःछि जूगु कमाइ बुंगया पान्जुत, बाराहीत, यँवाःत, क्रेन, बुलडोजर थुवाःतय्त व नगरपालिकायात भागं थछि इनादिसँ । बरु थ्व टेण्डर नेवाःतय्त मलाकुसे खय्त बाय् मरस्यातय्त लाकूसा बांलाइ – छाय् धाःसा उमिगु ज्या क्वातु, इलय् नं सिधः । सत्ते सत्ते, जितः छुं हे म्वाः । गंगु प्यारा व प्लाष्टिकया स्वां दुसा गाः । व स्वयाः ला नखुइ थ्यने न्ह्यः जिगु म्ह जक कुचा मजूसा गाः ।

थौंयात थुलि हे, मेगु लिपा ।

बुंग द्यः ।

(बुंगद्यः क्वःदःगु सन्दर्भय् च्वयातःगु  थ्व ध्याचु च्वसु सन्ध्या टाइम्सय् २००० अगष्ट ६ कुन्हु पिदनेधुंकूगु थन हाकनं साभार पिथनागु जुल )

Leave a Reply

Your email address will not be published. Required fields are marked *

This site uses Akismet to reduce spam. Learn how your comment data is processed.

%d bloggers like this: