३३ किलो लुँया अपराधीततय्त ध्वाइँ ध्वाइँ यायेमाल, मखुला?

राजमाया पुतवार

जिं थौंतक ३३तोला लुँ मखनानि । थौं थन ३३ किलो लुँया खँ जुयाच्वंगु दु । थ्व ३३ किलो लँु धइगु ३३ किलो भोग्त्या स्वयाः झ्यातुइ ला?

 

नेपालीतय्के दां मदु दां मदु धाइ तर थन हे ३३ किलो लुँ झिके यायेफुपिं दु । याइ, वइ, खँ मिलेमजुलकि ज्वनी नं । तर व लुँ सुयागु धकाः धायेफइमखु । लँय् न्हि हुयातःगु रुमाल छकू सुयागु धकाः न्यंसा ला जिगु जिगु धकाः ब्वाँय् वइपिं ग्वःम्ह मछि दइ । तर थन ३३ किलो लुँ सुयागु धालं हे जिगु धकाः कायेत वःगु मदुनि । अाखिर थःगु धाये मछिंगु नं सम्पति दइ खनी मनूतय्के ।

 

आः खँ वयाच्वन । व लुँ धइगु तस्करी यानाहःगु अले लुँ धाःसा ज्वन, भरियात नं ज्वन तर सुनां झिकेयाःगु, सुयात माःगु अले गन थ्यंकेमानिगु धइगु धाःसा खँ पिहाँ वयाच्वंगु मदुनि । अथे याये?

 

खय् भासं लहरो तान्दा पहरो गर्जिने धाःथें ३३ किलो लुँ तस्करी या बुखं थौं राजधानी बय्बय् जुयाच्वंगु दु । थुकिं भरियात ज्वन, आः पुलिसत नं ज्वनाहयाच्वंगु दु । तर व स्वयाः च्वय्या तप्काया मनूत क्यनेमछिना च्वनतिनि । थ्व काण्डय् सरकार हे गर्ल्यामगुर्लुम ढलेजुइगु सम्भावना दु धकाः धयाहःगु दु । । धाथें थ्व लुँ तस्करी को जाः गपाय् जाः जुइ हला? छकः पत्रपत्रिकाय् हल्लाखल्ला जुयाः हानं सामसुम व थामथुम याःगुलिं पत्रपत्रिकां च्वहे मच्वयेधुंकूगु खँ नं आः निगूगु चरणया अनुसन्धान जुयाच्वंबलय् थुकिया अन्त तक वइबलय् सुयासुयागु सुरुवाः त्वकीगु जुल धकाः अस्यःतय्सं धयाच्वंगु दु । थुकिया जालं आः धमाधम ख्वा यचु नुगः वँचुतय्गु ख्वाःपाः प्वला हयेखंसा देय्यात दुनें दुनें नयाः ध्वगिकूपिं नेतातय्गु सक्कली ख्वाःपाः दक्वस्यां खनी ।

 

देय्यात हरेक अशान्ति व असुरक्षा पाखें रक्षा यायेमाःपिं पुलिसत हे रक्षक हे भक्षक जयाच्वंगु खनेदयावःगु दु। आः थुलि जुइधुंकाः नेतातय्त व पत्रकारतय्त तकं साप यःगु नेपाःया प्रहरी संगठनया दुनेया रहस्य उलाहयेगु अवस्था वःगु दु । आः अनया चेन अफ काण्डया व्यवस्था, अथवा, च्वय्या निर्देशनं क्वय्या पुलिसतय्सं ज्या याइ धइगु नियम अन दुला कि मदु, अले थ्व लुँ तस्करी कण्डय् आः ज्वंपिं पुलिसतय्त जक ज्वनाः खँ रफादफा यायेगु लाकि व स्वयाः च्वय्या प्रहरी अधिकारीत नं अनुसन्धानया चाकलय् लाइ व ला स्वये हे मानि । तर उकिया लिसें, देय्या प्रहरी संगठनयात थपाय्जि आर्थिक घोटाला याकेत छुट बिउपिं चुनाव त्याकावनागु धकाः न्हाय् फुलेयानाच्वंपिं सरकारय् च्वनाच्वंपिं मन्त्रीत व मेमेपिं नेतातय्त नं थुकिं सालाकाइ धकाः नं मनूत पियाच्वंगु दु ।

 

थुकिया जालं आः धमाधम ख्वा यचु नुगः वँचुतय्गु ख्वाःपाः प्वला हयेखंसा देय्यात दुनें दुनें नयाः ध्वगिकूपिं नेतातय्गु सक्कली ख्वाःपाः दक्वस्यां खनी ।

 

खयेत ला भ्रष्टाचारया द्वपनय् जेल च्वनावःम्ह खुमबहादुर खड्कायात स्वांमालं क्वखायेकःवनीपिं चाकरत दूगु देसय् नेतातय्त जेलय् हे तयाः नं उमिसं भचा धकाः नं लज्जा चाइ धकाः ला विश्वास मदु, तर उमि काय्म्ह्याय्या पासापिन्सं, ससः वा थःछेँखलकं सिइमाल, कि उमि ततःधंपिं नेतात धाःपिं अज्याःगु अपराधिक ज्याखँय् तक्यनाः ध्यबा कमेयानाच्वंगु धकाः । मखुसा नियम कानुन अले सजाय अदालत धइगु हे म्वाः ल ।

 

देय्या धुकुतिइ छुँ जुयाः वनाः राजस्व वनेमाःथाय् मवनेकथं ज्यायाना जुइपिं तस्कर त व वया मतियारपिं सरकारया मन्त्रीत, नेतात, पुलिस व कर्मचारी दक्वसित माःहनाः हे यंकूगु स्वयेदयेमाल जनतां । तिंख्यलय् दक्वसित झ्वःलिक तयाः ध्वाइँ ध्वाइँ यायेफुसा अझ बांलाइ । मखुला?

Leave a Reply

Your email address will not be published. Required fields are marked *

This site uses Akismet to reduce spam. Learn how your comment data is processed.