खुसिबुँया पासा नाप

दुर्गालाल श्रेष्ठ

थुगु थाय् थौं नं खःनि खुसिबुँ हे
न खुसिइ खुसि दनि , बुँइ न बुँ हे
थःत ज्यापु हे धैच्वन छं नं ,
न बुँया दनि छुं छंके नँ हे ।।

खः , दुःखी निश्चय नं छ म्हिगः
अय्‌नं छंगु व दुःख-भुलिं
अमृत ज्वःगु व संस्कृतिया ति
मद्दिक ज्वै वः सिलिं-सिलिं ।।

 

मखु न्हां अन्न धुकू जक हे बुँ
संस्कृतिया नं खः व मुहान
फुक्क सिबय् ला चां बुरुबुरुपिं
ज्यापुत हे खः जीव महान ।।

वा जक सै थाय् सैवं वल छेँ
जुइफु उकिं छ करोडपति
हाय ! अनं तर गय् बाः वइ आः
देय्‌या संस्कृतिया लुँहिति ।।

Durgalal Shrestha

थःगु पहः हे थःके मदय्‌वं
चीमि छ जुइ धन न्ह्याक्व दुसां
फ्वग्गिं हे जुइ देस मदय्‌वं
झल्ल छ्यनय् श्रीपेच दुसां ।।

अस्तमि तछलागा , ११३३

Leave a Reply

Your email address will not be published. Required fields are marked *

This site uses Akismet to reduce spam. Learn how your comment data is processed.