च्वाकिं व च्वापुका: – १

बिदिसि स्यस्यः

(च्वाकिं व च्वापुका: छ्कू क्वथाय् च्वनाच्वनी | मत मव:गुलिं लोडसेडिंग मनं मनं सराप ब्युब्युं निम्हं खिउँथाय् भुलूखात थें त्वालां च्वना: गम्भीर बहस यानाच्वनी |)

च्वापुका:     मखु अय् च्वाकिं….थ्व झी राष्ट्रपति छु जूगु हँ ?

च्वाकिं:      गय् छु जूगु धैगु…..बुरा जूगु का….उलि नं मस्यूला छं |

च्वापुका:     बुरा जूगु धका: छं धयाच्वने मा:ला व…..वैगु ख्वालं….वैगु शरीरं हे क्यना च्वंगु दुनि…..

च्वाकिं:      अले थज्या:गु साधारण खँ नं गम्भीर जुया: छाय् न्यना च्वनेमागु ले जिके ?

च्वापुका:     जिं ला खाली थ्व राष्ट्रपति छु ख: धका: जकं छंके न्यनागु का |

च्वाकिं:      क:…..छु न्यंगु जुइ….राष्ट्रपति छु ख: हँ ! राष्ट्रपति उया कला:या भा:तका….यानि पति….अले आया: शितल निवासया घरपति….थज्या:गु खँ नं ध्याच्वने मा:ला…..

च्वापुका:     हरे…….थ्व च्वाकिंचित नं भौं भौं दाये मास्तेवैगु….मत मव:गुलिं अथें टेन्सन जुयाच्वंबले….हानं थज्या:गु खँ ल्हाना: डबल टेन्सन बिया च्वनीगु का…..

च्वाकिं:      छु थ्व डबल टेन्सन धैगु…..डबल टेन्सन धयाच्वने मा:ला व….हिसाब मस:म्ह थें….डबल धैगु दुई जुल, टेन धैगु १० जुल, सन धैगु काय् जुल…..२×१०=२० काय्…..यानेकि नीम्ह काय् धयाछ्व:सा खँ हे सिध:गु नि…..जान्या जुया: इंग्लिश खँ ल्हायेमा:….

च्वापुका:     मखु, अय् च्वाकिं…..छं छु थौं भांग त्वना वइगु ला हाँ…..आम्थे लटरपटर खँ ल्हायेत जिं मात्र राष्ट्रपतिं व अध्यादेशया बारे छाय् वास्या वास फ्वास्या फ्वास्या यानाच्वंगु जुइ धका: न्यनेत्यनागु खँयात….छं ला बरा मखुगु ढंगं जेरी थें गुंइं गुंइं नीकल बा…..

च्वाकिं:      ए……जिं खँल्हायेबले चाहिं छन्त गुंइं गुंइं नीकूगु जुइगु, अले व पार्टी सार्टी धा:पिन्सं चाउचाउ थें कुलीकुली चिंकूगु यात छं धायेम्वा:गु का….मखुला छं ?

च्वापुका:     हाँ…..छु धा:गु जुइ थ्वं….मखु छं धाये त्यनागु छु ? पार्टी सार्टी तय्सं नेता सेता तय्सं चाउचाउ कम्पनी चायेके त्यन धाये त्यनागु ला कि छु ?

च्वाकिं: हे भगवान ! थ्व च्वापुका: चित धा:सा खँ हे थुइके थाकु….हलू धायेधुंका: नं कुतिं न्याना का स्व थ्व हलू का न्हां धका: क्यना च्वनेमा:गु का….

च्वापुका:     क्यना च्वने म्वा:लिइला ले ?….थन खँ हे अज्या:गु जुइगु……व राष्ट्रपतियागु हे खँ का ले…..राष्ट्रपतियागु ज्या खालि थुलि जक न्हां धका: किटान साथ धयात:गु दयेक दयेकं….ग्वले सा ? वं अध्यादेश छ्वक्व छ्वक्व पतिकं अथें लित छ्वया हयाच्वंगु दु थें | स्वीकृत मया: थें…..

च्वाकिं:      अथे हे जुया: ला नेता सेता तय्सं थ्व खँयात चाउचाउ थें कुलीकुली चिंकूगु धैगु….कुलीकुली चिंगु सँ छ्यनेत गथे थाकुइगु ख:….गथे जत्तासत्ता जुइगु ख:….अथे हे सत्ताय् च्वने मखंपिन्सं थ्व अध्यादेशया बारे नं म्वा:मदुगु हौवा खडा यानाच्वंगु….अ:पुगु भ्वंयात नं थाकाच्वंगु |

च्वापुका:     स्व च्वाकिं…..थ्व थाकीगु थिकीगु….थायेगु थीगु धैगु खँ बांला:गु मखु….कथुइ क्वंय् थातकी…..छु जुइ मस्यूला छं ?

च्वाकिं:      छु जुइ आ:…..कथुइ क्वंय् थातकि……सास: ल्हाये मफया: तुम्पाकुं छ्यांय् जुइका |

च्वापुका:     का….अय्सा तुम्पाकुं छ्यांय् जुइगु हे जूसा….सीबाजं थाइपिन्त तयार जुयाच्वं धा:सां जिल मखुला ?

(उबलय्ज लाक्क फ्वाक्क मत च्याइ | निम्हं दंग जुइ |)

च्वमिया ब्लग पाखें साभार कयागु जुल । किपा साभार फेसबुक

Leave a Reply

Your email address will not be published. Required fields are marked *

This site uses Akismet to reduce spam. Learn how your comment data is processed.