ब्याग्जाः जुयाः बूगुली जिं भोगेयानागु खँ

रुकशाना कपाली

छम्ह ब्याग्जाः(transgender) जुयाः बूगुली जिगु जिबनय् छु छु भ्वगेयाये माल धकाः कने मास्ते वल। नेपाल सम्बत १११९ चिल्ला १९ (सन् १९९९ मार्च ४) कुन्हु जिगु माचाछिइ न्हापांम्ह बायचा मचा(male child) जुयाः जि बुल। तःधङ्गु माचाछिइ जिगू मचा-ई जिमे बाज्यय बाज्याया म्वलय् वन। जिमि निनिं उबले जिगु नां क्रोजन धकाः तयाबिल धाःसा निदँ दुबलय् इदेन गार्देन बोर्दिङ स्कुलय् भर्ना जितः भर्ना यानांबिल।

मचाबलय् निसें हे जितः मिसापहः वयेगु ज्या याये न्ह्याः। जि सिबें च्याला थकलिम्ह जिमि तता दु(तःमाया म्हाय्)। अथे जुयाः व लिसें म्हितेगु ह्वःताः नं दत। जितः जिमि मामं मेक-अप यानादीगु स्वये यः। जिं भासं स्यूगु उमेरं निसें जिके मिसापह दु अलय् थः मिसा जुइयःगु खँ स्यू।

स्कुलं छेँ वये धुङ्काः गुरुबापिं सिबें गुरुमांपिं थें पहः कयाः सनांजुइ तस्कं यः। जितः अझं लुमं जिं छेँय् जुइबलय् न्ह्याबलें जिमि बज्येया पर्सि कापः हिनां जिमि निनिया ग्वालि दूगु लाकां न्ह्यानां स्कुलया गुरुमापिं थें सनाजुया। साउन वल कि जिमि ततापिं थें जि नं वनां मेहेन्दी तयेगु ल्हाः छपातं चुरि न्ह्यायेगु तस्कं यः। मिजंपिन्सं थथे याइमखु धाःसा ख्वयाः हे यायेगु याना। न्यादँ मदुतिले सँ चाकेमज्यू धाःगु मान्यतां यानां जिं सँ ताःहाकः लहीखन अले सतबत चिनांजुइ नं नन। जि बायचा जुयाः बूगुलिं जिं मिसापह वयेक सनांजुइगु यक्वस्यां मयः। जिं अथे सनाजुइबलय् ख्वाः हासा थें याइपिं, ख्वाः स्यङ्कीपिं मदुगु नं मखु।

मिजंपिन्सं सँ लही हसिबसि मजू धकाः निगू तगिमय् ब्वनांच्वनाबलय् सँ चाकल। उबले मेगू उपाय हे मदु थें।

न्यागू तगिमय् आखः ब्वनाच्वनाबलय्
मेपिं मस्त गथे हुर्केजुयाच्वन, जि नं उगु कथं हे जि नं हुर्केजुयाच्वनागु खः। जितः जि मेपिं सिबें पाः धयागु आभास अझं मजूनि उबलय्। तर छन्हु जिमि स्कुलया पासां “छ ला गयौ मिसापिं थें प्यं सङ्काः न्यासे जुइ खनिं हला” धकाः धाल। उबले मचा हे तिनि। उया खँय् उलि ध्याउन्ना नं मवं। जितः प्याखं हुले नं तस्कं हे यः। छेँय् तिभिइ म्येँ हायेकाः प्याखं नं हुलेगु याना। व इलय् छकः क्लासय् इहिपा बारे खँ जुल। उकेया बारे खँ ल्हाइबलय् जि मिजं मचा जूगुलिं जिं कलाः ब्याः यायेमाः अलय् अबु जुइमाः धाःगु खँ कंबलय् नुगलय् गनं गनं म्हाइपु ताल। अलय् एक्क बिचाः यानां जि कलाः जूगु जूसा छु जुइ हला धकाः बिचाः यानाबलय् धाःसा नुगलय् यइपु ताल। भाःत जुइ ला अँह मयः जुइ धैगु खँ नुगलय् लुल।

खुगू तगिमय् आखः ब्वनाच्वनाबलय्
ल्यायेसु(खय् भासं किशोरावस्था) दुतिनेगु उमेर थ्व खः। थ्व न्ह्यबः स्कुलय्‌ मिजं छखे मिसा छखे मच्वं। तर ल्यायेसु त्ययाःवसलें मिजं छखे च्वनेगु मिसा छखे च्वनेगु जुयाःवल। जितः धाःसा मिसापिं नापं मिसापिनेगु पुचलय्‌ वनां च्वनेयः। तर जितः छ ला मिजं खः मिजंपिं नापं च्वं हुँ धकाः धाइगु। जितः धाःसा मिजंत लिसें च्वने उलि मछिं ताः, तर अयनं मिजंत लिसें च्वनेमाःगु बाध्यता नं दु। अले बुलुहुँ जिम पासापिन्सं जितः जिगु बानि ब्यःरा मेथी हे खङ्काः हल। जिं ला मिसापिं थें न्वं वाइ, मिसापिं थें न्यासि जुइ धकाः धाल। जितः नुगलय्‌ भाराक्क मिन। जिगू नितिं ला मेपिं गथे हुर्केजुयाच्वङ्गु खः जि नं अथे हे हुर्केजुयाच्वनाम्ह खः। पासापिन्सं जिगु बानि ब्यःरा मिजं जुयाः नं मिसा थें धकाः धाःबलय्‌ नुगलय्‌ भुखाय्‌ दन।

न्हयगु तगिमय् आखः ब्वनाच्वनाबलय्

थ्व ई जिं थःथम्हं मालाच्वनागु ई खः। जिं मेपिं थें मखु धकाः जिं थुइधुङ्कल। जिगू बानि ब्यःरा मिसापहः वः धकाः जिं सीधुङ्कल। थ्व स्यू बलय् नुगः छकः कुतुक्क मिन। तर जि ला छगू थज्याःगु समाजय्‌ हुर्केजुया गू समाजय्‌ छम्ह बायचा मचा(male child) बुल कि व मिजं(man) जुइ अलय्‌ छम्ह मायचा मचा(female child) बुल कि व मिसा(woman) जुइ धकाः स्यनातःगु दु। जितः ला नुगलय्‌ तस्कं ग्वलमाल जुल। पासापिन्सं न्ह्याबलें “छ ला तस्कं मिसापहः वः” धकाः हायेकेगु यानाहल। हायेकेगु जक्क मखु कि तस्कं क्वह्यङ्क ह्यपेयानां खँ ल्हायेगु यासें जितः खँ ल्हाय्‌ न्यासे जुइ हे मछाला वल। छता खँ न्वं वाःसां “ए गयौ मिसा थें न्वं वाःउ” धकाः धाये हे धुङ्की। अनं अन तक्क न्यासे वं सा “छे गथे मिसापिं थें न्यासे जूगु” धकाः खँ न्य हे न्यङ्की। थथे तच्वकं जूबलय् जिं थःयातः बांलक्क क्यँ हे मक्यना। गुमसुम जुयाः च्वनेगु, भतिचा जक्क न्वंवायेगु याना हया। उलिं मजिल धकाः मेपिं मिजं पासापिं थें नक्कल यायेगु नं यानाहया। मेपिं मिजंतयेसं गथे यानां न्वंवाइ गथे यानां न्यासे जुइ अथे नक्कल यायेगु नं स्वया। तर थुकें जिगू नुगः गुबलें लयमताः। दुनुगलं धाःसा न्याकुं कयाः न्यासि जुइ धकाः घ्वानाच्वनिं धाःसा हाकनं मेपिन्सं छुं धाइला धकाः उकियात क्वतिलाःतयागु नं खः।

आः ला पासापिन्सं जितः “छक्का, हिज्रा” थें जाःगु कुनां बिल। अथे धकाः सतू बलय्‌ ला झन हे नुगः तस्कं ख्वल। जि स्कुलय्‌ आखः ब्वंवनेगु सिबें अज्याःगु अपहेलनां गथे बचेजुइगु धकाः अप्वः ध्याउन्ना वन। तर अझं जिगू नुगःया म्हसिका संकत(Identity crisis) मवंनि।

च्यागू तगिमय् आखः ब्वनाच्वनाबलय्

थ्व इलय् जि ल्यायेसु अवस्थाय्‌ थ्यन। जितः नं म्हया ह्यूपाः व भावनाया ह्यूपाः जूगु अनुभव जुयाःवल। गथे कि येचा भावना वयेगु, येय्‌चा दनेगु जुयाः वल। दकसे न्हापां ग्वाय्‌ वःबलय्‌ तस्कं मछिं थें ताल। म्ह सँ वःगु खनां ला तस्कं घच्यापू ताल अलय्‌ थथे मजूसां ज्यू नि थें च्वन। अझ सः नं हिलेगू ई। घ्वंसः जुयाः वःबलय्‌ मजूसां ज्यू नि थें अनुभव जुल। जिगू नितिं जिगू दुनुगः व जिगू म्हया स्वापू जिं मखन। आः थुके ला जिगू नियन्त्रण मदु। अथे हे अनुभव जुयाः च्वङ्गु झ्वलय्‌ भाइरल जूगु बुखँ वल, “सन्तोप पन्तया काय्‌ आः म्ह्याय्‌ जुल“। जितः नं थ्व बुखँ स्वयाः छु जुइ धकाः ब्वनास्वया। ब्वनाबलय्‌ वं धयातःगु आपलं खँ जि नापं मिलेजू खनिं का। उगु बुखँ ब्वनेधुङ्काः जिं “त्रान्सजेन्दर”(transgender) धाःगु खँग्वः म्हसीका।

उगु खँग्वःया आधारय्‌ जिं इन्तरनेतय्‌ वनां थुकेया बारे यक्व मालेज्या याना। न्हिं न्हिं साइबरय्‌ वनां अन धकाः मालेगु, अलय्‌ अनं तिनि बुलुहुँ जि छु खः, जि सु खः धैगु खँ थुयावल। उकें जाः व यचा म्ह्वःल्याः (gender and sexual minorities) धाइगु दु, अलय्‌ उके नं ज्वःयचा (homosexual), ज्वःबिज्वःयचा(bisexual), ब्याग्जाः(transgender) व मैंबाबु (intersex) दैखनिं का धकाः सिल। जिं यचा(sex), जाः(gender) व यचा क्वसाः (sexual orientation) बारे थुयाः वल। जि ला ब्याग्जाः खनिं अलय्‌ जि याकःचा मखु जि थें जाःपिं। यक्व यक्व हे दु धकाः नं सिल। अनं जिं न्हिं न्याघौ ला इनतरनेतय्‌ मालाः थ्व बारे यक्व ग्यां कया। छिसं नं थुइके न्ह्यां सा थ्व च्वसु ब्वनादिसँ: जाः व यचा म्ह्वःल्याः धयागु छु खः?

अलय्‌ जितः ला मिजंपिं हे यः धाइगु अनुभव जुल। थ्व नं जिगू जिग्यासाया हुनिं खः। मिजं पाखें भावना कथं, यचा कथं, मतिना कथं क्वसाह्गु खँ थुल। आः थ्व भावनायातः खँग्वलय्‌ ग्वय्‌ मसल। अनं यचा संकिपा(porn) स्वयेगु याना। उके छम्ह मिजं व ब्याग्मिसां(transgender woman) गथे यानां ज्वःचिनी धकाः सल। थ्व भावना जिं जिगू क्लासया मिसापिन्तः कनाबलय्‌ जिम्सं घच्यापुकल। तर जिम छम्ह पासा गरिमा धाइम्हं जाः व यचा म्ह्वःल्याः बारे स्यू खनिं।

अलय्‌ फेसबुकय्‌ छता अकाउन्त दयेकाः। उके नां थाय्‌ फुक्क मेगू तयाः, थःगु किपा नं मतया। उके धाःसा जि छम्ह ब्याग्मिसा(transgender woman) खः धकाः म्हसिका क्यना। अलय्‌ मेपिं जाः व यचा म्ह्वःल्याःतयेतः पासा याना। तर व अकाउन्त जिं उलि मछ्यला। अन यक्व जाः व यचा म्ह्वःल्याः मनूत लिसें खँ जुल। यक्व मिजंतयेसं जि ब्याग्मिसा धकाः सीखतुवं ज्वःचिनेगु प्रस्ताव जक्क तयाः दिक्क चाःगुलिं व अकाउन्त दिलित याना।

गुगू तगिमय् आखः ब्वनाच्वनाबलय्
स्कुलय्‌ हायेकेगु व ह्यपेयायेगु तःच्वयाः वन। जितः सह याय्‌ तस्कं थाकुल अलय्‌ छन्हु जिं क्लासय्‌ सकसिया न्ह्यःने धया, “जि छम्ह ब्याग्जाः खः। छिम्तः छु झ्यातुल?” अलय्‌ न्ह्यात ल्वायेगु दिं। व ल्वायेगु धकाः दायाः ख्यानां मखु, थःगु म्हसिकाया नितिं थः बःलानां धिसिमिसि जुइक दनां ल्वायेगु ल्वापु खः। स्कुलय्‌ न्हिंन्हिं थःगु जाः म्हसिकाया नितिं ल्वायेमाल। स्कुल ला बांमलाःगु म्हगस थें जुल। पासापिं लिसें हालेगु, इम्सं ग्याःख्याः(bullying) यायेगु, जवाःसवाः(argument) यायेगु न्हिंन्हिंया ज्याखँ थें जुल। जितः स्कुल धाल कि मिखां ख्वबि वैगु अवस्था वयेधुङ्कल। छेँ कनेगु धकां गथे कनेगु छकलं अज्याःगु खँ। छकः निकः ला थः सी नं मास्ते वःगु खः उबलय्। जि आपलं याकःचा हे च्वना। मेपिं सुनां स्कुलय्‌ जिगू भावना थू? गुबलें जितः लखं लुइ। गुबलें दस्तर व पेनं कयेकाःहै। गुबलें आलु, मल्तां ताकं कयेकाःहः। तुति सालाः स्वानय्‌, याय्‌ जिक्व हे जूगु खः क्लासय्‌। इमेगु ब्वलिं जितः न्हिंन्हिं ला नयेगु ज्या यात।

इन्तरनेतया माध्यमं जिं नील हिरा समाज धाःगु संस्थाय्‌ स्वापू नं तया अलय्‌ छम्ह निम्ह जाः व यचा म्ह्वःल्याः नापं म्हसीका। उबले ला अन नं यक्व मवना। स्कुलय्‌ जितः जुइगु ब्यःरां यानां जि यक्व त्वःत्वः चिनां स्कुलय्‌ गयल नं जुया। मेथाय्‌ धायेतः नं सु हे दु या? जितः फेसबुकया दुनिया धाःसा नुगलय्‌ क्वथ्यू। अन जाः व यचा म्ह्वःल्याःपिं नं दु, मेपिं नं दु सुनां जितः समर्थन याः, जिगू भावना थू। अथे जुयाः धात्थेंया दुनिया सिबें उगु फेसबुक दुनियाय्‌ क्वथ्याःगु खः।

गुगू तगिं सिधैथें च्वंबलय्‌ जिं थःगु जाः म्हसिका बारे फेसबुकय्‌ च्वयाबिया। थःथितितयेगु फोन वये हे धुङ्कल। गुलिस्यां ला छं नातक जक्क याःगु, थ्व ल्वय्‌ खः धकाः तच्वकं ब्वःबिल। कतःपिन्सं ययःथे धाय्‌मा, थःपिन्सं भतिचा धाःसां नुगलय्‌ स्याइ। थः मनूत, थः माचाछि, थः पासाभाइपिन्सं थःयातः ल्याःचाः मतल कि व सिबें नुगः चःहिलीगु अवस्था गुबय्‌ जुइ? मां बां नं फेसबुक छ्यलामदी, अथे जुयाः स्यूगु खः ला मखु ला।

तर सुनां मखङ्क छेँय्‌ सुं मदुबलय्‌ जिं मिसा वसः पुना। व वसःत जिं न्हापा च्यागू तगिमय्‌ ब्वनाच्वनाबलय्‌ न्यानां स्वःथनातयागु खः। उबलय्‌ जिमे बाज्याया बुदिं। छु मती लुल अथें व मिसा वसः पुनां पिहाँ वनाबिया। जि व जिमे मा बा च्वनाच्वनागु छेँ व जिमे बाज्या बज्यय्‌ च्वनाच्वंगु छेँ स्वखा प्यखा छेँ पाः। जितः अथे मिसा वसतय्‌ छकलं खंबलय्‌ थःथिति, जःलःखःलः, मा बा व फुक्क मनूत वातां जुल, अकमक्क जुल। जिं न्हाय्‌पं जाय्‌क गुलि खँ न्यने माल गुलि। उकेया सिलसिला मद्यू।

उबले यक्वस्यां धाल ब्याग्जाः पिनेगु इहिपा जुइमखु अलय्‌ मस्त दैमखु धकाः। इम्सं तःताजि यचा क्वसाः बारे अझं मथूनि। ब्याग्मिसा ययेकीपिं मिजंत नं दु। तर समस्या गन धाःसा थ्व समाजं अज्याःगु ज्वरियातः नालीमखु, अथे जुयाः सुइतं कनिंमखु। समस्या कानुनय्‌ नं खः कि जिमेगु इहिपायातः नालीमखु। खः जि ब्याग्मिसा जूयाः जितः मिजं हे यः धाःसा जिगू व व मिजंया मचा बुइमखु। मचा दयेतः पुसाकी(शुक्रकीट) व मचाखेँय्‌(पाठेघर अण्डा) ल्वायेमाः। थ्व मजुइगुलिं मचा दैमखु। थ्व वास्तविकता खः। थुके मछालेमाःगु छु दु? जिम्सं अथे यानां मचा मदुसां मां अबु मदुपिं मस्तयेतः छेँ बियाः माचाछि दनेज्यू। जिगू बिचाः थथे हे दु। तर थ्व केवल जिगू जिबनया योजना जक्क खः। इहिपा मजुइकं, मस्त मदयेकं सुं मनूया मूताः हे दैमखु धयागु सामाजिक धापूयातः त्वःथुलेमाः।

छेँय्‌ म्हसिका पिब्वयाः झिगू तगिमय्‌ ब्वनाच्वनाबलय्‌

जिं थःगु म्हसिका पिब्वय्‌ धुङ्काः यक्व थाकुल। जिम मां बां नं थथे याय्‌मते धयादिल। छेँय्‌ यक्व ल्वापु ख्यापु नं जुल। जितः स्कुलय्‌ नं फ्रक सिनां सँ लई मं दूगु खः। तर जिमे स्कुल हामां(प्रिन्सिपल) नं स्कुलं पितनेगु ख्याचु बिल।जितः यक्व दा नं दाल। स्कुल थुवाःया हिसाबं, “थ्व जिगू स्कुल खः। थन जिं यसें जुइ। छं थथे यानां जुल जि छन्तः एस.एल.सी. बीकेछ्वय्‌मखु।” धकाः धम्की नं बिल। छन्हु जितः लँय्‌ फ्रक सिनां जूगु नं खन थें मेगु दिनय्‌ स्कुलय्‌ जितः बांमलाक्क दाल।

जितः गज्याःगु ब्यःरा यात जिं व धयां साद्य मजू। जितः दाल, ब्वःबिल। जिगू चिचाधङ्गु गल्तिया त्वः कयाः ब्वःब्यु ब्युं हाकनं जि ब्याग्जाः जूगु खँय्‌ यङ्काः अझ तःच्वकं ब्वःबीगु दायेगु याःगु खः। स्कुल थुवाः थें जाःम्हं थज्याःगु ब्यःरा याःबलय्‌ पासापिन्तः ला झन हःपाः दत जितः बांमलाःगु ब्यःरा यायेतः। स्यनामितयेतः जितः गुबलें बांमलाःगु ब्यःरा यानामदी। वयेकःपिन्सं बांलाक्क हे कयादिल। छम्ह निम्ह पासापिं नं “हेला नं मयाः तर य नं मयः” थें याइगु। जितः ला गुबले थ्व स्कुल ब्वने सिधै अलय्‌ थनं मुक्त जुइफै धकाः दिं ल्याः खायेगु याना। व स्कुल मखु जिगू युद्दभूमी खः।

हाकनं जिमे थःथितिपिं। जिगू बारे सियाः तच्वकं लाःलाःथे हे धाल। इमेगु महिमये भावना ल्ह्वल। छु छु धाल यात धकाः कनधाःसा कनां कना जुइमखु। सुनां ल्हाः तुति चिनां लच्छि क्वथाय्‌ कुनेमाः धाल। सुनां लच्छि द्यांलाकाति धकाः धाल। मधाःगु छुं मदु थें। लुमङ्कां साद्य नं मजू। सामाजिक संजालय्‌ जाः व यचा म्ह्वःल्याः बारे बारम्बार च्वयाच्वना।

लँय्‌ जुइबलय्‌ बांमलाःगु धाइगु हे तस्कं थाकुगु ई खः। लँय्‌ जुइगु ला अपराध थें या! मनूत फुक्क जितः भ्वाइँ भ्वाइँ स्वैगु, न्हिला हैगु, जिगू नामय्‌ खँ ल्हाइगु तःच्वल। ल्यूनें जितः खं सा “का स्व ले व स्व व” धकाः ब्वँय्‌ न्ह्यःने वनां एक्क कुनय्‌ बिसिलाः जिगू ख्वाः स्वै अलय्‌ मजाक दयेकाः न्हिली। साप्रा वयाथें मङ्गल ग्रहं कुहाँ वयाम्हथें ब्यःरा जू। न्हापां ला तं पिहाँ वयाः इम्तः ब्वःबीगु म्हुतु ल्हायेगु याना, लिपा थुल कि खिचा खिइ अपां कयेकल कि थःयातः चीचाय्‌ वै। अलय्‌ सुङ्कः थः लँय्‌ जुया। अयेनं सुख मदु। ब्याग्जाःपिन्तः लँय्‌ जुइगु ला बांमलाःगु म्हगस थें खः। छेँय्‌ व स्कुलय्‌ जक्क मखु, लँय्‌ जुइगु हरेक पलाय्‌ जिगू नितिं कं थें तिइ। व ई ला तस्कं बांमलाःगु। आः नं गुबलें गुबलें जू। छकः निकः ला इम्तः मुतुइ लाक्वं प्यङ्काः थःगु औकात क्यने धाइथें कुनु कुनु मिं। खिचां न्यात धाय्‌वं थःम्हं न्याय्‌ मजिल थें।

छ्यं ल्ह्वनां गर्भ तायेकाः छेँय् ला वना, तर छेँया व सुरछित मुलय्‌ थ्यनेवं नुगलं व ह्यपाःया खाइगु ति ख्वबि थें पिहाँ वै।

खँ न्यङ्का
जिमा ला अपुक्क कन्भिन्स जुयादिल। मतिना यानादी नि सा। अबुयातः कन्भिन्स यायेतः ई माल। न्हापां ला वयेकलं ब्वः नं बियादिल। तर जिगू भाग्यय्‌ छु जुल धाःसा, जिम बाया सुचिकाः पसः दु। थःथितिं गयौ बांमलाक्क न्यङ्कूसां जिम्थाय्‌ पसलय्‌ वसः सुइकःवैपिन्सं बांलाःगु छ्याता(सुझाव) बियाझाल। अझ स्कुल लिक्क मेदिकल पसःया थुवाः, जःलःखःलकय्‌ छम्ह निम्हं धाधां बुलुहुं जिम बा नं नं थुइकादिल। जिं नं छता खँ छु थुइकेमाः धाःसा जिम मा बा हुर्केजूगु समाजं ब्याग्जाः नं दै धकाः मस्यं। मिजं मिसा धकाः जाः बाइनेरि(gender binary) धापू अलय्‌ मिजं मिसा ययेकी धकाः बिज्वःयचा(heterosexual) धापू, थ्व सिबें मेगु दै ला मदैला, दुसां बां मलाःगु मिखां स्वयेतः स्यनातःगु समाजय्‌ थ्व अवस्यं थाकुइ, झी ह्यूपाः जुइमाः।

जिं छेँय्‌ हर्मोन हिलेगु थेरापि(Hormone replacement therapy) बारे खँ तया। व न्ह्याका नं। अलय्‌ न्हिं न्हिछिं बुलुहुँ जिगू म्ह नं मिसापहः दयेकायङ्काः। थ्व हर्मोन हिलेगु थेरापि धयागु यचिं हिलेगु सर्जरि(sex reassignment surgery) या नितिं छता प्रक्रिया खः। हर्मोन हिलेहु थेरापिइ हर्मोन वासः नयाः अःखः यचिंया म्हलू वयेकी। थ्व वासलं जिगू म्ह नं मिसाम्ह यानांहल। छ्यङ्गू नाइकेगु, मिसाम्ह बां लुइगु, दुरुप्वः दयावयेगु जुल। थ्व हर्मोन हिलेगु थेरापि बारे अङ्ग्रेजी भासं सीकेगु यक्व खँत दु। Transgender hormone therapy

समाजय्‌ जाः व यचा म्ह्वःल्याः बारे यक्व हे भ्रमत दु। उगु फुक्क भ्रम त्वःथुलाः न्ह्यां वनेगु ज्या थाकुजू। तर जिं म्हसिकाया नितिं थ्व ल्वापु मदिका।

स्कुल सिधयेधुङ्काः
जिगू पालय ताक्क झिगू तगिमय्‌ एस.एल.सि. जाँच बियाः स्कुल सिधैगु खः, अनं झिन्छगू व झिन्निगू तगिं +२ धाइ। जिं सँ लइना अलय्‌ न्ह्याबलेंया नितिं मिसा वसः हे पुना। जिगू म्ह नं मिसालू वयावःगु जुल। दुरुप्वः दयावयेगु, छ्यङ्गु ला हिलाःवल। उबले फेसबुकं मिजंत नापं चक्कर चलेजुल, तर ताःमलाः थें। अनं तःबुखाय्‌ नं ब्वल।

यचाकःमि(Prostitute) धकाः पाः याइगु

ब्याग्जाः धाय्‌ खतुवं यचाकःमि धकाः मती लुइकी। थ्व तस्कं हे गलत धापू खः। यक्व ब्याग्जाः(transgender) आपलं ब्याग्मिसा(transwoman) पिं यचाज्याय्‌ जुइ, तर इमेगु नं थःगु बाध्यता दु। छेँय्‌ मथ्याकू, आखः ब्वनामतः/ब्वनेमखं/ब्वनेमफूगु बाताबरनं, ज्या मदु/मब्यू अलय्‌? जितः नं यक्व बहनिइ लँय्‌ जुइबलय्‌ यचाकःमि धकाः धाःवःपिं दु। छकः येँय्‌ जात्रा भ्वजं याकःचा लिहाँ वयाबलय्‌ जुल। न्हापां ला ग्यानां बिस्यूं वना। जिं मथूगु खँ ब्याग्जाः धाल कि बांमलाःगु ज्या याइपिं धकाः क्यनांतःगु दु। थ्व भ्रम त्वःथुलेमाः। आः ला काचाक्क ब्याग्जाः धकाः म्हमस्यू। तर ब्याग्जाः, अलय्‌ आपलं ब्याग्मिसापिन्तः अति सेक्सुअलाइज(sexualize) याइगु धापू चीकेमाः।

ब्याग्मिसापिन्तः ययेकीपिं मिजंत मदुगु मखु। न्हापां ला समाजं थज्याःगु स्वापू व ज्वरि नालीमखुगु जुयाः सुनां धा हे धाइमखु। अझ यक्वस्यां जिम्तः यचा मिखां जक्क स्वइ। ब्याग्मिसा धाइपिं ज्वःचिने जक्क यःपिं धकाः मधाःपिं नं मदु। ब्याग्मिसा यःपिं मिजंत उल्लि मच्छि दु तर सुनां हे समाजया न्ह्यःने जिमेगु ल्हाः ज्वनां जुइ छाः या?

+२ बलय्
जिम मा बा नं जितः जिल्ला ज्याकुथिइ यङ्काः जिगू जाः म्हसिका कथंया नागरिकता कयाबियादिल। जिम बा नं नं नालेधुङ्कूदु अवस्था खः। जि मा बा यातः जिं सदां हना। न्ह्यःने उलि खँ मल्हाः थःथिति आः। जिं लगंख्यःता एम्स आकादेमि भर्ना जुयाः। भर्ना जुइबलय्‌ जिं प्रिन्सिपलयातः जिगू बारे कना। वयेकलं तस्कं बांलाक्क न्वंवानादिल। जितः अन गू कथं या विभेद मजुइगु अलय्‌ सुनां बांमलाक्क ब्यःरा याःसा वयातः एक्सन कायेगु खँ कनादिल। जि ला तस्कं हे लयेताना। सँ लइनां फ्रक सिनां हे वना। मेगु खँ छु धाःसा अन +२ निदँ जिं सुइतः थःगु बारे मकना। लो प्रोफाइल ब्वनामि जुयाच्वना। +२ याउँक सिधल।

आः

जिगू ताःतुना भाषाविद जुइगु खः। नेपालभासय्‌ विग्य जुइ न्ह्यां। जितः सामाजिक ज्याखँय्‌, भाय्‌, भाषाविज्ञान, च्वयेज्या याय्‌ मंदु। थः जुइतः थःगु नितिं थः हे दनेतः हिम्मत माः। अझ ला नेपाली समाजय्‌ ब्याग्जाःपिन्तः थ्व तस्कं थाकु। तर थाकु थाकु जक्क धयां ला अधिकार, ज्वलिंज्वये(समानता) व नालासु(स्वीकार्यता) गथे चूलाइ? उकेया नितिं थःम्ह ल्वाय्‌ फयेकेमाः। छकः निकः छेँय्‌ खँ जुइ, “आः छ मिजं लिसें बिस्यूं वनिंम्ह ला मखु नि।” अलय्‌ न्हिला पल्ख। खय्‌फु धया। ब्याग्जाः जुइगु जिबनया हात्था मखु, थ्व खँया दसि जिं क्यने। जितः छु ताः धाःसा सुनां झीतः हँ धकाः धाय्‌ मथ्याः तर झीतः क्वह्यङ्केगु कुतःया इन्कार झीसँ याय्‌ ज्यू। थःगु अधिकारया नितिं अझं यक्व ल्वापु ल्वाय् मानि, यक्व ज्या याय् ल्यंदनि। जिबन ला कंया लँपु खः। थ्व लँपुइ जुइ अझं यक्व ल्यंदनि।

Leave a Reply

Your email address will not be published. Required fields are marked *

This site uses Akismet to reduce spam. Learn how your comment data is processed.