विकासया नामय् जनतायात पीडा

दिब्या ताम्राकार

देय्या हे दक्कले पुलांगु अस्पताल वीर अस्पतालया न्हूगु भवन दयेकेज्या जुयाच्वंगु लसताया खँ खः । अण्डर ग्राउण्ड नितँ व मेगु न्हय्तँ यानाः मुक्कं गुतँजाःया वीर अस्पतालया न्हूगु विशाल भवन निर्माण ज्या तिब्र गतिं न्ह्यानाच्वंगु दु । भोताहितिं रत्नपार्क वनेगु लँ छीगु ताँपुइ च्वनाः स्वल धाःसा निर्माण स्थलय् जुयाच्वंगु ज्या बांलाक खंकेफइ तर थुकिं जःलाखःला छेँथुवाःतय्त लाकाच्वंगु मर्का खंकेफइ मखु ।

 

विशाल भवनया निंतिं दयेकूगु विशाल परियोजना पूवंकेगु निंतिं विशाल यन्त्रत हये धुंकूगु दु, ज्याय् छ्यलाच्वंगु दु । थुपिं Heavy Equipment गथेकि एस्काभेटर, डोजर, ट्रक, ड्रील आदि न्हिनय् नं चान्हय् नं चलेयानाच्वंगु दु, गुकिं यानाः जःलाखःला २८ खा नेवाःतय्गु छेँयात प्रत्यक्ष असर लानाच्वंगु दु । एस्काभेटर चलेयाइबलय् उकियागु पावरं जःलाखःलातय्गु छेँ मिरिमिरि मिंक सनीगु याः । भुखाचं कमजोर जुयाच्वंगु आपालं छेँ थुकथं न्हियान्हिथं सनीबलय् गुजाःगु लिच्वः लाइगु खः धाये थाकु । गुगुं छेँत आः हे चिरि बाया वये धुंकल ।

 

झिखाति छेँया धः वीर अस्पतालया व हे निर्माणाधीन इलाका जुनाः वनाच्वंगु दु गुकियात पुनः कायम यानाबीगु जुइ धकाः मौखिक आश्वासन जक बियाच्वंगु दु, छुं ग्यारेण्टी ब्यूगु मदुनि । विशाल भवन दयेकेगु झ्वलय् सुं जःलाखःलाया छेँय् बामलाक लिच्वः लात धाःसा गुकथं समस्या पूर्ति यायेगु धयागु खँय् नं अस्पताल प्रशासन मौन तिनि । गुकिं यानाः निर्माणाधीन वीर अस्पतालया छचाःखेरं च्वंपिं बासिन्दातय् न्हिच्छि धन्दा पीर कयाः चच्छि न्ह्यः छखेलाकाः च्वने माःगु दु । छु थ्व नं विकासया नामय् जुयाच्वंगु आतंक मखुला ?

Leave a Reply

Your email address will not be published. Required fields are marked *

This site uses Akismet to reduce spam. Learn how your comment data is processed.