धर्मनिरपेक्ष वा हिन्दु राष्ट्र ?

अमीररत्न ताम्रकार
नेपाःयात हिन्दु राष्ट्र दयेके माःगु धकाः हाकनं छक्वः नेपाःया प्रतिगामी शक्तित दनावःगु दु । नेपाःयात हिन्दु राष्ट्र घोषणा यायेमाः धकाः राप्रपा, नेपाः थें पूर्व पञ्चतय्गु  प्रतिगामी दल व शक्तियात  पासा बीगु कथं दयेकूगु उगु पुचलं देशयात हिन्दु राष्ट्र दयेकेमाः धकाः अभियान जक मखु, छगूकथं आन्दोलनहे न्हृयाके त्यंगु दु । भारतया आतिवादी हिन्दुतय्गु ध्यबा व निर्देशनयात कार्यान्वयन यायेत न्हृयःने वयाच्वंपिं थुमिगु ल्यूने भारतयाहे ततःधंपिं राजनीतिक व्यक्ति, पार्टी व गुप्तचर संस्था ‘र’ या नं समन्वय् यानाः न्हृयाः वयाच्वंगु स्वये आः नेपाःया अन्तरिम संविधानय् स्पष्ट शब्दं च्वयातःगु धर्मनिरपेक्षताया थाय् याकनं प्वनीगु जकं मखुला धयागु ख्याच्वः दनावःगु दु ।

 

सतक दथुइ लावारिस रुपंय लानाच्वंगु हिन्दु राष्ट्रया शब्द न्हृयाक्कोहे प्रतिगामी व लोकतन्त्र विरोधी जूसां सत्ताया बागदोर ल्हातय् लाकेत ताःलाय् धुंकूगु अवस्थाय् नेपाली कांग्रेसया नेता खड्काया संयोजकतत्वय् दयेकूगु पुचलं छु गुगु दिकदम यायां न्हृयाः वइगु धयागु खा स्पष्ट मूजनिसां सत्ताया भागीदार एमालेया नं थुकी पूर्ण समर्थन दुगुलिं कांग्रेसया अभियान आःथत्थें ख्वाउायाः वनीगु खनेमदु । छगू गुरु योजना कथं न्हृयाःवइगु थुमिगु ज्याझ्वःयात सरकारं नं पासाबीगु व संविधानसभाय् नं थुमिगुहे बहुमत दुगुलिं इमिगु ज्याझ्वःयात हावादारी गफया रुपय् जक कायेगु भूल सुनांनं  यायेमज्यू ।
हिन्दु राष्ट्र दयेकेगु कांग्रेसया पार्टीया ज्याकू सानेपां सतक व आः वयाः सदनय् नापं दुहांवंगु दु । थुकियात इलय् सम्बोधन यायेमफत धाःसा थुकिं हे आः सदन अवरुद्ध जुइगु व वहे विषयलय् आरोप प्रत्यारोपं थाय् काइगु जूगु दु ।

 

धर्मया नामय् पाखण्डीया ज्या यायेत खप्पिस धर्म गुरुपिसं उकियात वास्ता मयाःगु जक मखु रत्नपार्कयात हिन्दुतय्गु तःधंगु देगः दयेकेगु हाथ्या नापं बिल, गोरखनाथया थपाय् ग्वःगु देगः दयेकेगु धाल । अनं चिलांवनेत धाःवंपिन्त उगु धर्मगुरुपिसं त्रिशुल, भाला, वञ्चरो क्यनाः हिंसाय् कुहांवयेत स्वल । वाध्य जुयाः प्रहरी लगय्यानाः अनं जवरजस्ती चीकेगु ज्या जुल ।

 

थ्वहे मसलायात राप्रपा नेपाःया नितिं सदनय् ल्होनाः गृहमन्त्रीपाखें निता खाय् स्पष्ट यायेगु न्हृयसः तल । छगू खः धार्मिक स्वतन्त्रताय् सरकार पाखें हस्तक्षेप मयायेगु प्रतिवद्धता व मेगु खः,  धार्मिक ज्याखाय् सरकारं शक्ति प्रयोग मयायेगु  प्रतिवद्धता । थुकियात स्पष्टीकरण बीगु झ्वलय् गृहमन्त्री छुं शब्दत नवाःगु प्रति उगु पार्टीया सभासदपिसं आपत्ति प्वंकाः गृहमन्त्रीं माफी फ्वनेमाः  धकाः  रोष्टम धेरे याः वन । थुगु ज्याखं न्याघौं अथें ई सितिं वन व बाध्य जुयाः सभामुख सुवास नेवाङ्ग सदन स्थगित यायेमाल । थुया न्हृयः सरकार पक्ष व बिपक्षीतय्गु दथ्वी न्हृयाइपुक्कहे आरोप प्रत्यारोप जक मखु, म्हुतु ल्हानाः ल्हाः तयाः ल्वायेगु तकं ज्या जुल ।

 

साभार झीगु स्वनिगः

Leave a Reply

Your email address will not be published. Required fields are marked *

This site uses Akismet to reduce spam. Learn how your comment data is processed.