जिं खनागु ग्वाङ्गजाउ

प्रज्ञारत्न शाक्य

चीनया ग्वाङ्गडोङ्ग प्रान्तया औद्योगिक व व्यापारिक शहर ग्वाङ्गजाउ चीनया स्वंगूगु तःधंगु शहर खः। थन १ करोड २५ लाख मनू दु। ब्रिटिसं हङ्गकङ्ग नापं ग्वाङ्गजाउलय् राज याःबलय् न्हूगु नां क्यान्टोन तया थकूगु जुयाच्वन। ब्रिटिसतसें पर्ल रिभर सिथय् टनेल म्हुयाः कृत्रिम आइसल्याण्ड दयेकाः बेलायती शैलीया छेँ जःखः क्यब दयेकाः च्वंगु जुयाच्वन। थुगु थाय् आः संग्रहालयया रुपय् सुरक्षित दनि। जिपिं अन वनाबलय् न्हू इहिपा जूपिं चिनिया तिपू न्याज्वः तुयूगु बेलायती बँय् भ्यालाभ्यालां लूगु गाउन व कोट, पाइन्ट, टाई चिनाः फोटो सेसन याःवयाच्वंगु खना। बेलायती गाउन बालं कया हइगु हँ ।

 

 

अक्टोबर ३१ निसें नोभेम्बर ४ तक जूगु क्यानटोन फेयरय् नेपाली हस्तकला ज्वलं ज्वनाः पासा रत्नमुनि व जिं ब्वति कयागु। निन्हु न्ह्यः येँनं चाइना साउथर्नया प्लेनय् च्वनाः तप्यंक क्यानटोन ब्वया। चान्हसिया ई न्ह्यः वयाच्वंगु। ग्वाङ्गाउ बाइयून इन्टरनेसनल एयरपोर्टय् प्लेन दिकेत्यन धइगु अनाउन्स जुल। सुथसिया प्यताःत्याया ई द्यः खिउँनि। जिं झ्यालं स्वया। आहा ! शहर लुँच्याः थें म्हासुक झललं थिनाच्वन। प्लेन ल्याण्ड जुल। एयरपोर्ट भव्य जू। इमिग्रेशन अधिकारीत यूनिफर्मय् फूर्ति खनेदु। ज्या फटाफट याइगु। जिपिं पिहां वया। छुं झन्झट मजू। ट्याक्सी ड्राइभरनाप बार्गेनिङ्ग यानाः सछि आरएमबी क्वःछिनाः लु जिङ्ग लु वया। मिटरं ६५ आरएमबी क्यन। १ आरएमबी बराबर नेपाली ११ तका। ४५ मिनेटया ट्याक्सी यात्राय् चिनिया विकास व वैभव यक्वं खना।

 

तब्यागु सडक, जःखः स्वांया बगैंचा, थीथी आकारप्रकारया सिमा, ततःजाःगु छेँ, ओभरहेड ब्रीज रोड, रेल, विशाल कन्टेनर ट्रक आदि। क्यब दथुइ १६ गूगु एसियाली गेम्सया मस्कट तसकं बांलाः। खुताः इलय् द्यः तुइल। २० तल्लाया गिटिक कमर्सियल सेन्टरया छेँ क्वय् ग्वाङ्गजाउ एनआरएनया पुलांम्ह उपाध्यक्ष थौंकन्हय् सल्लाहकार भाजु सिताराम ढुंगानां नापलाः वल। जिमित होटेलय् तये यंकल। नेपालीत अप्वः यानाः लुजिङ्ग लु जःखः च्वनीगु जुयाच्वन। थन नेपाली व्यापारीत यक्व हे अपार्टमेण्ट बालं कयाः च्वनाच्वंगु दु। अप्वः यानाः ब्रम्हू व छेत्रीत। छम्ह जक नेवाः ल्याय्म्ह भाजु राजेश श्रेष्ठ धौख्यलं वनाः कस्तुरी रेष्टुरेष्ट चायेकाच्वंम्ह नाप लात। अन मेपिं निम्ह स्टाफ नेपाली खना। वेटर चाइनिज मिस्त। बहनी जिमिसं अन हे नेपाली नसा नया। नेपालीतय् मेगु छगू नं रेष्टुरेष्ट अर्पाटमेन्टल स्टोर दुने खना। नेपाली व इण्डियनत अनया गाहाकी जुल। कन्हय् कुन्हु बहनी हानं कस्तुरीइ नं वनागु। अन खुम्ह ति एनआरएन पदाधिकारित च्वनाः मिटिङ्ग यानाच्वन। लक्ष्मी पुजा मंकाः कथं हनेगु व राष्ट्रपति रामवरण यादवयात ग्वाङ्गजाउलय् लसकुस यायेगु बारे सहलह जयाच्वंगु जुयाच्वन। लक्ष्मीपुजा कुन्हु मंकाः लक्ष्मीपुजा यायेगु, सेल व नेपाली नसा पार्टी यायेगु, नेपालीत २०० म्ह मुनीगु खँ क्वःजित ।

 

 

३० तारेख कुन्हु सुथय् पासा ढुंगानां गल्लिइ १० मिनेट दुने यंकाः चाइनिज रेष्टुरेण्टय् नके यंकल। अन प्यम्ह हब्सी व निम्ह चाइनिज मुस्मांत न्हापा हे नयाच्वंगु। थीथी नुडल्स व जा अनया मेनु जुल। अनं तप्यंक हे फेयर जुइगु थाय् फाजाउ वनेगु खँ क्वःछिना। अण्डर ग्राउण्ड मेट्रो स्टेशनय् इलेभटरय् च्वनाः कुहां वना। ५ आरएमबी पुलाः क्वाइन न्याना कया। क्वाइन क्यन कि लुखा चालीगु। काचाकिचां दुहां वना। भचा लनेवं मेट्रो वल। १ मिनेटं मनू जाल, ब्वाके यंकल। स्वंगः मेट्रो हिलाः ३० मिनेट जायेवं फाजाउ थ्यन। पर्ल रिभर सिथय् डोजरया पांग्रा आकारया भिं्कखुखा छेँ दुने इन्टरनेशनल एक्सपोर्ट इम्पोर्ट फेयर जुइत्यंगु। पास दयेकाः दुहां वना। भवन दुने द्वलंद्वः स्टल न्ह्यंगु रुमत, कफि शप, ततःधंगु रेष्टुरेष्ट इन्टरनेट पार्लर, बैंक आदिया सुविधा, स्टल डेकोरेशनया निंतिं सामान बालं कायेगु व्यवस्था दुगु जुल। अंगलय् पौभाः ब्वयाः न्हाय्कंया र्‍याक कसे याकाः न्ह्यःने शोकेशय् सामान ब्वयाः डेकोरेसन क्वचायेकाः ४ बजे अनं लिहां वया ।

 

 

ग्वाङ्गजाउया मौसम येँ स्वयाः भचा लुमु। तराई थें फाँट छखे वाउँसे हराभरागु चिजाःगु चुरे पहाड ज्वःगु गुँ खनेदु। शहरया दथुं पर्ल रिभर न्ह्यानाच्वंगु दु। खुसिइ लः यक्व तजायेक दु। सी लेभलय् पर्ल खुसि दु धइगु न्यना। खुसि सिथय् भाद्राभाद्रां छाल वयाच्वनीगु। पर्ल रिभरयात जिक्व छाय्पिया तःगु दु। स्वां सिमाया क्यब, फाउन्टेन, रंगीचंगी मत, स्टीमर, डुंगा आदि, होटल, नाइट पार्क आदि आदि। खुसि सिथय् सडक व तब्यागु फः, फलय् बुराबुरित चाइनिज म्यूजिक हायेकाः ताइचि (छताजिया व्यायाम) म्हिताच्वनी। बहनी थन म्वःम्वः मनूत हावा नः वयाच्वनीगु। प्यचाः पांग्रा, प्यंगू हे काथी झ्वःलिक च्वनाः पाउदान हीकाः चाहिला च्वनीपिं मस्त यइपुसेच्वं। सार्वजनिक पार्क दुने व्यायाम ज्वलं तयातःगु दु। व्यायाम निःशुल्क यायेदु। बहनी सडक, सिमा व पार्क झ्वःझ्वः ट्यांकर हयाः लःया फोहोरां सिउ वयाच्वनीगु।

 

पासा ढुंगानाया कथं १६ औं एसियाडया नितिं सरकारी खर्चं शहरया रोड साइडया फुकं छेँय् रंग रोगन मर्मत याःगु हँ। सिमा व छेँया पलिइ नापं झिलिमिलि मत तयातःगु दु। नोभेम्बर ज्वःछि सार्वजनिक यातायात गथे कि मेट्रो व सिटी बस निःशुल्क याःगु जुल। सिटिबसया क्वाइन काउन्टर टेपं टिकाः बन्द यानातल। मेट्रोया गेट ह्वांग चायेका तल। विशाल थ्व शहरय् मोटरसाइकल धाःसा छगः नं मखना। बस, कार, ट्याक्सी जक। ढुंगानां कन, निदँ न्ह्यः थनं मोटरसाइकल चीका छ्वःगु हँ। सडक जाम मजुइकेगु, दुर्घटना पनेगु व अपराध कम यायेगु उद्देश्यं मोटरसाइकल चीकूगु हँ। मेट्रोया सुगम व सुपथ सेवां यानाः नं मोटरसाइकल विस्थापित यायेत अःपुगु खनेदु। थन लः, धः व बिजुलिया समस्या मदु। शहर व्यवस्थित व सफा। अंग्रेजी भाय् अप्वःसिनं मथू। हाइट नेपाली थें हे। न्हाय् फ्याफः, ख्वाः बकुलाः। यचुक पिचुक लं फिना तइगु। फेसनेबुल मिस्त नं खना तर म्ह ब्वया मजू ।

 

 

३१ अक्टोबर कुन्हु सुथसिया १० बजे फेयर शुरु जुल। न्हापां फाटफुट १२ बजे निसें म्वःम्वः मनूत स्वःवल। बुद्ध मूर्ति, माने, पौभाः ज्वेलरी चिनियातसें ययेकूगु खनेदत। अष्टमंगल चिं, शंख, बज्र “ओम मनि पद्मे हुं” मन्त्र बुराबुरि, ल्याय्म्ह ल्यासे फुकस्यां म्हसिउ। स्टल न्ह्यःने दनाः स्वयेवं नेपार, नेपर धकाः न्यनी छाय्कि नेपाःया ध्वाँय् व बुद्धया मूर्ति हे देशया परिचय बिया च्वं। जिमिसं बुद्ध जन्मभूमि नेपाल धकाः परिचय बी। इमिसं लुम्बिनिइ चाःहिउ वयेगु इच्छा व्यक्त याइ। गुम्हेसिनं नेपालय् अशान्ति मखुला? चाःहिउ वये जिउ ला? धकाः न्यं। जिमिसं स्थितिइ सुधार जुइधुंकल, चाःहिउ वा धाये। स्वन्हु कुन्हुया खँ खः, हाकुगु बुर्का फिनातःम्ह छम्ह चिनियाँ मय्जुं वहःया चुरा न्ह्याना स्वत। चुराय् कियातःगु आखःया अर्थ न्यन। “ओम माने पद्मे हुं” जिं लिसः बिया। पासाम्हं मय्जुया न्हाय्पनय् ‘बुद्धिष्ठ’ धकाः स्वांपुल। मय्जुया ख्वाः ह्याउँक च्यात, चुरा त्वयाखतं भाताभातां वनाछ्वत ।

 

 

ग्वाङ्गजाउया दथुइ चिग्याङ्ग प्यागोडा नांया बुद्धस्थल नं दु। जिपिं अन वने मलात। ३ तारेख कुन्हु एनआरएनया पासापिं राष्ट्रपति रामवरण यादवयात लसकुस यायेत एयरपोर्ट वन। जिमित फाजाउ वनेत मेट्रो हिलाच्वने माःगुलिं आँट मंत। ट्याक्सीं वना छ्वया। मिटरं क्यंगु ५० आरएमबी बीवं बिल नं प्रिन्ट लिकया बिल। बहनी लिहां वयेत ट्याक्सीं हुलमुलया लबः काये थें १५० माः धाल। जिपिं पौने घण्टा फेयर कम्प्लेक्स चाहुलाच्वना। लिपा हुल मजुइवं ट्याक्सीं मिटरं वने माने जुल।

 

थन न्ह्याग्गु पसलय् नं बिल बीगु चलन दु। सामान फुक्कं प्याकेट सिस्टमया जक। सामान स्क्यानय् न्ह्यःने तलकि स्क्रीनय् मू क्यनी, जम्मा याइ, प्रिण्ट जुइ। सरकारयात कर काये अःपु। ग्राहकयात भाः याये म्वाःलाः अःपु। क्या, खासागु सिस्टम ! होटलया रुम चायेकेत कार्ड क्यनेवं खापा चालीगु। वहे कार्ड बक्सय् तलकी रुमय् मत च्याइगु। पिहां वयेबलय् कार्ड बक्सं लिकायेवं मत, एसी, टिभि अटोमेटीकल्ली बन्द जुइ। खापा लिसालेवं अथें लक जुइ। रुमया चार्ज आड्भान्स निन्हुया छक्वलं काःगु। निन्हु लिपा रुम चायेकेत कार्ड क्यनां खापा मचाः, काउन्टरय् ध्यबा पुलेवं वहे कार्डं हानं खापा चाल। थ्व नं खासागु हे सिस्टम मजूला? थज्याःगु हे खास्सागु थीथी विकास स्वयाः ५ तारेख कुन्हु नेपाः लिहां वयाछ्वया ।

 

साभार नेपालमण्डल डटकम

Leave a Reply

Your email address will not be published. Required fields are marked *

This site uses Akismet to reduce spam. Learn how your comment data is processed.