रानीपोखरीया धरोहर न्हंकूपिं बिरुद्ध फौजदारी मुद्दा दायर जुल

झीगु संवाददाता
येँ ।

सम्पदा बचाउ अभियानय् लगेजुयाच्वंपिं नीन्याम्ह मनूतय्सं थौं रानीपुखू वा न्हूपुखूयात चायेकचायें स्यंकाछ्वःगु धइगु आरोप बियाः मुद्दा तल ।

 

उमिसं पुरातत्व बिभागया सिनियर डिभिजनल ईन्जिनियर सम्पत घिमिरे, काठमाडौँ महानगरपालिकाया भौतिक पुर्वाधार विकास विभागया निर्देशक उत्तर कुमार रेगमी व वल्डवाईड कंडेल जे.भिया ठेकेदार अर्जुन कंडेलयात बिपक्षी दयेकाः सरकारी मुद्दासम्बन्धी ऐन, २)४( या दफा ३(१) बमोजिम फौजदारी मुद्दा महानगरीय प्रहरी कार्यालय, टेकुइ थौं दर्ता याःगु खः ।

 

नेपालया संविधानया धारा ३२नं बिउगु भाषा तथा संस्कृतिया मौलिक हकया हनन जुइक र प्राचिन स्मारक संरक्षण ऐन २०१३ या दफा १२ लिसे ल्वाक्क नेपाःया ऐतिहासिक, संस्कृतिक व पुरातात्विक धरोहर रानीपुखुलिइ विभिन्न तिर्थस्थलं हयातःगु पवित्र लः वां छ्वयाः दोजर छ्यलाः कन्क्रीटया पःखाः दयेकाः कानूनी व्यवस्था विपरीतया ज्या याःगुलिं महानगरपालिकाया कर्मचारीया अपराधिक ज्या व दुषित मनसाय न्हापं खनेदूगु अले नियम पालना याकीगु निकाय पुरातत्व बिभागया कर्मचारीं मुकदर्शक जुयाः मतियारया भूमिका म्हितूगुलिं थथे फौजदारी मुद्दा दायर यायेमाःगु स्थानिय मनूतय्गु धापू दु।

 

रानीपुखूया पुनः निमार्ण यायेगु जिम्मेवारी कयातःगु काठमाडौँ महानगरपालिकाया कर्मचारीं कानूनया अवज्ञा यायां पुरातत्व विभागया अनुमति मकासे मौलिकता व संवेदनशिलतायात वास्ता मयासे जुजु प्रताप मल्लं थी थी तिर्थ स्थललं हयातःगु पवित्र जल तयाः दयेकातःगु रानीपुखूया जलया धार्मिक तथा सांस्कृतिक महत्व मस्वसे वांछ्वःगु, रानीपोखूया क्षेत्रफल घटेयाःगु, कन्क्रीटया पःखः दयेकाः रानीपुखूयात कुरुप दयेकूगुया लिसें प्राचिन स्मारक संरक्षण नियमावलिया ४.५.१ लिसे ल्वाक्क मौलिकता व संवेदनशिलतायात ध्यान मबिसे कन्क्रीट व दोजर छ्यलाः संरक्षणया नामय् मौलिकता न्हंकेगु ज्या यानाः प्राचीन स्मारकयात नष्ट यानाः संरक्षणया नामय् बिरुप दयेकूगुलिं दफा १२(क) कथं सजाय हुने कसुर जूगु जाहेरी यानाः कानुन बमोजिम कारवाहिया प्रकृया न्ह्याकाः थप अनुसन्धान यायेत निवेदन बिउगु धकाः धयातःगु दु ।

Leave a Reply

Your email address will not be published. Required fields are marked *

This site uses Akismet to reduce spam. Learn how your comment data is processed.