ख्वनाय् सेनां जबरजस्ती लँ दयेकःवःगुया विरोध

झीगु संवाददाता
यल ।
काठमाडौँ उपत्यका विकास प्राधिकरण, नेपाल सरकार, व नेपाली सेनां ऐतिहासिक महत्व दूगु यल माहा(नगरपालिकाया ख्वना नगरय् न्यागू परियोजनात हयेगु झ्वलय् स्थानीय मनूतय्गु इच्छा व सहमति मदयेक अनया पुरातात्विक व साँस्कृतिक महत्वया थाय् नाश याःवःगु धकाः स्थानीय मनूतय्सं धाःगु दु ।

थौं अन सेनां ज्या याःवःथाय् जनतां विरोध क्यनेगु कुतः यानाच्वंगु दु तर अन सेनां छगू कथं आतंक श्रृजना यानाः स्थानीय जनतायात फोटो तकं कायेके मबिउ धकाः सेभ द भ्यालि अभियन्ता रुकसाना कपाली धयादीगु दु ।

थ्व हे झ्वलय् अन अथे आक्रमक शैली सेनां छकलं ज्या याःवःगुयात कयाः छखें जक स्वयाः यानाच्वंगुलिं नेपाः गाः म्वाकातये अभियान(सेभ नेपाः भ्यालि)पाखें विरोध क्यंगु दु ।
। उत्खनन व म्हालासाला याय् मानिगु ख्वना व कु–देय् नेवाः सभ्यताया नितिं पुरातात्विक हिसाबं मदयेकमगाः । पुरातत्व विभागं कु–देसय् यक्व उत्खनन याये मानि धकाः धाःगु नं दु । थ्व ख्यलय् व थुकेया चाकःलाकं छुं कथंया दनेज्या याये मज्य ू।
नेपाल आइ.एल.ओ. अधिवेशन १६९ य् ल्हाःचिं तःगु देय् जूगुलिं देय्या मूलवासी व आदिवासीपिनिगु भूमिलिसे स्वापु दूगु हकहितया सुरक्षा जुइमाः । सरकारं थीथी नीति–नियम व मदयेकं मगाःगु संरचनातय्गु खँय् लिच्वः बिइन्ह्यः मूलवासी व आदिवासीपिन्त दुथ्याकाः इमिगु खँ न्यानाः तिनि यायेमाः । उगु परियोजनाय् लिच्वः बीगु (निर्णय याय्गु) अधिकार व ज्याखँ याइबलय् दुथ्यायेगु अधिकार आदिवासी व मूलवासीपिनिगु दु । नेपाः देसय् थुकियात व्यवहारय् महयाच्वंगु अवस्था दुसा ख्वना थज्याःगु दुराचारया लिपांगु दसि जुइत्यंगु दु।

संस्थां विज्ञप्तिइ धाःग दु — “सतक व मेमेगु सुविधाया अधिकारयात झीसं समर्थन यानागु दुसा मनूतयेतः दथुमिखाय् तयाः मानव–मैत्री विकास हयेमाःगु झीगु माग खः । गुकिं अन च्वनिपपिन्तः सुविधा बियेगु नापं स्थानीय सम्पदा व लकसया सुरक्षा यासें स्तरीय जीवन नं बिइफइ । नेपाल सरकार व सम्बन्धित निकायतय्सं यानावयाच्वंगु ज्या यायेगु पहलं थुकिया मर्यादा भङ्ग याःगु दु ।”

राज्य थःगु देय्या समुदाययात ब्वलंकेगुगु स्वयाः नं तःतःधंगु संरचना दयेकेगुली न्ह्यचिलाच्वंगु खनेदु धकाः नं उगु संस्थां आरोप याःगु दु ।

लकस(वातावरण), तःताजि जीवजन्तु (जैविक विविधता), चाफय्(प्रकृति) व मनूतयत दथुफुतिइ तयाः स्वयाः गनं ज्या याःगु खनेमदु । “थज्याःगु परियोजना न्ह्याकेगु झ्वलय् सामाजिक न्यायया उलङ्घन जूगु, अन्याः जूगु घटना यक्व खनेदयाच्वंगु दु गुकिं भुखाचं दुख जूपिन्तः स्यालय् तीयाः बाम्हय् काकेगु ज्या जुयाःच्वंगु तकं दु । अथे हे स्वापू दूगु निकाय व पछ्यपाति मनुतय्सं दुखय् लाःपिं स्थानीयपिंसं थस्गु अधिकारया नितिं तस्गु सस्यातः क्वत्यलेतः “विकास विरोधी“ धका धाइच्वंगु दु। थज्याःगु अन्याः ज्याया महिमामय प्रस्तुती यानावयाच्वंगुलि नं घोर निन्दा यानाच्वना।” विज्ञप्तिइ धयातःगु दु ।

 

सतक व मेमेगु सुविधाया अधिकारयात झीसं समर्थन यानागु दुसा मनूतयेतः दथुमिखाय् तयाः मानव–मैत्री विकास हयेमाःगु झीगु माग खः ।

अथे हे, ख्वनाय् मूलवासी व आदिवासीतय्गु अधिकारया नितिं सः तइपिन्तः म्हया म्हतिं लक्षित यानाः ख्यायेगु ज्या यानावयाच्वंगु धइगु नं व संस्थां आरोप याःगु दु ।

थज्याःगु घटनातय्गु बारे जानकारी तसें ल्यूने लाकातःपिनिगु अधिकारया नितिं झी न्ह्याबलय् सः तयाःच्वनेगु खँ ध्वाथुइके अले न्यायया नितिं झी न्ह्याबलें ल्वाये व थःगु इतिहास, सम्पदा व म्हसिकाया नितिं ल्वानाच्वंपिं सःतयाःच्वंपिं ख्वनामितय्गु समर्थन याये धकाः नं विज्ञप्तिइ धयातःगु दु ।

Leave a Reply

Your email address will not be published. Required fields are marked *

This site uses Akismet to reduce spam. Learn how your comment data is processed.