सिक्किम नेवाः गुथिया थःगु भवन दइगु जुल

झीगु संवाददाता

येँ , ११३८ सिल्लागाः षष्ठी । भारतया सिक्किमय् च्वंपिं नेवाःतय्गु संस्था सिक्किम नेवाः गुथिया थःगु छेँ नेवार भवन दयेकेगु योजनां साकार रुप काइगु जूगु दु । यक्कव समस्या व कठिनाइ पार यानाः आः उकिया निर्माणया लागि सोमबार भूमि पुजन ज्या सम्पन्न जुल । पूजा अनया गुरुजु सूर्यवीर तुलाधरजुं न्ह्याकदीगु खः ।

 

गुथिया गान्तोक सिचेय् च्वंगु थःगु जग्गाय् छेँ दनेगु निंतिं भूमि पुजन ज्या जुल धकाः गुथि दुजःपिन्सं थःगु फेसबुकय् च्वयादीगु दु । ज्याझ्वलय् गुथिया उपाध्यक्ष  रेशु प्रधान, निर्माण समितिया कजि आर के प्रधान, अर्थ समितिया कजि गणेश प्रधान लगायत मेमेपिं अनया नेवाः अभियानया अभियन्तातय्गु उपस्थिति जूगु खः ।

 

गुथिया अध्यक्ष लगायतया दुजःपिं धाःसा थिमि नगरपालिकालिसे जानाः थन स्वनिगलय् च्वंपिं सिक्किमय् भाय् संस्कृति च्वन्ह्याकेत ग्वहालि याःपिन्त हनेत थन झायाच्वंगु दु ।

ज्याझ्वलय् गुरुजु तुलाधरं नेवाःत धइपिं श्रम यानाः नइपिं खः धकाः धयादिल अले थ्व छेँ दयेका नेवाःतय्सं थःगु धर्म, संस्कृति व जातिया रक्षा यायेफयेमा धयादिल ।

 

सिक्किमय् च्वंपिं नेवाःतय्सं थःगु थासय् थःगु पहिचान ल्यंकेत व न्हूगु पुस्तायात नेवाः भाय्, धर्म, संस्कृति व तिसावसःया जानकारी बिइत छगू थःगु हे थाय् माल धकाः उमिसं मालाच्वंगु खः । आःया योजना कथं व छेँय् क्युरिओ पसः, प्रदर्शनी ग्यालरी व क्याफे, म्युजियम, रेस्टुरां, पाहाँपिं च्वनेगु क्वथा व सभाकक्ष दइ ।
जग्गाय् छेँ दनेत जुलाई ५, २०१५य् अर्थसंकलनया लागि इनाप याःगु खःसा आः सरकारं व जग्गाय् छेँ दनाबिइगु जूगु दु । छु ई न्ह्यः तक अन व जग्गा गुथिया नामय् वयेत व अन नेवाःतय्सं छेँ दनेत कानूनी कठिनाइ दूगु अनया अभियन्तातय्गु पाखें न्यनेदूगु खः ।

निसःदँ स्वयाः न्हापानिसें थी थी अवस्थाय् स्वनिगःया नेवाःत सिक्किमय् वनाः थःगु कथं अनया विकासय् योगदान बियाच्वंगु खः । अनच्वंपिं नेवाःतय्त संगठित यायेत १९७४ पाखे नेवाः गुथि स्वनेगु कुतः जूगु खः । थ्व हे तातुनाः १९८२य् छगू आमसभा आयोजना यात अले १९९४य् थ्व संस्थायात अनया सरकारं मान्यता बियाः दर्ता यात । अबलय् निसें गुथिं अन नेवाः भाय्, लिपि, धर्म, बाजं, प्याखं, नसा, तिसावसः आदिया तालिम इत्यादिया आयोजना यानाच्वंगु दु, अले उकियात ग्वहालि यायेत स्वनिगलं नं थी थी विज्ञ व कलाकार अन वनाः योगदान यायेगु यानाच्वंगु खः ।

Leave a Reply

Your email address will not be published. Required fields are marked *

This site uses Akismet to reduce spam. Learn how your comment data is processed.