होलि नेवाःतय्गु खः लाकि मखु ?

राजमाया पुतवार
थौं कन्हय् छुं नखः वलकि थ्व नेवाःतय्गु खः लाकि मखु । कि झीसं बेहोसय् जक मेपिनिगु नखः हनावयाच्वना लाकि धकाः न्ह्यसः वइ । थ्व झी झीगु पहिचानया सवालय् सचेत जूगु कथं कायेमा, सकारात्मक कथं थुकियात कायेमाः । होलि वा फागु नेवाःतय्गु खः धाःसां मखु धाःसां थुकिं यक्व न्हापानिसें नेवाः तजिलजिइ हा कायेधुंकूगु दु । थौं नेवाःतय्सं भ्यालेन्टाइन डे अथवा क्रिसमस हनेथें रहरबहरं जक होलि हनावयाच्वंगु मखु । नेपालय् हे होलिया म्ये धकाः प्रख्यातगु होलिया मेला (अथवा अबिरया होलि) धाःगु म्ये थौं म्हिगः रचना जूगु म्ये खइमखु ।

 

सुयातं होलि ययेमा वाः मययेमा धइगु छगू पक्ष खः । धायेत ला बुद्धं होलियात मुर्खतय्गु पर्ब धकाः धाल धइगु खँ वयाच्वंगु दु । तर नेवाःत धाःसा गज्याःपिं धाःसा होलि म्हिताववं लँय् बुद्धया मूर्ति खनकि वयात हे अबिर अथवा रंगं छ्वाकीपिं । थकियात बांलाःगु ज्या लाकि थुकिं बुद्धदर्शनयात अपमान यात धकाः धायेगु बौद्ध विद्वानतय्गु ज्या जुल । सामान्य नेवाःतय्गु न्ह्यपुइ थ्व दुहाँ वनीगु खँ मखु ।

 

येँय् नेवाःतय्सं बसन्तुपुलिइ चीर मस्वाःसा होलि हे न्ह्याइमखु, थ्व समाजं झीत बियातःगु जिम्मेवारी जुल । अथे हे ख्वपय् नं भिन्द्यःचा पुज्यानाः होलि न्यायेकी ।

 

अथे हे होलि पुन्हीकुन्हु नेवाःतय्गु थी थी पर्व दु । थँबहिलिइ चकंद्यःया जात्रा, जलय् पिहाँ वइगु प्याखं व इतुम्बहालय् गुरुमापायात जा नकेगु अज्याःगु मेगु पर्व दु ।

 

वथेंतुं होलिबलय् त्वाःत्वालय् दाफा भजन हालेगु चलन नं पुलांगु हे खः । थुकिया इहिास मालेगु इतिहासकारतय्गु ज्या जुल तर थ्व झीगु हे जीवनया छगू पक्ष खः धकाः मधासे मगाः ।

 

पत्रकार सुगत रत्न सिन्दुराकारजुं फेसबुकय् च्वयादीकथं येँ महानगरपालिका वडा नं १९ ढोका त्वालय् च्वंगु श्रीकृष्ण भजन मण्डलपाखें नेपाःया मौलिकतां कःघाना वयाच्वंगु होलीया लसताय् होलि पुन्हिकुन्हु बिहिवाः होलि भजनोत्सव ढोका त्वालय् च्वंगु भजन सतलय् उत्साहजनकरुपं माने यात । थुगु महोत्सवलय् भजन प्रेमिपिन्सं थीथी द्यःया गुणगानयात कःघानातःगु भजन हालेगु यानादिल । थुगु महोत्सवय् भृगुराम श्रेष्ठ, सुशिला राज राजोपाध्याय लगायतपिन्सं भजन हालादीगु खः ।

Share this...
Share on Facebook
Facebook
Tweet about this on Twitter
Twitter

One thought on “होलि नेवाःतय्गु खः लाकि मखु ?

  • March 2, 2018 at 2:25 pm
    Permalink

    थौं कन्हय् छुं नखः वलकि थ्व नेवाःतय्गु खः लाकि मखु धकाः न्ह्यसः वइ । अले थथे न्हयःसः तैपिं हे खः कर्किया नखः माने याना लय्ताया च्वंनि पिं न !!!

    Reply

Leave a Reply

Your email address will not be published. Required fields are marked *

This site uses Akismet to reduce spam. Learn how your comment data is processed.