हिरामोती

शोभा महर्जन

थौं नं सुमनया छेँ वने लिबात । थथे लिबाःगु लछि निला जुजुं खुला तकं फूगु वं वाःचाःगु मखु । अफिसया ज्या धाल, हानं मिटिंग । उलि जक ला, थौंकन्हय् थःगु हे विजिनेश नं यानाच्वन । लगानी यक्व थाय् दु । तर गनं गतिलाःगु मखु । अय्नं व ब्वाँय् वना हे च्वन ।

कलाःचां थौं नं स्यातका आः । मन मनं बिचा यायां हथाय् पथाय् व छेँय् स्वया वन । उखुनुतिनि ख्याः वयेगु इलय् नं वयेगु ला धका धाःगु । थौं नं ख्याः पिहाँवय् थें हे जक जुल । ग्व, त्वते नं फूगु मखु । थःम्हं मस्वःसा हानं उखेलाः थुखेलाः जुइ । भचा भचा लबः दइला धकाः यक्व थासय् लगानी याना । पासापिं यक्व दु तर छुयाय् स्वयेफुपिं सुं दूगु मखु । बिचाः यायां छेँ ब्वाय् वनं नं उजुंसुजुं थ्यंके फूगु मखु ।

छेँय् थ्यनेवं सुनां मसीक खुँ पलाखं लुखा चायेका दुहाँ वन । कलाःचा द्यने धुंकुगु जुइ, मचाखाचा म्हगसय् म्हनाच्वन जुइ, नुगलय् खँ ल्हाकाच्वन । थथे जूगु यक्व दयेधुंकल । द्यनाच्वंसा याउँ बरु, मखुसा हाला जुइ ल्वाना जुइ । त्यानुक छेँय् वयाः नं आराम काये खनीमखु । न्हाबलें कचकच न्यने मालीगु । थौं नं की क्वः हे हाःगु तायेमदु । लय्तातां वन सुमन ।

ख्वाः सिला क्वथाय् तीजक वन । खाताय् सुं मदु । व आःतक मद्यंनि धका वाथावाथा कन । बइगलय् वना स्वत सुँ मदु । मनय् भ्वखाय् ब्वल । थौं नखत्या जकं खः कि छु । कला मस्त काः वने ल्वमन । मखु नखत्या ला… गबले धाःगु हे ल्वमन । थौं ला मखु ।
फोन छक निं याना स्वत । स्वीच अफ वल । झन मनय् भुस्याः थात । वाथावाथा कन । छु ल्वमन छु जुल मसिल वं । खाताय् फ्यतुल हानं फोन तिल । अहँ … स्वीच अफ हे तिनि । गन वन गन तन । धया नं वंगु मखु । कपालय् ल्हा दिका च्वच्वं टेबुलय् भ्वं खन । स्वल । कलाचिया पौ खनि ।

सुमन,
जि थछेँ वना । आः छँ ई दइबल् जक जितः काःवा । छं न जितः इ बिउ, नं झी मस्तय्त । काय् मफयाः निन्हु दत अस्पतालय् यकाः क्यनागु । ग्वकः धायेत स्वयां हे नं छँ वास्ता मयाः । न्ह्याबलें मिटिंग धाल फोन तयाबिल । म्ह्याय्यात स्कूलय् आखः मब्वं धकाः टिचरतय्सं कचकच याइगु जिं जक न्यनेमाः । जि छें नी स्वयेगु कि मस्तय्गु आखः नी । छम्ह मफु, मेम्ह अतेरी । छ धासा ई नि ब्यः मदुम्ह । सुथय् जिपिं दने न्ह्यः हे पिहाँ वनिगु बहनी नं गुबलय् वः सिउगु मखु । छंत ला जिपिं दूगु मदूगु छुं हे पाःगु मखु । लां लां थथे सहयानाच्वने मफुत जि । छ याकःचा ब्वााय् वनाच्वंगु जिन्दगीइ जिपिं पंगः जुइ मखु । छ हिरामोतीया ल्यू ल्यू जुयाच्वन । छंत जिपिं म्वाःगु जिन्दगीया नितिं भिंतुना ।
छिमि हे तृष्णा

छक्वलं स्वाहानें कुतुं वंगु थें जुल सुमन । मचा अपाय्सकं मफूगु तकं सिउगु मखु । पौ हानं छक ब्वन । गते ला म्हिगःयागु । ओहो हानं सिमां कुतुंवम्ह थें जुल । म्हिगः हे वंगु खनी, वया होस मदु । त्यानुक छें वय्खतं द्यंगु व सुथः न्हापां पिहाँ वन । वया कला मचा दुगु मदुगु छुँ हे होस मदुगु जुयाच्वन ।

थुलिमछि परिवारया नितिं ज्या याना । इमिगु हे भिं जुइमा धकाः सम्पत्ति मुंकाच्वना । तर थौं थः कलाः मचा खाचा नाप हे बायाच्वने माल । नक्कली हिरामोती मुंकेगु आज्जु ज्वनाच्वना, थौं थःगु जीवनया धाथेंपिं हिरामोती तंकेत्यना । जिगु हिरामोती ला जिमि कलाः व मचाखाचा हे खः । चान्हय् जुइधुंकल कन्हे सुथः न्हापां वनाः कयावये । गात थुनांचुयाः ब्वाँय् वने ।
थुलि बिचाः यायाँ वं सुथः जुइगु पियाच्वन ।
किपू
साभार नःलि साहित्यिक लय् पौ

Leave a Reply

Your email address will not be published. Required fields are marked *

This site uses Akismet to reduce spam. Learn how your comment data is processed.